រាជធានីភ្នំពេញ ៖ បុរសម្នាក់បើកបររថយន្តកូរ៉េដឹកទឹកកកមួយគ្រឿងបើកក្នុងល្បឿនលឿនមិនប្រយ័ត្ន ខណៈមកដល់ផ្លូវកោងបួងចង្កូតបត់មិនទាន់ក៏ជ្រុលទៅបុកខឿននៅតាមចិញ្ចើមផ្លូវបណ្តាលឲ្យក្រឡាប់ផ្ងារជើង កាលពីវេលាម៉ោង៤ទៀបភ្លឺថ្ងៃទី៨ ខែកុម្ភៈ ឆ្នាំ២០១៩ ត្រង់ចំណុច ក្រោមស្ពានអាកាស៧មករា ស្ថិតក្នុងសង្កាត់ទឹកល្អក់ទី១…
រាជធានីភ្នំពេញ ៖ បុរសម្នាក់បើកបររថយន្តកូរ៉េដឹកទឹកកកមួយគ្រឿងបើកក្នុងល្បឿនលឿនមិនប្រយ័ត្ន ខណៈមកដល់ផ្លូវកោងបួងចង្កូតបត់មិនទាន់ក៏ជ្រុលទៅបុកខឿននៅតាមចិញ្ចើមផ្លូវបណ្តាលឲ្យក្រឡាប់ផ្ងារជើង កាលពីវេលាម៉ោង៤ទៀបភ្លឺថ្ងៃទី៨ ខែកុម្ភៈ ឆ្នាំ២០១៩ ត្រង់ចំណុច ក្រោមស្ពានអាកាស៧មករា ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសម្នាក់បើករថយន្តកូរ៉េប្រភេទពីរតោនដឹកទឹកកកមួយគ្រឿងម៉ាក KIA ពណ៌ខៀវ ពាក់ស្លាកលេខ ភ្នំពេញ ៣B-៤៤៧១ ទើបតែដឹកទឹកកកចេញមកពីគីឡូលេខ៦ ក្នុងគោលបំណងយកទៅដាក់ឲ្យម៉ូយនៅផ្សារសំណង់១២ ដោយបានធ្វើដំណើរតាមបណ្ដោយផ្លូវ២៨៩ ក្នុងទិសដៅពីជើងទៅត្បូង និងក្នុងល្បឿនលឿន លុះមកដល់ចំណុចកើតហេតុ រថយន្តខាងលើក៏បានបត់ស្ដាំបំរុងទៅផ្លូវមហាវិថីសហព័ន្ធរុស្ស៊ី ។
ប្រភពដដែលបានបន្តថា ពេលនោះដោយសាររថយន្តបួងចង្កូតមិនទាន់ក៏ជ្រុលទៅបុកខឿនតាមចិញ្ចើមផ្លូវបណ្តាលឲ្យរថយន្តក្រឡាប់ផ្ងារជើងតែម្តង ប៉ុន្តែមិនបង្កឲ្យមានអ្នករងរបួសនោះទេ ចំណែកខឿនតាមចិញ្ចើមផ្លូវក៏មិនបានរងការខូចខាតផងដែរ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកដល់កន្លែងកើតហេតុ ដោយសាររថយន្តខាងលើ មិនបានបង្កអោយមានគ្រោះថ្នាក់ដល់អ្នកដទៃ និងមិនបង្កឲ្យខូចខាតសម្បត្តិរដ្ឋផងដែរនោះ សមត្ថកិច្ចក៏ព្រមឲ្យអ្នកបើករថយន្តយករថយន្តចេញពីកន្លែងកើតហេតុទៅជួសជុលដោយខ្លួនឯងបាត់ទៅ៕
ចែករំលែកព័តមាននេះ