ខេត្តកំពង់ឆ្នាំង ៖ បច្ចុប្បន្ននៅតាមបណ្តោយផ្លូវជាតិលេខ៥ ក្នុងខេត្តកំពង់ឆ្នាំង គេសង្កេតឃើញមានការដាក់លក់ផើងផ្កាដែលជារបកគំហើញថ្មីធ្វើអំពីកន្សែងពោះគោ និងកំណាត់ភួយ រួមនឹងស៊ីម៉ងត៍ បង្កើតជាផើងផ្កាយ៉ាងស្រស់ស្អាតដាក់តាំងលក់នៅតាមបណ្តោយផ្លូវជាតិ។
អ្នកប្រកបមុខរបរនេះបាននិយាយថា កំពុងតែមោទនភាពនឹងផលិតផលជារបកគំហើញថ្មីនេះ ព្រោះលក់ដាច់ខ្លាំងណាស់ ។ យ៉ាងនេះក្តីគ្រួសារមួយដែលរស់នៅក្នុងភូមិអណ្តូងជ្រៃ ឃុំអណ្ដូងស្នាយ ស្រុករលាប្អៀរបាននិយាយថា ការធ្វើផើងផ្កាដូចឃើញតាមបណ្តាញសង្គម ហ្វេសប៊ុកដែលគេយកកន្សែងពោះគោ ឬយកកំណាត់ភួយមកជ្រលក់ និងស៊ីម៉ងត៍ធ្វើផើងផ្កា នោះគ្រាន់តែជាលក្ខណៈគ្រួសារនោះទេ មិនមានគុណភាពឡើយអាចនឹងបែកដាច់ចេញពីគ្នា ។
បុរសឈ្មោះ ស៊ឹម ប្រុស អាយុ៤២ឆ្នាំ មានទីលំនៅភូមិឃុំខាងលើបានឲ្យដឹងថា គាត់ចេះផលិតផើងផ្កាតាមបែបថ្មីនេះពីប្រទេសម៉ាឡេស៊ី ខណៈដែលគាត់បានទៅធ្វើជាកម្មករសំណង់នៅទីនោះត្រូវបានមេជាងបង្ហាត់ឲ្យគាត់ចេះអំពីរបៀបធ្វើផើងផ្កា តាមបែបសម័យមួយនេះ។
លោកបានបញ្ជាក់ថា ការធ្វើដោយកន្សែងពោះគោមិនមានគុណភាពនោះទេដោយសារតែទឹកស៊ីម៉ងត៍វាកាត់អំបោះអោយពុកផុយពេលបែកវានឹងដាច់ចេញពីគ្នា ។ ចំណែកគាត់យកវត្ថុធាតុម្យ៉ាងដែលមិនងាយដាច់ចេញពីគ្នាឡើយបើធ្លាក់គ្រាន់តែស្រាំប៉ុណ្ណោះ ។ គាត់ថា អ្នកធ្វើផើងនេះបើចង់បានគុណភាពត្រូវយកក្រណាត់ស្វិតមកធ្វើទើបមានគុណភាព ។សព្វថ្ងៃថ្វីបើគាត់ធ្វើយឺតជាងគេបន្តិចមែន ប៉ុន្តែគុណភាពផើងផ្ការបស់គាត់រឹងមាំល្អមានអតិថិជនមកកុម្ម៉ង់ទិញជាច្រើន ។ បច្ចុប្បន្ននេះគាត់កំពុងតែផលិតនូវផើងផ្កាមួយបែបទៀតជា របៀបកំណាត់គល់ឈើដែលមានភាពស្រស់ស្អាត និងទាក់ទាញជាងមុន ។
ចំណែកប្រពន្ធរបស់បុរសខាងលើបាននិយាយដែរថា បច្ចុប្បន្ននេះគាត់មមាញឹកណាស់គាត់ផលិតលក់ឲ្យគេមិនទាន់ទេ ។ គាត់គ្មានស្រែចំការធ្វើនឹងគេទេព្រោះពឹងលើការផលិតផើងផ្កាអំពីស៊ីម៉ង់ត៍នេះឯង ។
ដោយឡែកអ្នកលក់ផើងផ្កាឈ្មោះ ពេជ សុភាស់ នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ វិញបាននិយាយអោយដឹងថា បច្ចុប្បន្ននេះគាត់លក់ផើងផ្កាតាមបែបសម័យថ្មីនេះដាច់ខ្លាំងណាស់អតិថិជនមកទិញជាច្រើន។
គួរបញ្ជាក់ដែរថា នៅតាមបណ្តោយផ្លូវជាតិលេខ៥ ក្នុងខេត្តកំពង់ឆ្នាំងចាប់ពីស្រុករលាប្អៀរខាងត្បូងដល់ស្រុករលាប្អៀរខាងជើងកន្លែងដែលមានលក់វត្ថុអនុស្សាវរីយ៍សុទ្ធតែមានតាំងលក់ផើងផ្កាសម័យថ្មីនេះដែរ ហើយផើងផ្កានេះមានអតិថិជនទិញជាច្រើនសម្រាប់យកទៅដាំផ្កាលំអរតាមគេហដ្ឋាន ៕
ចែករំលែកព័តមាននេះ