រាជធានីភ្នំពេញ ៖ តាមសេចក្តីរាយការណ៍ព័ត៌មានបឋមបានឱ្យដឹងថា មានកង់បីឥណ្ឌា (Pass App)មួយគ្រឿង បានគេចពីរថយន្តពីរគ្រឿងដែលបើកវ៉ាគ្នា បណ្តាលឱ្យកង់បីឥណ្ឌាធ្លាក់ចូលប្រឡាយទឹកស្អុយរងការខូចខាតបែកកញ្ចក់មុខ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាកើតហេតុម៉ោង៤និង២០នាទីរសៀលថ្ងៃទី៧ កុម្ភៈ ឆ្នាំ២០១៩ ស្ថិតនៅតាមបណ្តោយផ្លូវជាតិលេខ៤ ក្នុងភូមិអូរដឹម សង្កាត់ចោមចៅ៣ ខណ្ឌពោធិ៍សែនជ័យ ។
អ្នកបើកបរម៉ូតូកង់បីឥណ្ឌាឈ្មោះវ៉ាន់ ចៃ ភេទប្រុស អាយុ៦២ឆ្នាំ មានទីលំនៅក្នុងភូមិព្រៃទន្លាប់ ឃុំបែកចាន ស្រុកអង្គស្នួល ខេត្តកណ្តាល ។
ប្រភពព័ត៌មានពីបុរសជាអ្នកបើកបរកង់បីឥណ្ឌា (Pass App) បានរៀបរាប់ឱ្យដឹងថា មុនពេលកើតហេតុ គឺគាត់បានបើកបរកង់បីឥណ្ឌាក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ស្រាប់តែមានរថយន្ត២គ្រឿងបើកស្របទិសគ្នា ហើយក៏បានបើកជែងគ្នា ពេលនោះអ្នកបើកបរកង់បីឥណ្ឌាមើលតាមកញ្ចក់ឃើញរថយន្តទាំងពីរគ្រឿងនោះបើកបរសំដៅមកកង់បីឥណ្ឌារបស់គាត់ ធ្វើឱ្យគាត់បើកបរកង់បីឥណ្ឌាគេច ក៏បណ្តាលឱ្យធ្លាក់ចូលប្រឡាយទឹកស្អុយរងការខូចខាតបែកកញ្ចក់មុខតែម្តង ។
ប្រភពដដែលបានបន្តថា ប្រសិនបើគាត់មិនបើកបរកង់បីឥណ្ឌាគេចរថយន្តទាំង២គ្រឿងខាងលើនោះទេ គឺអាចបណ្តាលឱ្យរថយន្តបុកខ្ទេច ឬក៏អាចមានគ្រោះថ្នាក់ដល់ជីវិតទៀតផង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ