ខេត្តបន្ទាយមានជ័យ ៖ ពេលចេញពីសាលារៀនវិញ សិស្សប្រុសស្រីចំនួន៤នាក់បាននាំគ្នាចុះលេងទឹកអាង បណ្តាលឱ្យក្មេងស្រីសិស្សសាលាចំនួន២នាក់បានលង់ទឹកស្លាប់ ដែលហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៣និង៣០នាទីថ្ងៃទី៦ ខែកុម្ភៈ ឆ្នាំ២០១៩ នៅចំណុចអាងថ្មដែកកេះ ខាងកើតភូមិថ្មដែកកេះ ឃុំបន្ទាយឆ្មា ស្រុកថ្មពួក។
លោកវរសេនីយ៍ទោ សៅ សារឿន អធិការនគរបាលស្រុកថ្មពួកបានប្រាប់ថា ជនរងគ្រោះដែលស្លាប់ទាំង២នាក់ខាងលើ ម្នាក់ឈ្មោះ សម្បត្តិ ស្រីណុង ភេទស្រី អាយុ៨ឆ្នាំ ជាសិស្សរៀនថ្នាក់ទី២ និងម្នាក់ទៀតឈ្មោះ ថន គឹមហួន ភេទស្រី អាយុ៦ឆ្នាំ ជាសិស្សរៀនថ្នាក់ទី១ ។ ក្មេងស្រីរងគ្រោះទាំង២នាក់រស់នៅភូមិកើតហេតុខាងលើ។
លោកបានបញ្ជាក់ថា មុនពេលកើតហេតុ មានក្មេងប្រុសស្រីជាសិស្សសាលាចំនួន៤នាក់ (ក្នុងនោះស្រី៣នាក់ និងប្រុសម្នាក់) បានចេញពីរៀនគួរ ហើយនាំគ្នារកចាប់ខ្យងតាមមាត់អាងថ្មដែកកេះដែលនៅខាងកើតភូមិប្រមាណ២០០ម៉ែត្រ ហើយក្មេងស្រីរងគ្រោះទាំង២នាក់ក៏បានចុះទៅរាវខ្យងតាមមាត់អាង បណ្តាលឱ្យលង់ទឹកទាំង២នាក់តែម្តង ចំណែកក្មេងប្រុសម្នាក់ និងក្មេងស្រីម្នាក់ទៀតដែលទៅរាវខ្យងដែរនោះ ពេលឃើញហេតុការណ៍ក្មេងស្រីរងគ្រោះទាំង២នាក់នោះលង់ទឹក ធ្វើឱ្យពួកគេមិនអាចជួយបាន ក៏រត់ទៅប្រាប់អ្នកនៅជិតកន្លែងកើតហេតុដើម្បីឱ្យទៅជួយស្រង់ចេញពីទឹកហើយសង្គ្រោះដែរ តែអ្វីៗបានហួសពេលទៅហើយ គឺក្មេងស្រីរងគ្រោះ២នាក់នោះបានស្លាប់បាត់ទៅហើយ។ បន្ទាប់ពីកើតហេតុ ក្រុមគ្រួសារសាច់ញាតិក្មេងស្រីរងគ្រោះបានទៅរាយកាណ៍ជូនសមត្ថកិច្ចដើម្បីចុះពិនិត្យ ។
លោកវរៈសេនីយ៍ទោ សៅ សារឿន បានបញ្ជាក់ថា ក្រោយពេលទទួលបានព័ត៌មានខាងលើភ្លាម កម្លាំងនគរបាលជំនាញបានចុះទៅពិនិត្យនៅកន្លែងកើតហេតុ និងតាមការសាកសួរសាច់ញាតិក្មេងស្រីរងគ្រោះបានឱ្យដឹងថា ក្មេងស្រីរងគ្រោះទាំង២នាក់ពិតជាលង់ទឹកអាង បណ្តាលឱ្យស្លាប់ប្រាកដមែន ។
ក្រោយពេលពិនិត្យរួចរាល់ សមត្ថកិច្ចបានប្រគល់សពក្មេងស្រីរងគ្រោះទាំង២នាក់អោយក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ