សហរដ្ឋអាមេរិក ៖ យោងតាមភ្នាក់ងារសារព័ត៌មាន Reuters កាលពីថ្ងៃព្រហស្បត្តិ៍ កន្លងមកបានឲ្យដឹងថា អាកាសធាតុរដូវរងា និងការផ្អាកដំណើរការរដ្ឋាភិបាលអាមេរិកបានបង្កើនតម្រូវការយន្តហោះខ្នាតតូចឯកជននៅខែមករាកន្លងមកនេះ ។
យន្តហោះទាំងនេះហោះហោរឆ្លងអាកាសយាន្ដដ្ឋានក្នុងតំបន់ដែលមិនជួបនឹងការពន្យាពេលជើងហោះហើរព្រោះតែអាកាសធាតុមិនល្អ ឬភាពមិនប្រក្រតីតាមកន្លែងត្រួតពិនិត្យក្នុងកំឡុងពេលផ្អាកដំណើរការរដ្ឋាភិបាលរយៈពេល៣៥ថ្ងៃកន្លងមក ។
រដ្ឋបាលសន្តិសុខដឹកជញ្ជូន (TSA) បាននិយាយថា បុគ្គលិកជាច្រើននាក់ដែលមិនទទួលបានប្រាប់បៀវត្សន៍ក្នុងកំឡុងពេលផ្អាកដំណើរការមិនបានមកធ្វើការឡើយព្រោះតែទុក្ខលំបាកផ្នែកហិរញ្ញវត្ថុ ។
លោក Patrick Gallagher ដែលជាអនុប្រធានប្រតិបត្តិផ្នែកលក់ និងទីផ្សារនៃក្រុមហ៊ុន NetJets បាននិយាយថា អាកាសធាតុមិនល្អ និងបញ្ហានៅ TSA ដែលបង្កឡើងក្នុងកំឡុងពេលផ្អាកដំណើរការរដ្ឋាភិបាលបានធ្វើឲ្យមនុស្សជាច្រើនមកសាកសួរពួកគេនៅខែមករា ។ ក្រុមហ៊ុននេះមើលឃើញជើងហោះហើររបស់ខ្លួនកើនឡើងច្រើនជាង៩%ទៅទៀតបើធៀបនឹងខែមករាមុនៗ ។
លោក James Elian ដែលជាប្រធាន និងនាយកផ្នែកប្រតិបត្តិការនៅ AirSprint បាននិយាយថា ជើងហោះហើររបស់ក្រុមហ៊ុនលោកអាចចៀសវាងការរាំងស្ទះនាៗដែលកើតមានឡើងតាមអាកាសយានដ្ឋានធំៗដែលបង្កឲ្យមានការពន្យាពេលជើងហោះហើរជាដើម ។
ក្រុមហ៊ុនអាកាសចរ American Airlines, Delta Air Lines និង United Airlines បានផ្អាកជើងហោះហើរប្រមាណ១១,៥០០ ទៅហើយក្នុងខែមករាព្រោះតែអាកាសធាតុ ឬបញ្ហាគ្រប់គ្រងចរាចរ ។
ការហោះហើរដោយប្រើប្រាស់យន្តហោះឯកជនស្មើភាគរយតូចប៉ុណ្ណោះនៃការហោះហើរទាំងអស់ ព្រោះតែការចំណាយក្នុងការប្រើសេវានេះហួសពីសមត្ថភាពរបស់អ្នកធ្វើដំណើរភាគច្រើន ៕
ចែករំលែកព័តមាននេះ