ខេត្តកំពង់ឆ្នាំង ៖ គ្រាន់តែរដូវប្រាំងចាប់ចូលមកដល់ភ្លាមភ្ញៀវទេសចរណ៍អន្តរជាតិបានចាប់ផ្ដើមទៅទស្សនានៅសហគមន៍ទេសចរណ៍អណ្តូងឬស្សី ស្ថិតក្នុងភូមិអណ្តូងឬស្សី ឃុំស្រែថ្មី ស្រុករលាប្អៀរ មានចំនួនកើនឡើងដែលធ្វើឱ្យប្រជាកសិករនៅទីនោះមានសេចក្តីរីករាយគ្រប់ៗគ្នា ព្រោះតែមុខរបរលក់វត្ថុអនុស្សាវរីយ៍ដល់ភ្ញៀវទេសចរណ៍របស់ពួកគាត់ចាប់ផ្ដើមដំណើរការឡើងវិញ ។
បុរសឈ្មោះ អុំ សារី ហៅតារី អាយុ៦៧ឆ្នាំ មានទីលំនៅភូមិឃុំខាងលើបាននិយាយឱ្យដឹងថា ចាប់តាំងពីដើមខែមករាមកដល់ដើមខែកុម្ភៈនេះ ភ្ញៀវទេសចរណ៍អន្តរជាតិបានចូលមកទស្សនានៅក្នុងភូមិរបស់គាត់ មានចំនួនកើនឡើងគួរកត់សម្គាល់ក្នុងមួយថ្ងៃយ៉ាងហោចណាស់ក៏មានភ្ញៀវមួយជើងដែរ ដែលក្នុងមួយជើងមានរថយន្តទូរីស៤-៥គ្រឿង និងមានភ្ញៀ ប្រមាណពី ៤០ទៅ៥០នាក់ដែរ ។
ចំណែកថ្ងៃខ្លះ គឺមានដល់ទៅ២ទៅ៣ជើង ។ ភ្ញៀវទាំងនោះបានអញ្ជើញមកទស្សនាការរស់នៅរបស់ប្រជាកសិករក្នុងភូមិអណ្ដូងឬស្សីដូចជា ការធ្វើស្មូនឆ្នាំង ការផលិតវត្ថុអនុស្សាវរីយ៍ និងមកទស្សនានៅផ្ទះគាត់ជាដើម ។ សម្រាប់នៅផ្ទះរបស់គាត់ពេលភ្ញៀវមកដល់មគ្គុទេសទេសចរណ៍បានណែនាំទៅកាន់ភ្ញៀវទាំងនោះ អំពីមុខរបរឡើងត្នោតដូចជា បង្ហាញពីដើមត្នោត ការយកទឹកត្នោតមករំងាស់ទៅជាស្ករ បង្ហាញពីស្លឹកត្នោតសម្រាប់ប្រក់ផ្ទះ និងផ្លែត្នោតសម្រាប់បរិភោគជាដើម ។
ជាងនេះទៅទៀតមគ្គុទេសទេសចរណ៍បានបង្ហាញអំពីក្រមារខ្មែរដែលអាចស្លៀកចងក្បិន ក្រវាត់ចង្កេះ ជួតក្បាល ពានា និងចងអង្រឹងកូនក្មេងជាដើម ។ សម្រាប់រូបគាត់វិញគាត់បានឡើងត្នោតឱ្យភ្ញៀវមើល និងចុះមកវិញដាក់ទឹកត្នោតផ្អែមអោយភ្ញៀវពិសា ។ មានភ្ញៀវខ្លះចង់សាកស្លៀកសារ៉ុង ស្លៀកសារ៉ុងចោមពុង និងបុរសក្រវ៉ាត់ក្រម៉ាសៀតកាំបិតត្នោត និងរែកបំពង់ទឹកត្នោត ដើម្បីថតរូបភាពយកទៅស្រុកគេជាដើម ហើយភ្ញៀវទាំងអស់សុទ្ធតែសប្បាយរីករាយគ្រប់ៗគ្នា ។
ចំពោះមូលហេតុដែលភ្ញៀវចូលចិត្តទៅទស្សនានៅផ្ទះរបស់គាត់ដោយសារតែផ្ទះរបស់គាត់មានរោងមានកៅអីរៀបចំសម្រាប់ទទួលភ្ញៀវព្រមទាំងមានដាក់កង្ហារឲ្យភ្ញៀវទៀតផង ។ យ៉ាងនេះក្តី ក្នុងនាមលោកជាប្រជាពលរដ្ឋដែលតែងតែទទួលភ្ញៀវទេសចរណ៍អន្តរជាតិ លោកសំណូមពរដល់មន្ទីរពាក់ព័ន្ធ សូមជួយឧបត្ថម្ភការកសាងរោងសម្រាប់ទទួលភ្ញៀវឲ្យបានធំទូលាយជាងសព្វថ្ងៃ ។
តាមការបញ្ជាក់ពីលោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងបានអោយដឹងថា ភ្ញៀវទេសចរណ៍បានចាប់ផ្តើមកើនឡើងពីខែមករាមកដល់នេះនៅតែបន្តកើនឡើង ដោយសារមានកប៉ាល់ធំៗបានមកសំចតនៅកំពុងផែផ្សារក្រោម។ចំពោះការបាត់បងភ្ញៀវមួយរយៈកន្លងទៅនេះដោយសារទឹកទន្លេឡើងខ្ពស់ដែលធ្វើអោយកប៉ាល់ធំៗចុះមកខេត្តកំពង់ឆ្នាំងបាន ព្រោះតែបានទិស និងស្ពានបេឡេសាងសង់ថ្មីនៅចំណុចព្រែកព្នៅ រាជធានីភ្នំពេញ ៕
ចែករំលែកព័តមាននេះ