រាជធានីភ្នំពេញ ៖ បុរសអ្នកបើកឡាំប្រឺតាឥណ្ឌាម្នាក់ បំពាក់ដោយប្រព័ន្ធ PassApp ត្រូវបាននគរបាលក្រសួងមហាផ្ទៃឃាត់ខ្លួន ដោយជាប់ចោទពីបទទម្លាយរូបថតអាក្រាតកាយ និងគំរាមកំហែងថា នឹងសម្លាប់ទៅលើស្ដ្រីម្នាក់ ខណៈពេលដែលធ្លាប់បានរួមរ័កគ្នាបានម្តងហើយញ៉ាមចង់ម្តងទៀត…
រាជធានីភ្នំពេញ ៖ បុរសអ្នកបើកឡាំប្រឺតាឥណ្ឌាម្នាក់ បំពាក់ដោយប្រព័ន្ធ PassApp ត្រូវបាននគរបាលក្រសួងមហាផ្ទៃឃាត់ខ្លួន ដោយជាប់ចោទពីបទទម្លាយរូបថតអាក្រាតកាយ និងគំរាមកំហែងថា នឹងសម្លាប់ទៅលើស្ដ្រីម្នាក់ ខណៈពេលដែលធ្លាប់បានរួមរ័កគ្នាបានម្តងហើយញ៉ាមចង់ម្តងទៀត តែត្រូវស្ត្រីបដិសេធ ។ នេះបើតាមរបាយការណ៍របស់នាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ ដែលបានបង្ហោះកាលពីថ្ងៃទី៥ កុម្ភៈ ។
តាមរបាយការណ៍បានឱ្យដឹងថា ដោយទទួលបានពាក្យបណ្តឹង និងទទួលបានការសម្របសម្រួលនីតិវិធីពីលោក រៀល សុភិន ព្រះរាជអាជ្ញារង អមសាលាដំបូងរាជធានី នាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនជនសង្ស័យអាយុ២៩ឆ្នាំ នៅថ្ងៃទី៣០ មករា ទាក់ទងនឹងការគំរាមកំហែងថា នឹងសម្លាប់នារីម្នាក់ ក្រោយពីណាត់នារីនោះមករួមរ័ក មិនបានសម្រេច ។
បើតាមនារីរងគ្រោះបានអះអាងថា ខ្លួនបានស្គាល់ជនសង្ស័យ តាមរយៈការហៅ PassApp ជិះជាញឹកញាប់ ហើយក៏ត្រូវបានបុរសរូបនោះលួងលោម ក្នុងន័យបោកមនោសញ្ចេតនា រហូតក្លាយជាស្នេហានិងឈានទៅបានរួមរ័កគ្នា ហើយជននេះបានលួចថតរូបអាក្រាតរបស់នាង ។ បន្ទាប់មក ជននេះក៏បានទាក់ទងនាងឲ្យមករួមភេទទៀត តែនាងបានបដិសេធ ពេលនោះជនសង្ស័យក៏បានផ្ញើរូបអាក្រាតឲ្យនាងមើល និងគំរាមថា នឹងសម្លាប់ចោល បើសិនជាបានជួបមុខម្តងទៀត ។
ជនសង្ស័យត្រូវបានឃុំខ្លួន ក្រោមបទគំរាមកំហែងថានឹងសម្លាប់ និងគំរាមកំហែងហែកកេរ្តិ៍ ។ នាយកដ្ឋានប្រឆាំងបទល្មើសបច្ចេកវិទ្យា បានហៅករណីនេះថា ជាសារមួយសម្រាប់អប់រំដល់ពលរដ្ឋផ្សេងទៀតឲ្យបានដឹងថា សម័យបច្ចេកវិទ្យា កំពុងតម្រូវឲ្យយើងមានការពិចារណាខ្ពស់ កុំជឿលើការលួងលោមរបស់ជនខិលខូចមួយចំនួន ដែលអាចបណ្ដាលឲ្យយើងរងគ្រោះ ដូចជាការធ្លាក់ខ្លួនក្នុងអន្ទាក់ខាងលើ ដែលជននេះបានលួចថតពេលមានឱកាសរួមរ័កគ្នា គឺពិតជាមានចេតនាដើម្បីទុកគំរាមធ្វើជាចំណាប់ខ្មាំង៕
ចែករំលែកព័តមាននេះ