ខេត្តព្រះសីហនុ ៖ កងរាជអាវុធហត្ថស្រុកកំពង់សិលា សហការជាមួយកម្លាំងអាវុធហត្ថស្នាក់ការ៤១២ប្រចាំការផ្លូវជាតិលេខ៤ បានចាប់ឃាត់ខ្លួនស្ត្រីចំណាស់ម្នាក់និងបុរសម្នាក់ ដែលត្រូវជាម្តាយក្មេកនិងបងថ្លៃរបស់លោកមេធាវី អ៊ូ ប៊ុនរ៉ា និងក្មួយម្នាក់ នាំយកមកសាកសួរពីករណីជាប់ចោទចាប់បង្ខាំងបុរសចំណាស់ម្នាក់ ដែលត្រូវជាឪពុកបង្កើតរបស់លោកស្រី កែវ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ ់អស់រយៈពេលជិត៣០នាទី ។
នារសៀលថ្ងៃទី៥ ខែកុម្ភៈ មនុស្សទាំង៣នាក់នេះ ត្រូវបានបញ្ជូនយកមកសាកសួរនៅមូលដ្ឋានកងរាជអាវុធហត្ថស្រុកកំពង់សិលា ។ លោក ប៉ែន កុសល ជំទប់ទី១ឃុំស្ទឹងឆាយ បានឱ្យដឹងនារសៀលថ្ងៃទី៥ ខែកុម្ភៈថា កាលពីព្រឹកថ្ងៃទី៤ ខែកុម្ភៈ លោក ប៊ុន យុទ្ធា អាយុ៦៤ឆ្នាំ មានទីលំនៅក្នុងភូមិស្ទឹងឆាយខាងត្បូង ឃុំស្ទឹងឆាយ ស្រុកកំពង់សិលា ដែលជាឪពុកលោកស្រីព្រះរាជអាជ្ញារង កែវ សុគន្ធា បានទូរស័ព្ទមកថា ពេលលោកជិះម៉ូតូទៅមើលដីក៏មានមនុស្សស្រីម្នាក់និងបុរស២នាក់ឃាត់លោកចុះពីម៉ូតូរួចចាប់បង្ខាំងមិនឲ្យទៅណា និងដកយកកូនសោម៉ូតូទុកនៅតាមដងផ្លូវលំ ក្នុងភូមិឆាយខាងជើង ឃុំស្ទឹងឆាយ ស្រុកកំពង់សិលា ។
ក្រោយពីបានទទួលព័ត៌មាននេះ លោកបានឲ្យនាយប៉ុស្តិ៍នគរបាលឃុំស្ទឹងឆាយ ចុះទៅកន្លែងកើតហេតុ
ភ្លាមៗដើម្បីជួយរំដោះជនរងគ្រោះ ។ ដោយឡែក ប្រភពពីកងរាជអាវុធហត្ថស្រុកកំពង់សិលាបានបន្ថែមថា ដោយទទួលបានការអនុញ្ញាតពីលោក សៀង សុខ ព្រះរាជអាជ្ញាអមសាលាដំបូងខេត្ត កម្លាំងកងរាជអាវុធស្រុកកំពង់សិលា និងកម្លាំងស្នាក់ការសន្តិសុខ៤០២ចំនួន១០នាក់ ដឹកនាំដោយលោកវរសេនីយ៍ត្រី
សំ សាមាន មេបញ្ជាការកងរាជអាវុធហត្ថស្រុក បានឃាត់ខ្លួនមនុស្ស៣នាក់នៅនឹងផ្ទះ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សិលា នាវេលាម៉ោងជិត១០ព្រឹកថ្ងៃទី៤ ខែកុម្ភៈ ។
មនុស្ស៣នាក់ដែលត្រូវបានឃាត់ខ្លួនសាកសួរនេះមាន ១-ឈ្មោះ សំ សុខុន ភេទស្រី អាយុ៥៨ឆ្នាំ ជាម្តាយ ២-ឈ្មោះ រ៉ាន ដាលុច ភេទប្រុស អាយុ៣៦ឆ្នាំ ជាកូន និង៣-ឈ្មោះ ពុធ ធនូ ភេទប្រុស អាយុ២៧ឆ្នាំ ជាក្មួយ ។
ទាក់ទិននឹងករណីខាងលើនេះ អ្នកច្បាប់មួយរូបនិយាយថា សកម្មភាពនេះ គឺជាបទល្មើសបង្ខាំងមនុស្សដោយខុសច្បាប់ ដែលមានចែងនិងផ្តន្ទាទោសតាមមាត្រា២៥៣នៃក្រមព្រហ្មទណ្ឌដែលចែងថា«បុគ្គលដែលចាប់ដែលឃុំឃាំង ឬដែលបង្ខាំងបុគ្គលផ្សេងទៀត ដោយគ្មានបញ្ជាពីអាជ្ញាធរស្របច្បាប់ ឬក្រៅពីករណីដែលច្បាប់អនុញ្ញាត ត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ បើការចាប់ការឃុំឃាំងឬបង្ខាំងខ្លួនមានរយៈពេលតិចជាង៤៨ម៉ោង…» ។
ទាក់ទិននឹងការឈានទៅឃាត់ខ្លួននេះ ត្រូវបានប្រភពព័ត៌មានបន្លុយឱ្យដឹងថា ភាគីទាំង២មានទំនាស់គ្នាពីរឿងដីធ្លីជាច្រើនលើកច្រើនសាមកហើយ ៕
ចែករំលែកព័តមាននេះ