ខេត្តសៀមរាប ៖ ពិតជាស្មានមិនដល់ដែលក្មេងស្រី២នាក់បងប្អូនបានឃុបឃិតគ្នាលួចម៉ូតូ១គ្រឿង ជិះទៅអ៊ុតសក់ធ្វើព្រងើយ ។ អាចចាត់ទុកជាលើកដំបូងហើយ ដែលករណីលួចម៉ូតូគេបែបនេះ ត្រូវបានធ្វើឡើងដោយក្មេងស្រី២នាក់បងប្អូន ។
យោងតាមពាក្យបណ្តឹងរបស់ម្ចាស់ម៉ូតូបានមកដាក់នៅប៉ុស្តិ៍រដ្ឋបាលនគរបាលសង្កាត់ស្រងែ៉ នៅវេលាម៉ោង១១ព្រឹកថ្ងៃទី៥ កុម្ភ: ក្រោយពេលចោរចូលលួចម៉ូតូ នៅក្នុងផ្ទះកាលពីថ្ងៃទី៤ កុម្ភ: វេលាម៉ោង១០ និង២៥នាទីព្រឹក នៅក្រុមទី១០ ភូមិកសិកម្ម សង្កាត់ស្រងែ៉ ក្រុងសៀមរាប រួចគេចខ្លួនបាត់ស្រមោល ។ មន្ត្រីប៉ូលិសបានឱ្យដឹងថា ពេលទទួលបណ្តឹងភ្លាមក៏ចុះស្រាវជ្រាវ រហូតឈានដល់ការឃាត់ខ្លួនបានក្មេងស្រី២នាក់ រួចនាំយកមកសួរនៅអធិការដ្ឋាននគរបាលក្រុងសៀមរាប ដើម្បីរៀបចំកសាងសំណុំរឿង បញ្ជូនបន្តទៅតុលាការខេត្ត ចាត់ការតាមនិតិវិធី ។ ចំណែកម៉ូតូដែលដកហូតបានប្រគល់ឱ្យម្ចាស់ដើមវិញ ។ ការឃាត់ខ្លួនក្មេងស្រីទាំង២នាក់នោះបានធ្វើឡើងនៅក្នុងហាងអ៊ុតសក់មួយកន្លែង ស្ថិតនៅតាមបណ្តោយផ្លូវទៅភ្នំក្រោម ក្នុងភូមិអារញ្ញ សង្កាត់សៀមរាប ក្រុងសៀមរាប ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលបទល្មើសព្រហ្មទណ្ឌ នៃស្នងការដ្ឋាននគរបាលខេត្តបានប្រាប់ថា បន្ទាប់ពីបាត់ម៉ូតូរួចមក ម្ចាស់ឈ្មោះ ហង់ សុភាត់ ភេទប្រុស អាយុ២៧ឆ្នាំ ជាបុគ្គលិកសណ្ឋាគារ មានទីលំនៅបច្ចុប្បន្ននៅក្រុមទី១០ ភូមិកសិកម្ម សង្កាត់ស្រង៉ែ ក្រុងសៀមរាប បានទុកម៉ូតូរបស់គាត់មួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០០៨ ពណ៌ខ្មៅ ពាក់ផ្លាកលេខ សៀមរាប១E.៤០៥២ នៅក្រោមផ្ទះ ។
ម្ចាស់ថាមិនបានដកសោម៉ូតូចេញនោះទេ ក៏ត្រូវចោរលួចបាត់ ក៏មកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ស្រង៉ែ នៅថ្ងៃទី៥ កុម្ភ: ឆ្នាំ២០១៩ វេលាម៉ោង១១ព្រឹក ។ លោកស្នងការរងថ្លែងថា លោកបានឱ្យកម្លាំងជំនាញ ចុះស្រាវជ្រាវ រហូតឈានដល់ធ្វើការឃាត់ខ្លួនក្មេងស្រីទាំង២នាក់និងវត្ថុតាងនៅហាងអ៊ុតសក់មួយកន្លែងស្ថិតនៅតាមបណ្តោយផ្លូវទៅភ្នំក្រោម ក្នុងភូមិអារញ្ញ សង្កាត់សៀមរាប ក្រុងសៀមរាប រួចនាំយកមកសួរនៅអធិការដ្ឋាននគរបាលក្រុងសៀមរាប ។
លោកបានបញ្ជាក់ថា ជនសង្ស័យទាំង២នាក់ មាន៖ ១-ឈ្មោះ វិន សុជា ហៅហេង ភេទស្រី អាយុ១៦ឆ្នាំ មុខរបរមិនពិតប្រាកដ និង២-ឈ្មោះ វិន ស្រីលាភ ភេទស្រី អាយុ១៥ឆ្នាំ មុខរបរមិនពិតប្រាកដ (ទាំងពីរនាក់ ជាបងប្អូនបង្កើត)មានស្រុកកំណើត និងទីលំនៅបច្ចុប្បន្ននៅភូមិកំពង់ថ្កូវ ឃុំមានជ័យ ស្រុកប្រាសាទបាគង ខេត្តសៀមរាប ។ លោកបានបញ្ជាក់បន្ថែមថា ក្រោយពីធ្វើការសាកសួរក្មេងស្រីទាំងពីរនាក់ រួចមក ពួកគេបានឆ្លើយសារភាពថា ខ្លួនពិតជាបានលួចយកម៉ូតូខាងលើពិតប្រាកដមែន ។ ក្មេងស្រីទាំង២នាក់ ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់ ។
ចែករំលែកព័តមាននេះ