យោងតាមភ្នាក់ងារសារព័ត៌មាន Channel News Asia បានឲ្យដឹងថា រដ្ឋមន្ត្រីក្រសួងរតនាគារអាមេរិកគឺលោក Steven Mnuchin បាននិយាយកាលពីថ្ងៃពុធ ថាភាគីទាំងសងខាងក្នុងកិច្ចចរចាពាណិជ្ជកម្មរវាងសហរដ្ឋអាមេរិក…
យោងតាមភ្នាក់ងារសារព័ត៌មាន Channel News Asia បានឲ្យដឹងថា រដ្ឋមន្ត្រីក្រសួងរតនាគារអាមេរិកគឺលោក Steven Mnuchin បាននិយាយកាលពីថ្ងៃពុធ ថាភាគីទាំងសងខាងក្នុងកិច្ចចរចាពាណិជ្ជកម្មរវាងសហរដ្ឋអាមេរិក និងប្រទេសចិនបានប្តេជ្ញាថា នឹងសម្រេចកិច្ចព្រមព្រៀងមួយមុនថ្ងៃទី១ ខែមីនា ឆ្នាំ២ឥ១៩ ។
លោកប្រធានាធិបតី ដូណាល់ ត្រាំ (Donald Trump) និងលោកប្រធានាធិបតី ស៊ី ជិនពីង (Xi Jinping) បានព្រមព្រៀងគ្នាថា ផ្អាកសង្គ្រាមពាណិជ្ជកម្មប្រមាណ៩០ថ្ងៃ ប៉ុន្តែពន្ធដែលអាមេរិកបានដាក់លើផលិតផលចិនប្រមាណ២០០ប៊ីលានដុល្លារនឹងត្រូវបានបង្កើនឡើងមកស្មើ ២៥% ប្រសិនបើភាគីទាំងពីរមិនអាចសម្រេចបានកិច្ចព្រមព្រៀងមួយមុនថ្ងៃកំណត់ ។
លោក Mnuchin បានប្រាប់ដល់សារព័ត៌មាន CNBC ថា មន្ត្រីអាមេរិក និងចិនកំពុងតែខិតខំប្រឹងប្រែងយ៉ាងខ្លាំង ប៉ុន្តែពួកគេនៅមានកិច្ចការច្រើនទៀតដែលត្រូវធ្វើ ។ លោកបានបញ្ជាក់ថាកិច្ចព្រមព្រៀងត្រូវតែអាចអនុវត្តមាន ។
លោករដ្ឋមន្ត្រីរូបនេះនឹងធ្វើដំណើរទៅកាន់បេកាំងនាសប្តាហ៍ក្រោយដើម្បីចូលរួមកិច្ចចរចាលើកទី៣ដើម្បីដោះស្រាយជម្លោះដែលបង្កឲ្យមានការដាក់ពន្ធលើផលិតផលប្រមាណ ៣៦០ប៊ីលានដុល្លាររបស់ប្រទេសទាំងពីរ ។
លោក Mnuchin បានបន្ថែមទៀតថា «សេដ្ឋកិច្ចអាមេរិកបន្តដំណើរការបានយ៉ាងល្អ» បើទោះជាមានមុខសញ្ញាបង្ហាញពី «ការអន់ថយក្នុងទ្វីបអ៊ឺរ៉ុបនិងផ្នែកដទៃនៃពិភពលោកក៏ដោយ» ។
សេដ្ឋកិច្ចប្រទេសចិនបានអន់ថយយ៉ាងខ្លាំងក្នុងឆ្នាំនេះ ហើយសហរដ្ឋអាមេរិកក៏ទទួលរងផលប៉ះពាល់ផងដែរដែលបង្កឲ្យមានការព្យាករណ៍ថា ការលូតលាស់របស់អាមេរិកក៏មានការធ្លាក់ចុះដែរក្នុងឆ្នាំនេះ ។
លោក Mnuchin បានឲ្យដឹងទៀតថា លោកពិតជាជឿជាក់យ៉ាងខ្លាំងក្លាថា សភានឹងអនុញ្ញាតកិច្ចព្រមព្រៀងពាណិជ្ជកម្មរវាងសហរដ្ឋអាមេរិក ម៉ិកស៊ិក និងកាណាដា ដែលបានធ្វើបច្ចុប្បន្នភាពកិច្ចព្រមព្រៀងពាណិជ្ជកម្មសេរីអាមេរិកខាងជើង ។
អ្នកដឹកនាំរបស់ប្រទេសទាំងបីបានព្រមព្រៀងគ្នាធ្វើកំណែទម្រង់កិច្ចព្រមព្រៀងខាងលើកាលពីថ្ងៃទី៣០ ខែវិច្ឆិកា ប៉ុន្តែសភារបស់ពួកគេត្រូវផ្តល់សច្ចាប័នសិនទើបអាចយកមកអនុវត្តបាន ៕
ចែករំលែកព័តមាននេះ