ខេត្តកំពង់ចាម ៖ បុរសម្នាក់ និងយុវជនម្នាក់បានស្លាប់បន្តបន្ទាប់គ្នាកាលពីថ្ងៃទី១ មីនា នៅក្នុងហេតុការណ៍ផ្សេងពីគ្នា ដែលម្នាក់ស្លាប់ដោយសាររបូតដៃធ្លាក់ពីលើចុងត្នោតកំពស់ជាង១០ម៉ែត្រ និងម្នាក់ទៀតចង.កធ្វើអត្តឃាតនៅលើដើមក្រខុបក្រោយវត្តនគរបាជ័យក្នុង(កន្លែងបញ្ចុះសព) ។
លោកអនុសេនីយ៍ឯក ចក់ សុខកៅ អធិការរងនគរបាលស្រុកកំពង់សៀមទទួលផែនយុត្តិធម៌បានឱ្យដឹងថា នាព្រឹកព្រលឹមថ្ងៃទី២ មីនា មានអ្នកឡើងត្នោតម្នាក់រស់នៅភូមិអំពិលលើ ឃុំអំពិល ស្រុកកំពង់សៀម បានទៅឡើងត្នោតនៅម្តុំខាងក្រោយវត្តនគរបាជ័យក្នុង ស្ថិតនៅភូមិអំពិលលើ ស្រាប់តែចោលកន្ទុយភ្នែកពីលើចុងត្នោតមកឃើញមនុស្សប្រុសម្នាក់ចង.កនៅលើដើមក្រខុបនៅខាងមុខចេតីយក៏ប្រញាប់ប្រញាល់ ចុះមកដីវិញរាយការណ៍ទៅលោកមេភូមិជាបន្ទាន់។ ក្រោយពីទទួលបានព័ត៌មាននេះភ្លាម រូបលោកបានចាត់ឱ្យលោកនាយប៉ុស្តិ៍រដ្ឋបាលឃុំអំពិល ដឹកនាំកំលាំងក្រោមឱវាទចុះទៅហ៊ុមព័ទ្ធកន្លែងកើតហេតុ មិនអនុញ្ញាតឱ្យអ្នកណាម្នាក់ចេញចូលទេ រង់ចាំការិយាល័យជំនាញបច្ចេកទេសខេត្តចុះមកធ្វើកោសល្យវិច័យ។ អ្នកដែលចង.កសម្លាប់ខ្លួននេះបន្ទាប់ពីមានការភ្ញាក់ផ្អើលមនុស្សមកមើលកកកុញទើបត្រូវបានគេស្គាល់ថា សពនេះឈ្មោះលន់ សុធា ហៅកូ អាយុ១៩ឆ្នាំ រស់នៅភូមិអំពិលលើ ឃុំអំពិល ស្រុកកំពង់សៀម។
តាមស្ត្រីឈ្មោះនូ សាវឿន អាយុ៥៧ឆ្នាំ ត្រូវជាម្តាយរបស់យុវជនដែលចង.កធ្វើអត្តឃាតរៀបរាប់ថា នៅវេលាម៉ោងប្រហែល៧យប់ថ្ងៃទី១ មីនា កូនប្រុសគាត់ឈ្មោះកូ បានត្រូវបងប្រុសរបស់គេឈ្មោះលន់ សុភា ស្តីបន្ទោសឱ្យថា «ឯងស៊ីបាយហើយត្រូវតែដេកកុំដើរលេងទៅណា»។ បន្ទាប់មកកូនប្រុសជាប្អូនបានដើរចេញមកផ្ទះបងស្រីឈ្មោះវ័ននៅក្បែរនោះដែរ លុះប្រហែលកន្លះម៉ោងក្រោយមក ពេលបានដឹងថាបាត់ ក៏នាំគ្នាតាមរកពីផ្ទះមួយទៅផ្ទះមួយស្ទើរតែពេញភូមិតែមិនទទួលដំណឹងកូនប្រុសចេញទៅទី ណាទៀតឡើយ។ កាលពីជាង១ឆ្នាំមុន កូនប្រុសឈ្មោះកូបានជួបនឹងគ្រោះថ្នាក់ចរាចរណ៍រហូតសន្លប់នៅស្រុកមេមត់ហើយត្រូវបានបញ្ជូនមកកាន់មន្ទីរពេទ្យខេត្តដើម្បីព្យាបាលរបួស លុះពេលជាសះស្បើយក៏មានសតិមិនដូចដើមនោះទេ។
លោកម៉ឹង សារឿន មន្ត្រីនគរបាលបច្ចេកទេសខេត្តបានថ្លែងថា យុវជនឈ្មោះកូបានឡើងចង.កនៅលើដើមក្រខុប មានកំពស់ពីដី២,៦០ម៉ែត្រ ជើងផុតពីដី០,៩២ម៉ែត្រ ដោយប្រើអាវរងាចង.ក និងមានហៀរទឹកកាមផងដូច្នេះការស្លាប់នេះពិតជាដោយសារការចង.កប្រាកដមែន។ ដោយឡែកនៅលើកំភួនដៃខាងស្តាំមានស្នាមឆូតអង្កន់ៗជាច្រើនកន្លែង មានស្នាមចាស់ និងស្នាមថ្មីដែលបញ្ជាក់ថា ជននេះត្រូវថ្នាំញៀនធ្វើទុក្ខជាខ្លាំងរហូតដល់អារសាច់បឺតឈាមដើម្បីរំសាយអារម្មណ៍ និងឈានរហូតដល់ចង.កធ្វើអត្តឃាតអាចនៅចន្លោះពីម៉ោង៩ទៅ១០យប់ ថ្ងៃទី១ មីនា ២០១១ ។
លោកអនុសេនីយ៍ឯក ចក់ សុខកៅ បានឱ្យដឹងទៀតថា ដោយឡែកកាលពីវេលាម៉ោង៥ល្ងាច ថ្ងៃទី១ មីនា មានបុរសម្នាក់ឈ្មោះអែម អេង អាយុ៤៧ឆ្នាំ រស់នៅភូមិប្រសំ ឃុំរអាង ស្រុកកំពង់សៀម បានធ្លាក់ពីលើចុងត្នោតកំពស់ជាង១០ម៉ែត្រក្នុងពេលឡើងយកទឹកត្នោតសំរាប់ទុកដើរលក់នៅថ្ងៃទី២ មីនា។ ក្នុងពេលអោនឈ្ងោកចាក់ផ្ទេរយកទឹកត្នោតបានប្រហែលជា៥នាទីប៉ុណ្ណោះ ទំនងជាវិលមុខទប់ខ្លួនមិននឹងក៏បណ្តាលឱ្យធ្លាក់ និងស្លាប់ភ្លាមៗ។ ហេតុការណ៍នេះត្រូវបានក្រុមក្មេងឃ្វាលគោឃើញក៏រត់មកប្រាប់ស្ត្រីជាប្រពន្ធដែលមានផ្ទះនៅចំងាយប្រហែលជា១០០ប៉ុណ្ណោះពីកន្លែងធ្លាក់ និងដោយបានហៅអ្នកភូមិឱ្យមកជួយសែងសពដើម្បីយកទៅរៀបចំធ្វើបុណ្យតាមប្រពៃណី ៕
ចែករំលែកព័តមាននេះ