ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋសាងសង់ពីឈើចំនួន៤ខ្នង ស្មើនឹង៤ផ្ទះ ស្ថិតនៅភូមិជាំទ្រៀក ឃុំត្រមូង ស្រុកមេមត់ ត្រូវបានអគ្គិភ័យលេបត្របាក់ខ្ទេចខ្ទីអស់ ដែលហេតុការណ៍នេះកើតឡើងនៅវេលាម៉ោង៩និង១០នាទីព្រឹក ថ្ងៃទី០៧…
ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋសាងសង់ពីឈើចំនួន៤ខ្នង ស្មើនឹង៤ផ្ទះ ស្ថិតនៅភូមិជាំទ្រៀក ឃុំត្រមូង ស្រុកមេមត់ ត្រូវបានអគ្គិភ័យលេបត្របាក់ខ្ទេចខ្ទីអស់ ដែលហេតុការណ៍នេះកើតឡើងនៅវេលាម៉ោង៩និង១០នាទីព្រឹក ថ្ងៃទី០៧ កុម្ភៈ ២០១៩ ជាមួយនោះគេបានឃើញរថយន្តពន្លត់អគ្គិភ័យចំនួន៥គ្រឿងបានចេញមកបន្តបន្ទាប់ជួយអន្តរាគមន៍បាញ់ទឹកផងដែរ ។
សមត្ថកិច្ចមូលដ្ឋានបានឲ្យដឹងថា ដើមពីដំបូងគេបានឃើញភ្លើងបានឆាបឆេះចេញពីផ្ទះរបស់ឈ្មោះ
កែវ សុធា ភេទស្រី អាយុ៥៦ឆ្នាំ ក្នុងពេលដែលឆេះនោះគេបានឃើញក្មេងៗនាំគ្នារត់ចេញមករកកន្លែង
សុវត្ថិភាព ។ ហើយភ្លើងបានឆេះរាលដាលមកផ្ទះចំនួន៣ទៀត នៅក្បែរនោះមាន ផ្ទះឈ្មោះ យីម តុង
ភេទប្រុស អាយុ៥៦ឆ្នាំ ផ្ទះឈ្មោះ ហម ប៊ុនធឿន ភេទស្រី អាយុ៥៨ឆ្នាំ និងផ្ទះឈ្មោះ ហម ធីតា ភេទ
ស្រី អាយុ៤៤ឆ្នាំ ដោយភ្លើងបានឆេះខ្មួលខ្មាញ់ទៅលើអាកាសឡើងហ៊ុយទ្រលោម ។
នគរបាលមូលដ្ឋានបានប្រាប់បន្តថា បន្តិចក្រោយមកមានរថយន្តពន្លត់អគ្គិភ័យរបស់អធិការដ្ឋាននគរ
បាលស្រុកមេមត់០១គ្រឿង និងរថយន្តរបស់ក្រុមហ៊ុនចម្ការកៅស៊ូមេមត់០១គ្រឿង បានបើកមកដល់
បាញ់ទឹកពន្លត់ ដែលបានដឹកនាំដោយលោកវរសេនីយឯក ហុង គឹមហឿន អធិការនគរបាលស្រុក
រួម និងមន្ត្រីក្រោមឪវាទជាច្រើននាក់ទៀត ។ ជាមួយនោះលោកឧត្តមសេនីយទោ បែន រ័ត្ន ស្នងការនគរបាលខេត្តបានបញ្ជាឲ្យរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តនគរបាលស្រុកតំបែរ និងរថយន្តនគរបាលស្រុកពញាក្រែក ចំនួន៣គ្រឿងទៀតបានចេញមកជួយបាញ់ទឹកពន្លត់ ដើម្បីចៀសវាងកុំឲ្យភ្លើងឆាបឆេះរាលដាលទៅដល់ផ្ទះរបស់ប្រជាពលរដ្ឋនៅជុំវិញនោះ ។
សកម្មភាពរបស់ក្រុមសមត្ថកិច្ចបានជួយសម្រួលចរាចរណ៍ផ្លូវមុខផ្ទះដែលកើតមានអគ្គិភ័យ ដើម្បីឲ្យរថយន្តបាញ់ទឹកបានស្រួល ហើយទំហំនៃការខូចខាតមិនទាន់ដឹងនូវឡើយទេ ។ ចំពោះមូលហេតុដែលបង្កឲ្យមានគ្រោះអគ្គិភ័យនេះកើតចេញពីផ្ទះរបស់ឈ្មោះ សុភា សង្ស័យទុស្សេខ្សែភ្លើង ហើយក៏បានឆេះរាលទៅដល់ផ្ទះ៣ទៀត ដែលគ្រាន់តែទឹកបានបាញ់នោះប្រើប្រាស់អស់ចំនួន១៥រថយន្តផងដែរ៕
ចែករំលែកព័តមាននេះ