រាជធានីភ្នំពេញ៖ លោកស្រេង វុធថា ជាតារាសម្តែងទើបតែមានឈ្មោះបោះសំឡេងក្នុងពិភពសិល្បៈសម្តែងប្រមាណជាង១ឆ្នាំនេះ ។ ទម្រាំក្លាយជាតួសម្តែងល្បីឈ្មោះលោកប្រឈមនឹងការប្រកាន់បក្សពួករវាងអ្នកនៅក្នុងអាជីពជាមួយគ្នា ។
បើទោះជាជួបបញ្ហាបែបនោះក្តីមិនបានធ្វើឲ្យលោកស្រេង វុធថា បោះបង់សិល្បៈទេនៅតែជម្នះរហូតមានថ្ងៃភ្លឺស្វាងដូចបច្ចុប្បន្ននេះ ។
លោកស្រេង វុធថា បានឱកាសចូលរួមសម្តែងច្រើនរឿងមកហើយ បើទោះជាពេលនេះលោកនៅមិនទាន់ឈានដល់កម្រិតលេចធ្លោខ្លាំងក៏ដោយ ។ ពេលនេះលោកសប្បាយចិត្តដោយអាជីពសម្តែងរបស់លោកមិនពិបាកពឹង ឬសុំទាក់ទងគេថតទៀត ខុសពីដំណាក់កាលដំបូងៗ។ មានរឿងភាគជាច្រើនដែលបានដាក់បញ្ចាំងនៅលើកញ្ចក់ទូរទស្សន៍លើកស្ទួយឲ្យតារាប្រុសម្នាក់នេះកាន់តែអណ្តែតឡើងនៅក្នុងពិភពសិល្បៈ។
ជាពេទ្យសត្វបញ្ចប់ការសិក្សានៅសាលាកសិកម្ម តែលោកស្រេង វុធថា បែរជាងាកចូលពិភពសិល្បៈតាមនិស្ស័យស្រលាញ់ចូលចិត្តរបស់ខ្លួន ។ លោកវុធថាដែលមានទឹកមុខស្រស់ថ្លា រាងសង្ហាបានឲ្យអ្នកសារព័ត៌មានកោះសន្តិភាពដឹងតាមសារអេឡិចត្រូនិកកាលពីពេល ថ្មីៗកន្លងមកថារយៈពេលជាង៤ឆ្នាំមកហើយដែលលោកបានចាប់អាជីពសិល្បៈជាអាជីពពោរពេញដោយការប្រកួតប្រជែងនេះ ។
តារាសម្តែងស្រេង វុធថា និយាយថា«ប្រឡូកតួនាទីសិល្បៈនេះកាន់តែយល់ច្រើន ហើយគិតថាមានរឿង ចម្លែកៗកើតឡើងខុសពីមុនក្លាយជាតារាពេលឃើញគេល្បីចេះតែចង់ចូលគិតថាស្រួល តែសភាពពិតស្រឡាញ់សិល្បៈត្រូវហ៊ានលះបង់។ ផលលំបាកគឺបើក្រឡេកពីមុនខ្ញុំត្រូវតស៊ូរៀនសូត្រឲ្យយល់ពីការសម្តែងនៃចរិតតួអង្គ នីមួយៗតាមការចង់បានពីអ្នកដឹកនាំរឿង។ មួយទៀតខ្ញុំត្រូវធ្វើដំណើរឆ្ងាយៗទាំងតាមជាយក្រុង និងតាមខេត្ត ពេលខ្លះក៏ជិះម៉ូតូយ៉ាងល្វើយខ្លួន ពេលខ្លះគេចិត្តល្អក៏បានដោយសាររថយន្តអ្នកសិល្បៈដូចគ្នាទៅជាមួយ» ។
អ្នកឧត្តរមានជ័យរស់នៅស្រុកអន្លង់វែងលោកស្រេង វុធថា ពោលបន្តថា «កាលមិនទាន់មានគេស្គាល់រងនូវការឆ្មើងឆ្មៃពីតួដូចគ្នាហើយក៏ដូចការប្រកាន់បក្សពួកតួល្បីតួមិនទាន់ល្បីត្រូវគេមិនសូវមើលឃើញ ។
ករណីដូចជាធ្លាប់សម្តែងជាមួយតារាស្រីម្នាក់ស្រាប់តែចូលដល់ប្លង់ថតជាមួយគ្នាហើយខ្លាចខុសសុំគេសមមុនដើម្បីដឹងចិត្តដឹងក្រឡាសម្តែង ។ គេថាមិនបាច់សមទេចូលឆាកយកតែម្តង គេចេះ និងយល់ពីបំណងចង់បានហើយ ។ សូម្បីតែប៉ះដៃប៉ះជើងគ្នាកំពុងថតក៏មិនចង់បានផង សម្តែងហើយគេដើរចេញទៅបាត់ ។ទោះយ៉ាងណាខ្ញុំមិនប្រកាន់នោះទេ ធ្វើម៉េចយើងមិនទាន់ល្បីមែនណាមួយនេះជារឿងធម្មតារបស់សិល្បៈ ។
អ្វីដែលសំខាន់ខ្ញុំមានការពេញចិត្តដែលនិស្ស័យចូលចិត្តសិល្បៈរបស់ខ្ញុំមានការបោះជំហានពង្រីកខ្លួនទៅមុខមិនដើរថយក្រោយចេះតែមានតម្រុយការងារចូលមកជាបន្តបន្ទាប់និយាយរួមពេញចិត្តចំពោះអ្វីដែលខ្លួនមានក្នុងពេលនេះ »។
រឿងភាគដែលលោកស្រេង វុធថា ចូលរួមសម្តែង និងកំពុងតែចាក់ផ្សាយលើទូរទស្សន៍មានរឿង«ទាយាទអសូរៈ»នៅប៉ុស្តិ៍លេខ៥ រឿង«គ្រូខ្មែរ»នៅប៉ុស្តិ៍បាយ័ន និងរឿង«នាងក្ងោក»បញ្ចាំងនៅប៉ុស្តិ៍ស៊ីធីអិន ។
លោកស្រេង វុធថា កំពុងត្រៀមថតរឿងដុំបញ្ចាំងតាមរោងដោយទើបតែចុះកិច្ចសន្យា។ លោកស្រេង វុធថា ជាអតីតហ្វ្រេសស៊ីប៊យចំណាត់ថ្នាក់លេខ៣ក្នុងឆ្នាំ២០១១ ។ លោកមានបងប្អូន៥នាក់ ក្នុងនោះប្រុស៤ ហើយលោកជាកូនទី២ ។
តារាសម្តែងស្រេង វុធថា មិនទាន់ចង់បាននារីណាម្នាក់ធ្វើជាគូគាប់ក្នុងពេលនេះ ដោយលោកចង់ទុកពេលខំធ្វើការសន្សំលុយកាក់ឲ្យបានច្រើនសិន ៕
ចែករំលែកព័តមាននេះ