ខេត្តស្វាយរៀង ៖ ស្ត្រីម្នាក់បានស្លាប់ក្រោយពេលសម្រាលកូនរួចនៅមណ្ឌលសុខភាព ដោយក្រុមគ្រួសារចោទប្រកាន់ថា ដោយការធ្វេសប្រហែស។ ករណីស្ត្រីឆ្លងទន្លេរួចស្លាប់នេះបានកើតឡើងនៅមណ្ឌលសុខភាពមេសថ្ងក ស្ថិតនៅភូមិពោធិ៍ឃុំមេ.សថ្ងក ស្រុកចន្ទ្រា កាលពីម៉ោង៤រសៀល ថ្ងៃទី៤…
ខេត្តស្វាយរៀង ៖ ស្ត្រីម្នាក់បានស្លាប់ក្រោយពេលសម្រាលកូនរួចនៅមណ្ឌលសុខភាព ដោយក្រុមគ្រួសារចោទប្រកាន់ថា ដោយការធ្វេសប្រហែស។ ករណីស្ត្រីឆ្លងទន្លេរួចស្លាប់នេះបានកើតឡើងនៅមណ្ឌលសុខភាពមេសថ្ងក ស្ថិតនៅភូមិពោធិ៍ឃុំមេ.សថ្ងក ស្រុកចន្ទ្រា កាលពីម៉ោង៤រសៀល ថ្ងៃទី៤ ខែកុម្ភៈ ឆ្នាំ២០១៩ នេះបើតាមការអះអាងរបស់ក្រុមគ្រួសារជនរងគ្រោះ។
ប្រភពដដែលពីក្រុមគ្រួសារជនរងគ្រោះបញ្ជាក់ថា ប្អូនស្រីរបស់គាត់ឈ្មោះ ប្រាក់ សូដា បានឈឺពោះសម្រាលកូនតាំងតែពីម៉ោងប្រហែល២រសៀល ហើយកូនសម្រាលមកមានសុខភាពល្អប្រសើរណាស់ ប៉ុន្តែដោយគ្រូពេទ្យមិនដឹងថា មានជំនាញច្បាស់លាស់ឬយ៉ាងណានោះទេបន្ទាប់ពីទម្លាក់សុកធ្វើឲ្យប្អូនស្រីរបស់គាត់មានអការៈធ្លាក់លោហិតយ៉ាងច្រើន ហើយចេះតែខ្សោយទៅៗ រហូតដល់ម៉ោងប្រហែល៤រសៀលទើបបញ្ជូនបន្តទៅមន្ទីពេទ្យបង្អែកជីភូ តែជាអកុសលទៅដល់មន្ទីរពេទ្យភ្លាម ក៏ស្លាប់បាត់បង់ជីវិតចោលបុត្រា និងក្រុមគ្រួសារស្វាមីបងប្អូនទាំងវ័យក្មេងខ្ចីបែបនេះ។
ប្រភពខាងលើបន្តទៀតថា នៅមិនទាន់ដឹងមូលហេតុច្បាស់លាស់យ៉ាងណានោះទេ ប៉ុន្តែតាមដឹងមណ្ឌលសុខភាពមេសរថ្ងក ស្រុកចន្ទ្រានេះ ធ្លាប់មានប្រជាពលរដ្ឋរិះគន់ច្រើនដង ហើយ ចំពោះអាកប្បកិរិយានៃអ្នកគ្រូពេទ្យដែលមិនសមរម្យក្នុងការជួយសង្គ្រោះ ជាពិសេសប្រើសំដីអសុរោះជាច្រើនផងទៅលើអ្នកជំងឺ ខ្លះមិនហ៊ាននិយាយទេ ព្រោះមិនដឹងថា ទៅពឹងពាក់ខាងណាជួយអន្តរាគមន៍។
ក្នុងនោះដែរ គ្រួសារជនរងគ្រោះបានសំណូមសូមលោកប្រធានមន្ទីរសុខាភិបាលខេត្តស្វាយរៀង មេត្តាជួយសម្រួលចាត់មន្ត្រីចុះមកអន្តរាគមន៍ស្រាវជ្រាវចំពោះបញ្ហានេះផង ដោយហេតុថា ជីវិតជនរងគ្រោះស្លាប់ហើយមិនអាចរស់វិញបានទេ ហើយនេះជាការសោកសង្វេគដ៏ធំធេងដែលមិនអាចកាត់ថ្លៃបានឡើយ ហើយសូមកុំឲ្យបញ្ហានេះកើតឡើងចំពោះបងប្អូនប្រជាពលរដ្ឋដែលមានផ្ទៃពោះក្រោយៗទៀត។ សពប្អូនស្រី ប្រាក់ សូដា ត្រូវក្រុមគ្រួសាររៀបចំពិធីបុណ្យតាមប្រពៃណីនៅគេហដ្ឋានប្អូនស្រី ស្ថិតនៅភូមិថ្នល់កែងសង្កាត់បាទី ក្រុងបាវិត។
ពាក់ព័ន្ធករណីខាងលើនេះដែរ លោក កែ រដ្ឋា ប្រធានមន្ទីរសុខាភិបាលខេត្តស្វាយរៀងបានប្រាប់ក្រុមអ្នកសារព័ត៌មានតាមទូរស័ព្ទនៅព្រឹកថ្ងៃទី៥ ខែកុម្ភៈ ឆ្នាំ២០១៩នេះថា ពិតជាមានករណីសម្រាលកូនរួចស្លាប់ ប៉ុន្តែការស្លាប់នេះលោកពុំទាន់ដឹងថា បណ្តាលមកពីគ្រូពេទ្យ ឬពីអ្នកជំងឺនោះទេ ហើយលោកកំពុងចាត់ឱ្យប្រធានអូឌី មន្ត្រីជំនាញចុះធ្វើការស្រាវជ្រាវករណីនេះហើយ។
លោកបានបន្តទៀតថា ចំពោះការរិះគន់ថា មណ្ឌលសុខភាព មេសថ្ងក នេះ ធ្លាប់មានប្រជាពលរដ្ឋរិះគន់ជាច្រើនដងហើយ ចំពោះអាកប្បកិរិយានៃអ្នកគ្រូពេទ្យដែលមិនសមរម្យក្នុងការជួយសង្គ្រោះ ជាពិសេសប្រើសំដីអសុរោះជាច្រើនផងទៅលើអ្នកជម្ងឺ ខ្លះមិនហ៊ាននិយាយទេ ព្រោះមិនដឹងថា ទៅពឹងពាក់ខាងណាជួយអន្តរាគមន៍នោះទេ លោកមិនដឹងថា ការលើកឡើងចំពោះគ្រូពេទ្យមួយណានោះទេ។ ហើយបើមានករណីចឹងមែននោះ លោកចាត់វិធានការណ៍ចំពោះអ្នកនោះភ្លាម។
មហាជនក៏បានរិះគន់ថា នៅតាមមណ្ឌលសុខភាពនៅជនបទតែងតែមានករណីសម្រាលកូនហើយបណ្តាលឲ្យម្តាយស្លាប់ជាញឹកញាប់គួរឲ្យព្រួយបារម្ភ សូមឲ្យមន្ទីរសុខាភិបាលមេត្តាពង្រឹងមន្ត្រីពេទ្យឆ្មបនៅតាមមណ្ឌលសុខភាព ឲ្យបានកាន់តែល្អប្រសើរ ហើយគួរតែមានវេជ្ជបណ្ឌិតទៅប្រចាំការគ្រប់មណ្ឌលសុខភាព៕
ចែករំលែកព័តមាននេះ