រាជធានីភ្នំពេញ ៖ រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានស្នើដល់ធនាគារអភិវឌ្ឍអាស៊ី (ADB) ៤ចំណុចក្នុងនោះក៏ពាក់ព័ន្ធនឹងការផ្តល់ហិរញ្ញវត្ថុ ដើម្បីអនុវត្តគម្រោងជូនប្រជាជនពាក់ព័ន្ធ និងវិស័យកសិកម្មនៅក្នុងប្រទេសកម្ពុជា ។ ការស្នើសុំនេះធ្វើឡើងក្នុងជំនួបរវាងលោក…
រាជធានីភ្នំពេញ ៖ រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានស្នើដល់ធនាគារអភិវឌ្ឍអាស៊ី (ADB) ៤ចំណុចក្នុងនោះក៏ពាក់ព័ន្ធនឹងការផ្តល់ហិរញ្ញវត្ថុ ដើម្បីអនុវត្តគម្រោងជូនប្រជាជនពាក់ព័ន្ធ និងវិស័យកសិកម្មនៅក្នុងប្រទេសកម្ពុជា ។
ការស្នើសុំនេះធ្វើឡើងក្នុងជំនួបរវាងលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទជាមួយលោកស្រី Sunniya Durrani Jamal នាយកប្រតិបត្តិធនាគារអភិវឌ្ឍអាស៊ី (ADB) ប្រចាំប្រទេសកម្ពុជា និងសហការីជួបសម្តែងការគួរសម និងពិភាក្សាការងារអំពីកិច្ចសហប្រតិបត្តិការលើការអភិវឌ្ឍវិស័យកសិកម្ម កាលពីថ្ងៃទី៦ ខែកុម្ភៈ ឆ្នាំ២០១៩ នៅទីស្តីការក្រសួង ។
ក្នុងជំនួបលោកស្រី Sunniya Durrani Jamal បានលើកឡើងថា គោលបំណងនៃជំនួបពិភាក្សានាពេលនេះ គឺទី១ – ចង់បានអនុសាសន៍ពីលោករដ្ឋមន្ត្រី ដើម្បីរៀបចំគម្រោងអភិវឌ្ឍវិស័យផ្សេងៗជារួម និងដោយឡែកវិស័យកសិកម្មដូចជា កសិកម្ម និងទឹកការប្រែប្រួលអាកាសធាតុការធ្វើឱ្យប្រសើរឡើង លើកិច្ចសហការរវាងរដ្ឋ និងវិស័យឯកជន និងការបង្កើនផលិតភាព ផលិតកម្ម ។ ទី២- សិក្សាលើតម្រូវការចាំបាច់ដែលត្រូវលើកយកមកពិភាក្សា រួចដាក់ចេញនូវគម្រោងអភិវឌ្ឍឱ្យត្រូវតាមគោលនយោបាយរបស់ក្រសួង ជាពិសេសឱ្យបានសមស្របតាមតម្រូវការជាក់ស្តែងរបស់ប្រជាកសិករ ឬអ្នកផលិត ។
ជាការឆ្លើយតបលោករដ្ឋមន្ត្រីវេង សាខុន បានលើកឡើងថា ក្នុងប៉ុន្មានឆ្នាំចុងក្រោយនេះវិស័យកសិកម្មមានការរីកចម្រើនគួរឱ្យកត់សម្គាល់ដែលបានចូលរួមចំណែកលើកកម្ពស់កំណើនសេដ្ឋកិច្ចជាតិ និងកាត់បន្ថយភាពក្រីក្រ ។ តែទោះជាយ៉ាងណាវិស័យកសិកម្មទាមទារធ្វើការអភិវឌ្ឍច្រើនថែមទៀត ដើម្បីឆ្លើយតមទៅតាមកំណើនសេដ្ឋកិច្ចក្នុងតំបន់ក៏ដូចជា នៅទូទាំងពិភពលោកកំណើនប្រជាជនកម្ពុជាកំណើនភ្ញៀវទេសចរណ៍ការប្រែប្រួលអាកាសធាតុ និងការប្រកួតប្រជែងទីផ្សារក្នុងស្រុក និងទីផ្សារនាំចេញ ។
លោកបានបន្តថា ហេតុផលនេះតាមរយៈលោកស្រីស្នើឱ្យធនាគារអភិវឌ្ឍអាស៊ីគិតគូពិចារណា និងធ្វើការសិក្សាឱ្យបានស៊ីជម្រៅបន្ថែមទៀត ពីលទ្ធភាពនៃការផ្តល់ហិរញ្ញវត្ថុ ដើម្បីអនុវត្តគម្រោងនានាដែលទាក់ទង និងអនុវិស័យសំខាន់ៗមួយចំនួនដូចជា ទី១- ការរៀបចំកសាងហេដ្ឋារចនាសម្ព័ន្ធគាំទ្រដល់ការអភិវឌ្ឍផលិតកម្មបន្លែ និងដំណាំរួមផ្សំជាអាទិ៍ ការពង្រឹងនិងការបញ្ចូលបច្ចេកវិទ្យាទៅក្នុងការកសាងហេដ្ឋារចនាសម្ព័ន្ធគាំទ្រ និងការគ្រប់គ្រងដំណាំ ការប្រមូលផលការវេចខ្ចប់ ស្លាកសញ្ញា ឃ្លាំងត្រជាក់រក្សាផលិតផល និងការគ្រប់គ្រងទីផ្សារ ជាដើម ។
និយាយជារួម គឺខ្សែច្រវាក់ផលិតកម្មគ្រប់ជ្រុងជ្រោយពី A to Z ដើម្បីធានាបានទាំងបរិមាណផ្គត់ផ្គង់គុណភាពអនាម័យ និងភូតគាមអនាម័យ (SPS) ទី២- លើកកម្ពស់វិស័យវារីវប្បកម្មឱ្យបានល្អប្រសើរទាំងទឹកប្រៃ និងទឹកសាបធ្វើយ៉ាងកាត់បន្ថយការចាប់មច្ចជាតិពីប្រភពធម្មជាតិ លើកកម្ពស់ផលិតភាពផលិតកម្មបង្កើនតម្លៃបន្ថែម និងចំណូលគ្រួសារក៏ដូចចំណូលសហគមន៍ធ្វើការកែច្នៃ និងនាំចេញ ។ ទី៣- វិស័យផលិតកម្មសត្វក៏បានដើរតួនាទីយ៉ាងសំខាន់ក្នុងការចូលរួមលើកកម្ពស់កម្រិតជីវភាពគ្រួសារ ដូច្នេះទាមទារត្រូវធ្វើការអភិវឌ្ឍពូជ (ប្តូរពូជ និងការបង្កាត់សិប្បនិមិ្មត) ដែលមានតម្លៃក្នុងទីផ្សារជំងឺ និងប្រសិទ្ធភាពសេដ្ឋកិច្ចខ្ពស់សម្រាប់គ្រួសារកសិកររួមទាំងការគ្រប់គ្រងចំណីការការពារ ។
ទី៤-ជំរុញ និងលើកទឹកចិត្តដល់វិស័យឯកជនក្នុងការផលិតពូជធ្វើការផ្សព្វផ្សាយ និងប្រើប្រាស់ឱ្យបានទូលំទូលាយនូវពូជសុទ្ធល្អធានាគុណភាពល្អ និងទិន្នផលកើនរួចត្រូវអនុវត្តផលិតកម្មកសិកម្មតាមកិច្ចសន្យា ដើម្បីធានាការនូវបរិមាណផ្គត់ផ្គង់ធានាបាននូវការជឿទុកចិត្តរក្សាតម្លៃ និងនិរន្តរភាពនៃការផលិត ។ ទី៥ – ផលិតកម្មពោតក៏ជាវត្ថុធាតុដើមមួយយ៉ាងសំខាន់ក្នុងវិស័យផលិតកម្មចំណីសត្វដែលទាមទារឱ្យធ្វើការយកចិត្តទុកដាក់លើការដាំដុះពូជបច្ចេកទេសក្រោយប្រមូលផល (ឃ្លាំងស្តុក និងរោងសម្ងួត) ដើម្បីបង្កើនផលិតភាពផលិតកម្មពោតធានាបរិមាណផ្គត់ផ្គង់ឱ្យទីផ្សារចំណីសត្វ គុណភាព និងកាត់បន្ថយការនាំចូល ។
ជាមួយគ្នានោះដែរ ដើម្បីបង្កើនប្រសិទ្ធភាពនៃការអនុវត្តគម្រោងលោករដ្ឋមន្ត្រីបានណែនាំដល់មន្ត្រីបង្គោលទាំងអស់ ធ្វើតាមដានជាប្រចាំនូវស្ថានភាពប្រាក់ចំណូល និងស្ថានភាពជីវិភាពរស់នៅរបស់កសិករមុន និងក្រោយទទួលបានការឧបត្ថម្ភពីគម្រោង ។ អ្វីដែលក្រសួង និងរាជរដ្ឋាភិបាលចង់បានចង់ឃើញ គឺការផ្លាស់ប្តូរកម្រិតជីវភាពរបស់ប្រជាពលរដ្ឋពិតប្រាកដ ។
ចំពោះសំណើរបស់លោករដ្ឋមន្ត្រីត្រូវបានលោកស្រីបានទទួលយកទៅពិនិត្យពិចារណា ហើយលោកស្រីបានសន្យាថា នឹងខិតខំឲ្យអស់លទ្ធភាពសិក្សា និងវាយតម្លៃរាល់ចំណុចនីមួយៗដែលលោករដ្ឋមន្ត្រីបានលើកឡើងឱ្យស៊ីជម្រៅ និងគ្រប់ជ្រុងជ្រោយដោយក្រុមជំនាញនីមួយៗ ៕
ចែករំលែកព័តមាននេះ