ខេត្តបាត់ដំបង ៖ ក្រុមចោរចំនួន៣នាក់ ដែលជនខ្លះមានប្រវត្តិធ្លាប់ជាប់គុកកន្លងមក ពេលនេះនឹងត្រូវសមត្ថកិច្ចបញ្ជូនទៅកាន់តុលាការនៅរសៀលថ្ងៃទី០៨ កុម្ភៈនេះ ក្រោយពីកម្លាំងសមត្ថកិច្ចចាប់ខ្លួនជាថ្មីពាក់ព័ន្ធនឹងករណីរួមដៃគ្នាលួចយកម៉ូតូគេមួយគ្រឿង កាលពីប៉ុន្មានថ្ងៃមុននេះ នៅក្នុងស្រុកសង្កែ ។
លោកឧត្តមសេនីយត្រី ជេត វណ្ណនី ស្នងការរងខេត្តបានឲ្យដឹងថា ជនសង្ស័យទាំង៣នាក់មាន១-ឈ្មោះ រ៉េត ចាន់រី អាយុ២៦ឆ្នាំ ២- ឈ្មោះ សឺន គឹមសួរ អាយុ២៩ឆ្នាំ និង៣- ឈ្មោះ ផុន ហុន អាយុ១៩ឆ្នាំ ពួកគេរស់នៅក្នុងភូមិព្រែកខ្ពប ឃុំព្រែកខ្ពប ស្រុកឯកភ្នំ ។
លោកស្នងការរងបានបញ្ជាក់ថា ក្រុមនេះបានរួមដៃគ្នាលួចយកម៉ូតូមួយគ្រឿងរបស់ជនរងគ្រោះឈ្មោះ ហ៊ឹម សើហ្វីអ៊ី ភេទប្រុស អាយុ២៥ឆ្នាំ កាលពីព្រឹកថ្ងៃទី០៤ កុម្ភៈ ខណៈជនរងគ្រោះបានទុកនៅខាងក្រោមផ្ទះ ស្ថិតក្នុងភូមិសម្ដេច ឃុំតាប៉ុន ស្រុកសង្កែ ។
លោកជេត វណ្ណនី បានបញ្ជាក់ដែរថា ពេលកើតហេតុគេមិនបានស្គាល់អត្តសញ្ញាណក្រុមជនដៃដល់ទាំង៣នាក់នេះទេ តែក្រោយទទួលបណ្ដឹងជនរងគ្រោះទើបមន្ត្រីជំនាញធ្វើការស្រាវជ្រាវ រហូតកំណត់បាននូវមុខសញ្ញាលក្រុមជនដៃដល់ និងធ្វើការឃាត់ខ្លួនពួកគេទាំង៣នាក់នៅរសៀលថ្ងៃទី០៦ កុម្ភៈនេះ ដែលមានកិច្ចសហការរវាងកម្លាំងអធិការស្រុកសង្កែ និងកម្លាំងអធិការស្រុកឯកភ្នំ ក្រោយការបញ្ជាផ្ទាល់ពីលោកស្នងការខេត្ត ។
ជាមួយនឹងការឃាត់ខ្លួននេះក្រុមជនដៃដល់ទាំង៣នាក់បានសារភាពថា ពួកគេពិតជាបានរួមដៃគ្នាចូលលួចយកម៉ូតូជនរងគ្រោះមែន ។ ក្រុមនេះបានប្រាប់ថា ពេលនោះពួកគេឃើញម៉ូតូជនរងគ្រោះទុកនៅខាងក្រោមផ្ទះថែមទាំងមានសោនៅជាប់ម៉ូតូទៀតផង តែមិនឃើញមានម្ចាស់ផ្ទះទេទើបពួកគេលួចជិះចេញដោយសុវត្ថិភាពតែម្ដង ។ ប៉ុន្តែពួកគេបានបញ្ជាក់ថា ក្រោយពីលួចបានពួកគេបានជិះយកទៅលក់ឲ្យគេនៅខេត្តប៉ៃលិនបានលុយចែកគ្នាចាយអស់ហើយ ។
លោកឧត្តមសេនីយត្រី ជេត វណ្ណនី បានមានប្រសាសន៍ថា បន្ទាប់ពីសួរនាំជនសង្ស័យលោកក៏បានដឹកនាំកម្លាំងជំនាញចុះទៅកាន់ខេត្តប៉ៃលិន ដើម្បីដកហូតវត្ថុតាងបានមកវិញភ្លាមៗដែរ ។ លោកស្នងការរងបានបញ្ជាក់ដែរថា ក្រុមនេះជាមុខសញ្ញាប្រព្រឹត្តអំពើចោរកម្មនៅតាមមូលដ្ឋាន ហើយក៏ជាមុខសញ្ញាចែកចាយថ្នាំញៀនផង និងប្រើប្រាស់ថ្នាំញៀនផង ។ កន្លងមកក្រុមជនដៃដល់នេះធ្លាប់ជាប់គុកម្ដងហើយ តែក្រោយចេញពីគុកក្រុមនេះនៅតែប្រមូលផ្ដុំគ្នាប្រព្រឹត្តបទល្មើសគ្រប់សព្វដដែលមិនព្រមរាងចាលទេ ។ ទោះយ៉ាងណាលោកថា ពេលនេះកម្លាំងជំនាញកំពុងកសាងសំណុំរឿង ដើម្បីបញ្ជូនពួកគេទៅតុលាការចាត់ការតាមនីតិវិធីហើយ ៕
ចែករំលែកព័តមាននេះ