រាជធានីភ្នំពេញ ៖ ព្រឹត្តិការណ៍ប្រកួតសមរភូមិអ្នកប្រយុទ្ធគុនខ្មែរអន្តរជាតិនៅលើសង្វៀនស៊ីអិុនស៊ីថ្ងៃសុក្រ ទី៨ កុម្ភៈ ខាងមុខនេះ កក្រើកសង្វៀនមិនខានឡើយ ព្រោះថាទាំងកីឡាករកម្ពុជា និងកីឡាករថៃសុទ្ធតែជាកំពូលអ្នកប្រដាល់ជើងខ្លាំងដូចគ្នា។ តាមការអះអាងរបស់គណៈកម្មការរៀបចំការប្រកួត…
រាជធានីភ្នំពេញ ៖ ព្រឹត្តិការណ៍ប្រកួតសមរភូមិអ្នកប្រយុទ្ធគុនខ្មែរអន្តរជាតិនៅលើសង្វៀនស៊ីអិុនស៊ីថ្ងៃសុក្រ ទី៨ កុម្ភៈ ខាងមុខនេះ កក្រើកសង្វៀនមិនខានឡើយ ព្រោះថាទាំងកីឡាករកម្ពុជា និងកីឡាករថៃសុទ្ធតែជាកំពូលអ្នកប្រដាល់ជើងខ្លាំងដូចគ្នា។
តាមការអះអាងរបស់គណៈកម្មការរៀបចំការប្រកួត កីឡាករជើងខ្លាំងចាស់វស្សាកម្ពុជាចំនួន២រូប ត្រូវបានគេរៀបចំឱ្យជួបប្រកួតជាមួយកីឡាករថៃ ដោយពួកគេទាំង២នាក់មិនធ្លាប់ជួបប្រកួតជាមួយគ្នាពីមុនមកឡើយ។ ហើយថែមទាំងមានបទពិសោធន៍ប្រកួតនៅលើសង្វៀនយ៉ាងជោកជាំទៀតផង។
ក្នុងនោះមានកីឡាករ ទេស ជីវ៉ា មកពីក្លិបកងពលតូចលេខ៧០ប្រកួតជាមួយកីឡាករថៃឈ្មោះ ភិតសង្ហា និធិតណាយក្វាម ក្នុងប្រភេទទម្ងន់៦៣,៥គីឡូក្រាម និងកីឡាករ មឿន សុខហ៊ុច មកពីក្លិបពុទ្ធសេរីវង្សពោធិ៍សែនជ័យ ប្រកួតជាមួយកីឡាករថៃឈ្មោះ ចៅ ប៊យ ស.សុផាត គូនេះប្រកួតគ្នាក្នុងប្រភេទទម្ងន់៦៥គីឡូក្រាម។
កីឡាករ ទេស ជីវ៉ា ជាអ្នកប្រដាល់ជើងចាស់មួយរូប ដែលមានបទពិសោធន៍ពេញខ្លួន មានឈ្មោះបោះសំឡេងជាច្រើនឆ្នាំមកហើយ គ្រាន់តែមួយរយៈមកនេះគេមិនសូវលេចមុខនៅលើសង្វៀនញឹកញាប់ប៉ុណ្ណោះ។ ហើយអ្វីដែលធ្វើឱ្យអ្នកតាមដានការប្រកួតចាំមិនភ្លេចនោះ គឺជំនាញខាងប្រើស្នៀតកែង និងជង្គង់តែម្ដង រាល់ពេលវាយចេញម្ដងៗតែងតែធ្វើឱ្យគូប្រកួតញាក់សាច់គ្រប់គ្នា។
មិនតែប៉ុណ្ណោះ ទេស ជីវ៉ា ស្នៀតកណ្ដាប់ដៃរបស់គេរឹតតែមិនអន់ថែមទៀត ប៉ុន្តែលើកនេះដៃគូរបស់គេក៏ជាអ្នកប្រដាល់ជើងខ្លាំងម្នាក់ដែរ ព្រោះតាមការឱ្យដឹងពីមន្ត្រីគណៈកម្មការរៀបចំការប្រកួតកីឡាករថៃម្នាក់នេះ ធ្លាប់ធ្វើព្យុះធ្វើភ្លៀងនៅស្រុកថៃជាច្រើនឆ្នាំមកហើយ។ ចំពោះការមកប៉ះជាមួយ ទេស ជីវ៉ា លើកនេះ នៅមិនទាន់ដឹងថា យ៉ាងណានោះទេ? ព្រោះថាគេជាអ្នកប្រដាល់គុនថៃដែលមានល្បិចប្រយុទ្ធយ៉ាងសម្បូរបែប ទាំងស្នៀតកែង និងជង្គង់សុទ្ធតែអាចប្រើការបានយ៉ាងស្ទាត់ជំនាញដូចគ្នា។
រីឯការជួបប្រកួតគ្នារវាងកីឡាករ មឿន សុខហ៊ុច ជាមួយកីឡាករថៃ ចៅប៊យ វិញនោះ រិទ្ធតែពិសេសថែមទៀត។ កីឡាករថៃម្នាក់នេះធ្លាប់មកស្រុកខ្មែរច្រើនលើករួចមកហើយ ហើយថែមទាំងធ្លាប់វាយផ្ដួលអ្នកប្រដាល់ជើងខ្លាំងខ្មែរឱ្យចាញ់នៅក្រោមកណ្ដាប់ដៃរបស់គេមិនតិចនាក់រួចមកហើយដែរ ប៉ុន្តែការមកប៉ះកីឡាករចាស់វស្សាដែលចូលចិត្តប្រើកម្លាំងបាយ មឿន សុខហ៊ុច លើកនេះ ធ្វើឱ្យអ្នកតាមដានការប្រកួតរឹតតែចង់ដឹងថែមទៀតថា ការជួបគ្នារវាងគូនេះ អ្នកណាជាអ្នកខ្លាំងពិប្រាកដ ប៉ុន្តែកុំមើលស្រាល មឿន សុខហ៊ុចឱ្យសោះ បើទោះជាគេមិនសូវមានក្បាច់ប្រយុទ្ធច្បាស់លាស់មែន តែកុំបណ្ដោយឱ្យគេវាយត្រូវឱ្យសោះ ព្រោះថា កណ្ដាប់ដៃរបស់គេវាយចេញម្ដងៗធ្ងន់គ្រាន់បើ។
រីឯគូប្រកួតមិត្តភាពធម្មតាវិញនោះ កីឡាករ ឡូញ វ៉ាន់ឌី មកពីក្លិបពន្លឺវិបុលដារិទ្ធពោធិ៍សែនជ័យ ប្រកួតជាមួយ សូត្រ ខេវិន មកពីក្លិបបក្សីស្លាបដែក។ សុខ វីវ៉ា មកពីក្លិបសំរោងកោងកីឡាខេត្តបាត់ដំបង ប្រកួតជាមួយ ឡុង ណងសាវ មកពីក្លិបសាលវ័ន្តកីឡា និងគូប្រកួតចុងក្រោយ ពេជ្រ អេលី មកពីក្លិបកងពលតូចលេខ១៥៧ ប្រកួតជាមួយ ហ៊ុយ សុខគង់ មកពីក្លិបគីសែមានរិទ្ធ៕
ចែករំលែកព័តមាននេះ