ផ្សែងបារីផ្ទុកទៅដោយសារធាតុពុលជាច្រើនប្រភេទ ។ សារធាតុទាំងនេះហើយដែលបំផ្លាញដល់សុខភាពទារកក្នុងផ្ទៃ ។ ខាងក្រោមនេះជាហេតុផល៩ចំណុចដែលស្ត្រីមានផ្ទៃពោះត្រូវបោះបង់ការជក់បារី ៖
ផ្សែងបារីផ្ទុកទៅដោយសារធាតុពុលជាច្រើនប្រភេទ ។ សារធាតុទាំងនេះហើយដែលបំផ្លាញដល់សុខភាពទារកក្នុងផ្ទៃ ។ ខាងក្រោមនេះជាហេតុផល៩ចំណុចដែលស្ត្រីមានផ្ទៃពោះត្រូវបោះបង់ការជក់បារី ៖
១-ប្រឈមខ្ពស់នឹងហានិភ័យនៃការរលូតកូន
២-ប្រឈមនឹងលក្ខខណ្ឌស្មុគស្មាញនានាពេលជិតសម្រាលក្នុងនោះមានដូចជា ហូរឈាមតាមទ្វារ សុកបើកមុនពេលកំណត់… ។
៣-ប្រឈមនឹងលក្ខខណ្ឌគំរាមកំហែងដល់អាយុជីវិត Ectopic Pregnancy ដែលពងនៅក្រៅស្បូនផងដែរ ។ លក្ខខណ្ឌនេះអាចកាត់បន្ថយឱកាសមានផ្ទៃពោះជាថ្មីម្តងទៀតរបស់របស់ស្ត្រី ។
៤-ស្ត្រីជក់បារីក្នុងពេលមានផ្ទៃពោះ ៣ដងប្រឈមនឹងកូនកើតមកមានមាឌតូចខុសពីលក្ខណៈធម្មតា ។ ជាមធ្យមទារកដែលកើតពីម្តាយជាអ្នកជក់បារីមានទម្ងន់ស្រាលជាងទារកដែលម្តាយមិនជក់បារីប្រមាណជា ២០០ក្រាម ។ ទារកដែលមានទម្ងន់ស្រាលពេលកើតតែងតែប្រឈមនឹងការស្លាប់ខ្ពស់ និងមានជំងឺក្នុងវ័យកុមារភាពផងដែរ ។
៥-ទារកដែលទើបកើតប្រឈម២-៣ដងនឹងការស្លាប់ក្នុងសប្តាហ៍ទី១ ។
៦-ទារកទើបកើតជួបគ្រោះហានិភ័យនឹងលក្ខខណ្ឌវេជ្ជសាស្ត្រ Cot Death ដល់ទៅ៣ ដង ។ Cot Death គឺជាលក្ខខណ្ឌវេជ្ជសាស្ត្រមួយដែលក្មេងតូចស្លាប់ដោយគ្មានមូលហេតុអំឡុងពេលកំពុងដេកលក់ ។
៧-ក្មេងដែលកើតចេញពីម្តាយជាអ្នកជក់បារីប្រឈមទ្វេដងនឹងបញ្ហាប្រព័ន្ធផ្លូវដង្ហើមក្នុងនោះមានដូចជា កើតជំងឺហឺតនិងជំងឺរលាកទងសួតជាដើម ។ ការសិក្សាស្រាវជ្រាវមួយដែលបានចេញផ្សាយកាលពីខែវិច្ឆិកា ឆ្នាំកន្លងទៅបានបញ្ជាក់ថា បណ្តាស្ត្រីដែលជក់បារីអំឡុងពេលពួកគេមានផ្ទៃពោះមិនត្រឹមបង្កើតបញ្ហាសុខភាពដល់កូនៗប៉ុណ្ណោះទេ ប៉ុន្តែថែមទាំងដល់ចៅៗរបស់ពួកគេទៀតផង។
ក្រុមអ្នកស្រាវជ្រាវបានបញ្ជាក់ថា គ្រោះថ្នាក់ពីការជក់បារីនេះអាចធ្លាក់ទៅលើជំនាន់ក្រោយទាំងអស់ពោលគឺកូននិងចៅៗរបស់ពួកគេអាចនឹងកើតមានជំងឺហឺត ។ ក្រុមអ្នកជំនាញជឿជាក់ថា ផលអាក្រក់ដែលបង្កដោយការជក់បារីក្នុងពេលមានផ្ទៃពោះអាចបើកផ្លូវឱ្យហ្សែន(Gen) អាក្រក់ចម្លងទៅជំនាន់ក្រោយ ។
អំឡុងពេលមានផ្ទៃពោះ ជាតិនីកូទីនអាចធ្វើឱ្យប៉ះពាល់សួតរបស់ទារកដែលកំពុងអភិវឌ្ឍ ហើយបណ្តាលឱ្យពួកគេជួបនឹងហានិភ័យពីជំងឺហឺតក្នុងវ័យកុមារភាព ។ បើទោះណា ហានិភ័យទាំងនេះត្រូវគេដឹងយ៉ាងសុសសាយហើយក៏ដោយ ប៉ុន្តែក្រុមអ្នកស្រាវជ្រាវមកពីមជ្ឈមណ្ឌលវេជ្ជសាស្ត្រ Harbor-UCLAនៅរដ្ឋកាលីហ្វ័រនីញ៉ា សហរដ្ឋអាមេរិកនៅតែចង់ស្រាវជ្រាវពីការជំពាក់ជំពិនដល់ជំនាន់ក្រោយ ។ អ្នកដឹកនាំការសិក្សា វេជ្ជបណ្ឌិត Virender Rehanបាននិយាយថា ៖«នៅពេលដែលយើងសម្លឹងមើលពីផលប៉ះពាល់របស់សារធាតុនីកូទីនទៅលើ DNAនៅក្នុងពងស្វាសឬក៏អូវែររបស់សត្វកណ្តុរគឺគេពិនិត្យឃើញថា នីកូទីនបានបង្កើនកម្រិត Methylation ក្នុងពងស្វាស ប៉ុន្តែកាត់បន្ថយក្នុងអូវែរទៅវិញ » ។ លោកវេជ្ជបណ្ឌិតបានឱ្យដឹងបន្តថា ហឺតជាជំងឺដ៏សាមញ្ញបំផុតកើតមានលើកុមារ ហើយខណៈមានកត្តាជំរុញឱ្យកើតជំងឺនេះច្រើន ការជក់បារីក្នុងពេលមានផ្ទៃពោះគឺជាការប្រឈមមួយដែលមិនអាចចៀសបាន ។
៨-ការផលិតទឹកដោះមិនគ្រប់គ្រាន់ ។ យោងតាមការស្រាវជ្រាវបានបង្ហាញថា ស្ត្រីជក់បារីអាចបណ្តាលឱ្យការផលិតទឹកដោះសម្រាប់ឱ្យកូនបៅមិនបានគ្រប់គ្រាន់ ។ ការស្រាវជ្រាវបានពន្យល់ថា បរិមាណខ្លាញ់នៅក្នុងទឹកដោះស្ត្រីជក់បារីមានការថយចុះ ដូច្នេះបរិមាណទឹកដោះក៏ថយចុះផងដែរ ។
៩-បញ្ឈប់ការជក់បារី កូនក្នុងផ្ទៃរបស់ស្ត្រីនឹងទទួលបានសុខភាពល្អប្រសើរភ្លាមៗ ។ នេះជាចំណុចល្អមួយសម្រាប់ស្ត្រីមានគភ៌ដែលជក់បារី ។ នៅពេលសួតស្ត្រីជាម្តាយគ្មានផ្សែងបារី ហើយកាបូនម៉ូណូអុកស៊ីដនិងសារធាតុគីមីផ្សេងៗទៀតចេញអស់ពីរាងកាយ នោះកម្រិតអុកស៊ីសែនក្នុងខ្លួនស្ត្រីជាម្តាយត្រឡប់មកសភាពដើមវិញ ៕
ចែករំលែកព័តមាននេះ