ចិន ៖ ប្រសិនបើអ្នកកំពុងអានអត្ថបទនេះតាមរយៈទូរស័ព្ទដៃ អ្នកគួរតែដាក់វាចុះហើយសម្រាកបន្តិចសិន ដើម្បីកុំឲ្យមានលទ្ធផលដូចស្ត្រីម្នាក់នៅក្រុង Changsha ខេត្ត Hunan ប្រទេសចិន។ តាមប្រភពព័ត៌មាន Shanghaiist បានឲ្យដឹងថា ស្ត្រីម្នាក់មានជំងឺរលាកថង់ទឹកសន្លាក់ម្រាមដៃ បន្ទាប់ពីលេងទូរស័ព្ទច្រើនជ្រុលនៅក្នុងកំឡុងពេលមួយសប្តាហ៍។
ស្ត្រីមិនបញ្ចេញឈ្មោះ បានសុំច្បាប់ថ្នាក់លើសម្រាករយៈពេលមួយសប្តាហ៍។ ក្នុងរយៈពេលឈប់សម្រាកនេះ នាងមិនបានទៅដើរលេងនៅទីណាទេ។ នាងគ្រាន់តែនៅផ្ទះដេកចុចទូរស័ព្ទលេងតែប៉ុណ្ណោះ។ នាងចុចពីព្រឹកដល់យប់ទើបដេក។
ក្រោយមកនាងក៏ចាប់ផ្តើមមានអារម្មណ៍ឈឺម្រាមដៃខាងស្តាំ។ ម្រាមដៃរបស់នាងនៅជាប់គាំង ក្នុងកាយវិការដូចជាកំពុងកាន់ទូរស័ព្ទ។ នៅពេលទៅដល់មន្ទីរពេទ្យ វេជ្ជបណ្ឌិតបានធ្វើរោគវិនិច្ឆ័យមកថា នាងមានជំងឺរលាកថង់ទឹកសន្លាក់នៅម្រាមដៃ។ វាគឺជាលទ្ធផលនៃប្រើប្រាស់កាយវិការកាន់ទូរស័ព្ទដដែលៗ ក្នុងរយៈពេលយូរ។
ក្រោយពីបានធ្វើការព្យាបាលរួចមក នាងក៏អាចប្រើប្រាស់ដៃរបស់នាងដូចធម្មតា។ វេជ្ជបណ្ឌិតបានដាស់តឿននាង និងអ្នកញៀនទូរស័ព្ទផ្សេងទៀត ឲ្យមានការប្រុងប្រយ័ត្ន ហើយឲ្យចេះដាក់ទូរស័ព្ទសម្រាកខ្លះផង៕
ចែករំលែកព័តមាននេះ