រាជធានីភ្នំពេញ ៖ មន្ត្រីយោធាម្នាក់បានត្រូវកងរាជអាវុធហត្ថខណ្ឌ៧មករាឃាត់ខ្លួននិងបញ្ជូនទៅកាន់បញ្ជាការដ្ឋានកងរាជអាវុធហត្ថរាជធានីភ្នំពេញ កាលពីល្ងាចថ្ងៃទី៤ កុម្ភៈ កន្លងទៅ ហើយអតីតអធិការរងនគរបាលម្នាក់បានរត់គេចខ្លួន ក្រោយពីមានករណីផ្ទុះអាវុធដាក់គ្នាចំនួន៣គ្រាប់ ពាក់ព័ន្ធនឹងទំនាស់រឿងជួសជុលផ្ទះ ។
តាមអ្នកនៅកន្លែងកើតហេតុបានឲ្យសមត្ថកិច្ចដឹងថា មន្ត្រីយោធាដែលត្រូវកងរាជអាវុធហត្ថឃាត់ខ្លួននេះឈ្មោះ ជា ចិន្តា មានឋានន្តរស័ក្តិវរសេនីយ៍ឯក ។ ចំណែកភាគីដែលផ្ទុះអាវុធ ហើយរត់គេចខ្លួនឈ្មោះ គាវ ស៊ីថា ជាអតីតអធិការរងនគរបាលក្រុងតាខ្មៅ ខេត្តកណ្តាល ពួកគាត់មានផ្ទះនៅលើក្រោមគ្នា ស្ថិតនៅតាមផ្លូវលេខ១៣៩ សង្កាត់អូរឫស្សីទី៣ ខណ្ឌ៧មករា ។ តាមពិតមន្ត្រីយោធារូបនេះ មិនមានផ្ទះនៅទីនោះទេ ប្រហែលជាសាច់ញាតិហៅមកកាង ។
ប្រភពព័ត៌មានខាងលើបានរៀបរាប់ប្រាប់សមត្ថកិច្ចទៀតថា នាល្ងាចថ្ងៃនោះ គេឃើញលោក ជា ចិន្តា និងលោក គាវ សុីថា ទាស់ពាក្យសម្តីគ្នាពាក់ព័ន្ធនឹងរឿងជួសជុលផ្ទះ ។ នៅពេលមានទំនាស់ពាក្យសម្តីគ្នាមួយប្រាវនោះ គេឃើញលោក ជា ចិន្តា ដកកាំភ្លើងគំរាមទៅលើលោក គាវ សុីថា រួចហើយក៏ដើរឡើងទៅលើផ្ទះជាន់ទី៣បាត់ទៅ ។ ខណៈឃើញដូច្នេះ អតីតអធិការរងនគរបាលក្រុងតាខ្មៅរូបនេះ បានទាក់ទងនិងរាយការណ៍ទៅនគរបាលមូលដ្ឋាន ដើម្បីជ្រាបនិងឲ្យជួយអន្តរាគមន៍ ដោយចោទថា មន្ត្រីយោធារូបនេះថាបានប្រើអាវុធគំរាមក្នុងពេលមានជម្លោះ ។
បន្ទាប់ពីមានសេចក្តីរាយការណ៍ផ្ទាល់មាត់នេះ នាយរងប៉ុស្តិ៍នគរបាលរដ្ឋបាលសង្កាត់អូរឫស្សីទី៣មួយរូបឈ្មោះ គិត ច័ន្ទតារា បានទៅដល់ភ្លាមដែរ ដែលស្របពេលនោះ លោក ជា ចិន្តា ក៏បានចុះពីលើផ្ទះមកវិញ ហើយក៏មានការប៉ះពាក្យសម្តីគ្នាជាមួយលោក គាវ សុីថា ទៀត ។ ភាគីទាំងពីរ ក៏មានទំនាស់គ្នាម្តងទៀតនិងកាន់តែខ្លាំងជាងមុន រហូតដល់ស្ទុះចង់វាយទាត់ធាក់គ្នាទៀតផង ប៉ុន្តែត្រូវបានលោកនាយរងប៉ុស្តិ៍ជួយឃាត់ ។
ឆ្លៀតឱកាសនោះ លោក គាវ សុីថា បានដកយកកាំភ្លើងខ្លីពីចង្កេះលោកនាយរងប៉ុស្តិ៍ គិត ច័ន្ទតារា បាញ់ផ្ញុចដីចំនួន៣គ្រាប់រួចរត់ចូលក្នុងផ្ទះបាត់ ។ ក្រោយពេលមានហេតុការណ៍ផ្ទុះអាវុធនេះ កម្លាំងកងរាជអាវុធហត្ថ និងនគរបាលខណ្ឌ៧មករាបានទៅដល់ និងឃាត់ខ្លួនមន្ត្រីយោធារូបនោះយកទៅសាកសួរ ចំណែកអ្នកផ្ទុះអាវុធ គឺលោក គាវ សុីថា បានចេញទ្វារក្រោយគេចខ្លួនបាត់ទៅ ។
ទោះជាយ៉ាងណា ពេលនេះ សមត្ថកិច្ចកំពុងអន្ទងហៅអតីតអធិការរងរូបនេះមកវិញ ដើម្បីឲ្យគាត់មកទទួលខុសត្រូវចំពោះករណីផ្ទុះអាវុធអនាធិបតេយ្យធ្វើឲ្យមានការភ្ញាក់ផ្អើលនេះ និងចំថ្ងៃសែនចិនផង ។
ក្រោយការសាកសួរ មន្ត្រីយោធាគឺលោក ជា ចិន្តា បានត្រូវកងរាជអាវុធហត្ថខណ្ឌ៧មករា បញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីបន្តនីតិវិធី ចំណែកនាយរងប៉ុស្តិ៍នគរបាលអូរឫស្សី
៣ដែលជាម្ចាស់អាវុធ ក៏ត្រូវបានថ្នាក់លើឲ្យធ្វើរបាយការណ៍ភ្លាមៗដែរ ព្រោះជាការធ្វេសប្រហែសបណ្តោយឲ្យអ្នកដទៃឆក់យកកាំភ្លើងពីខ្លួនមកបាញ់បោះ ។
ចែករំលែកព័តមាននេះ