ខេត្តត្បូងឃ្មុំ ៖ តាមសេចក្តីរាយការណ៍បឋមបានឱ្យដឹងថា គ្រោះថ្នាក់ចរាចរណ៍រវាងរថយន្តវេអងបុកជាមួយម៉ូតូសណ្តោងរ៉ឺម៉កមួយគ្រឿងក្នុងទិសដៅស្របគ្នា បណ្តាលឱ្យមនុស្សប្រុសស្រីចំនួន៧នាក់រងរបួសធ្ងន់ និងស្រាល ក្នុងនោះមានក្មេងស្រីម្នាក់អាយុ១១ឆ្នាំ បានរងរបួសដាច់ប្រអប់ដៃស្តាំគួរឱ្យរន្ធត់ ។
ហេតុការណ៏នេះបានកើតឡើងកាលពីវេលាម៉ោង៤និង៤០នាទីរសៀលថ្ងៃទី៦ កុម្ភៈ ឆ្នាំ២០១៩ ស្ថិតលើផ្លូវជាតិលេខ៧ ត្រង់ចំនុចបង្គោលគីឡូម៉ែត្រលេខ១៤៨-១៤៩ ក្នុងភូមិជ្រៃបិទមាស សង្កាត់សួង ក្រុងសួង ។
តាមនគរបាលចរាចរណ៏បានប្រាប់ឲ្យដឹងថា រថយន្តមួយគ្រឿងម៉ាកហ៊ីយ៉ាន់ដាយ ប្រភេទវេអង ពណ៌ខៀវលាយស ទ្រុងពណ៌ត្រូយចេក បើកបរដោយឈ្មោះ ហ៊ាប ភឿន ភេទប្រុស អាយ៣២ឆ្នាំ នៅភូមិតាកោ ឃុំតាកោ ស្រុកពោធិរៀង ខេត្តព្រៃវែង បានរត់គេចខ្លួនបាត់ក្រោយកើតហេតុ ។
ចំណែកភាគីខាងម៉ូតូសណ្តោងរ៉ឺម៉កមួយគ្រឿងមានដឹកមនុស្សប្រុសស្រីចំនួន៦នាក់ បានរងរបួសធ្ងន់ និងស្រាល ក្នុងនោះមានក្មេងស្រីម្នាក់ជាអ្នករួមដំណើរឈ្មោះ វ័រ ស្រីនីត អាយុ១១ឆ្នាំ រស់នៅភូមិថ្នល់ថ្មី សង្កាត់វិហារលួង ក្រុងសួង បានរងរបួសធ្ងន់ដោយបានដាច់ប្រអប់ដៃខាងស្តាំគួរឱ្យរន្ធត់ រីឯអ្នកបើកបរម៉ូតូសណ្តោងរ៉ឺម៉កឈ្មោះ កាំង ស្រាន ភេទប្រុស អាយុ២៨ឆ្នាំ រស់នៅភូមិថ្នល់ថ្មី សង្កាត់វិហារលួង ក្រុងសួង ។
ក្រោយកើតហេតុ ជនរងគ្រោះត្រូវបានបញ្ជូនទៅសង្គ្រោះនៅមន្ទីរស្រុកត្បូងឃ្មុំ ចំណែករថយន្ត និងម៉ូតូសណ្តោងរ៉ឺម៉កត្រូវបាននាំមករក្សាទុកនៅអធិការដ្ឋាននគរបាលក្រុងសួងដើម្បីរង់ចាំដោះស្រាយតាមច្បាប់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ