ខេត្តមណ្ឌលគិរី ៖ បុណ្យចូលឆ្នាំចិនក្នុងរយៈពេល៣ថ្ងៃគិតពីថ្ងៃទី០៥ -០៧ ខែកុម្ភៈ ឆ្នាំ២០១៩ខេត្តមណ្ឌលគិរីមានភ្ញៀវទេសចរណ៍ជិត២ម៉ឺននាក់ ដែលបានមកលេងកម្សាន្តដោយចំនួនទាំងនេះនៅតែបន្តការកើនឡើង បើធៀប និងរយៈពេលដូចគ្នាកាលពីឆ្នាំមុន ។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីមានប្រសាសន៍ថា កត្តាដែលទាក់ទាញភ្ញៀវទេសចរណ៍មកលេងកម្សាន្តក្នុងខេត្តមណ្ឌលគិរីកាន់តែច្រើនឡើងបែបនេះ ដោយសារតែខេត្តមណ្ឌលគិរីជាខេត្តមួយដែលមានសក្កានុពលធម្មជាតិល្អប្រសើរដូចជាអាកាសធាតុត្រជាក់វិសាលភាពព្រៃភ្នំ និងមានរមណីដ្ឋានស្អាតៗជាច្រើន ជាពិសេសនោះខេត្តមួយនេះបានរឹតបន្តឹងនូវសន្តិសុខ សុវត្ថិភាពជូនភ្ញៀវទេសចរជាតិ-អន្តរជាតិបានយ៉ាងល្អប្រសើរ ជាពិសេសមានប្រព័ន្ធផ្លូវថ្នល់ល្អងាយស្រួលក្នុងការធ្វើដំណើរ ។
លោកបន្តថា ភ្ញៀវទេសចរណ៍ដែលមកកម្សាន្តនៅខេត្តមណ្ឌលគិរីតែងតែទៅលេងកម្សាន្តនៅរមណីយដ្ឋានទឹកជ្រោះប៊ូស្រា រមណីដ្ឋានវប្បធម៌ ភ្នំដោះក្រមុំ ដែលជាទីសក្ការរបស់បងប្អូនជនជាតិដើមភាគតិច ដើម្បីបួងសួងសុំសេចក្តីសុខ និងទៅទស្សនារមណីដ្ឋានសមុទ្រឈើមើលទេសភាព និងស្រូបយកខ្យល់អាកាសបរិសុទ្ធផងដែរ ។
ប្រធានមន្ទីរទេសចរណ៍ខេត្តបានបន្តទៀតថា បើគិតត្រឹមរយៈពេល៣ថ្ងៃនៃឱកាសបុណ្យចូលឆ្នាំចិន – វៀតណាម ខេត្តមណ្ឌលគិរី មានភ្ញៀវទេសចរមកលេងកម្សាន្តចំនួន១៩.៥២៨នាក់ ក្នុងនោះភ្ញៀវទេសចរណ៍ជាតិមានចំនួន១៩.២១៦នាក់ ភ្ញៀវទេសចរណ៍អន្តរជាតិមានចំនួន ៣១២នាក់ បើធៀបរយៈពេលដូចគ្នា កាលពីឆ្នាំ២០១៨ សម្រាប់ភ្ញៀវទេសចរណ៍សរុប ១៧.៣៧០នាក់ ក្នុងនោះទេសចរណ៍ជាតិមានចំនួន១៧.១០៥នាក់ ទេសចរអន្តរជាតិ២៦៥នាក់ មានការកើនឡើងសរុប ១២,៤២% ទេសចរជាតិកើន ១២,៣៤% ទេសចរអន្តរជាតិកើន ១៧,៧៣% ។
លោក ងិន សុវិមាន មានប្រសាសន៍ទៀតថា ចំពោះសន្តិសុខ សណ្តាប់ធ្នាប់ក្នុងខេត្តមណ្ឌលគិរី នាឱកាសបុណ្យចូលឆ្នាំចិន-វៀតណាមមានភាពល្អប្រសើរ ព្រោះកងកម្លាំងបានឈរតាមគោលដៅសំខាន់ៗ ជាពិសេសនៅរង្វង់មូលគោព្រៃ និងតាមរមណីយដ្ឋាននានា ៕
ចែករំលែកព័តមាននេះ