រាជធានីភ្នំពេញ ៖ រថយន្តស៊េរីទំនើបមួយគ្រឿង សង្ស័យអ្នកបើកបរស្រវឹងបានបើកជ្រុលទៅបុកខឿនសួនច្បារពុះចែកផ្លូវ យ៉ាងពេញទំហឹង បណ្តាលអោយបែកកង់ ក្រឡាប់រថយន្តផ្ងារជើងមួយចំហៀង តែមិនមានគ្រោះថ្នាក់ដល់ដែលជិះនៅក្នុងរថយន្តឡើយ ។ ហេតុការណ៍នេះដែរបានកើតឡើងកាលពីវេលាម៉ោង១និង៣០នាទី រំលងអធ្រាត្រឈានចូលថ្ងៃទី៦ ខែកុម្ភៈ ឆ្នាំ២០១៩ ចំណុចគល់ស្ពានព្រះមុនីវង្សចាស់ ត្រើយខាងកើតផ្លូវជាតិលេខ១ សង្កាត់ច្បារអំពៅ២ ខណ្ឌច្បារអំពៅ ។
តាមប្រភពពីកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរស៣នាក់ ដែលគេស្គាល់ថា ជាកូនថៅឈើនៅច្បារអំពៅជិះក្នុងរថយន្តមួយគ្រឿងម៉ាកឡិចស៊ីស ៥៧០ ពណ៌ស ពាក់ស្លាកលេខ ភ្នំពេញ ២U- ០៧៧៧ ធ្វើដំណើរតាមផ្លូវជាតិលេខ១ ហើយបើកបររថយន្តក្នុងស្ថានភាពស្រវឹង ក្នុងល្បឿនលឿនដូចហោះ លុះមកដល់ចំណុចកើតហេតុខាងលើ ក៍ស្រាប់តែរថយន្តរេចង្កូតទៅខាងឆ្វេងដៃ ជ្រុលទៅបុកខឿនសួនច្បារពុះចែកផ្លូវយ៉ាងពេញទំហឹង បណ្តាលអោយរថយន្តបែកកង់ និងបាក់ រ៉ូទីលខាងឆ្វេង ធ្វើអោយរថយន្តក្រឡាប់ផ្ងារជើងមួយចំហៀង តែសំណាងមិនបង្កគ្រោះថ្នាក់ដល់មនុស្សដែលជិះក្នុងរថយន្តនោះឡើយ ។
ភ្លាមៗនោះដែរ អ្នកបើកបរដែលស្រវឹងជោកម្នាក់ត្រូវបានសមត្ថកិច្ចប៉ុស្តិ៍នគរបាលច្បារអំពៅ២ឃាត់ខ្លួន ដែរ តែការឃាត់ខ្លួននេះគឺមិនបាននាំអ្នកបើកបររថយន្តយកទៅប៉ុស្តិ៍នគរបាលនោះទេ គឺដឹកអ្នកបើកបររថយន្តយកទៅផ្ទះរបស់អ្នកបើកបររថយន្តតែម្តង ។
ក្រោយពេលកើតហេតុ រថយន្តម៉ាកឡិចស៊ីស ៥៧០ ខាងលើ ត្រូវបានសមត្ថកិច្ច អោយម្ចាស់ស្ទូចយកទៅជួសជុលដោយខ្លួនឯង ៕
ចែករំលែកព័តមាននេះ