អ្នកដែលមានអាជីវកម្មលើហ្វេសប៊ុកប្រហែលជាចង់ស្វែងរកវិធីក្នុងការបង្កើនការ Like និង Share ព្រមទាំងទទួលបានអតិថិជនកាន់តែច្រើនពីការ Post លើប្រព័ន្ធសង្គមរបស់ពួកគេហើយ ប៉ុន្តែវាមិនមែនជារឿងងាយស្រួលទេ ។
Page ហ្វេសប៊ុកដែលមានគោលបំណងខុសៗគ្នាអាចត្រូវដើរតាមផ្លូវខុសៗគ្នាផងដែរដើម្បីមានភាពជោគជ័យ។ ខាងក្រោមគឺគន្លឹះទាំង៤ដែលអ្នកកាន់ Page ហ្វេសប៊ុកទូទៅអាចធ្វើបានដើម្បីបង្កើនប្រជាប្រិយភាព និងទាក់ទាញអតិថិជនបានកាន់តែច្រើន៖
១. ប្រើ Targeted Likes
ការ Like លើ Page ហ្វេសប៊ុកមិនមានតម្លៃច្រើនដូចពីមុនឡើយ ព្រោះពេលនេះអ្នកប្រើប្រាស់អាចមើលឃើញអ្វីដែល Page ណាមួយ Post បានដោយមិនចាំបាច់ចុច Like លើ Page នោះ ។
ប៉ុន្តែការទទួលបានការ Like ពីអតិថិជន ឬអ្នកដែលមានចំណាប់អារម្មណ៍លើ Page របស់អ្នកជារឿងសំខាន់មួយព្រោះកង្វះសកម្មភាពលើ Page អាចប៉ះពាល់ដល់រូបភាពរបស់ Page អ្នកបាន ។
ព្យាយាមជ្រើសរើសក្រុមមនុស្សដែលអាចនឹង Like Page របស់អ្នកដោយកំណត់ចំណាប់អារម្មណ៍ និងទីតាំងដែលអ្នកចង់ផ្តោតសំខាន់លើ។ ឧទាហរណ៍ប្រសិនបើអ្នកមានហាងនៅតំបន់ណាមួយ នោះអ្នកអាចផ្តោតសំខាន់លើអ្នកប្រើហ្វេសប៊ុកដែលមានលំនៅដ្ឋានជិតនោះបានដើម្បីទាក់ទាញឲ្យពួកគេចូលមកមើល។
២. ប្រើរូបភាពស្អាតៗ
Profile និង Cover Photo របស់ Page អ្នកគឺពិតជាសំខាន់ណាស់ ហើយអ្នកមិនចាំបាច់ចំណាយថវិកាច្រើនដើម្បីទទួលបានរូបភាពដែលល្អទេ ។
អ្នកគួរតែប្រើ Logo ហាងរបស់អ្នកជា Profile Picture ហើយអ្នកមិនគួរដាក់អក្សរ លេខទូរស័ព្ទ ឬគេហទំព័រណាមួយលើរូបភាពនោះទេ ។
អ្នកគួរតែផ្លាស់ប្តូររូបភាពម្តងម្កាលដែរដូចជាម្តង ឬពីរដងក្នុងមួយឆ្នាំ ។ ការផ្លាស់ប្តូររូបភាពញឺកញាប់ពេកអាចនឹងបង្កឲ្យអតិថិជនច្រលំ ឬមិនស្គាល់យីហោរបស់អ្នក ។
៣. ដកបទពិសោធន៍ពីការ Post
អ្នកជំនាញមួយចំនួននិយាយថាអ្នកគួរតែ Post ម្តងក្នុងមួយថ្ងៃបានហើយ ប៉ុន្តែអ្នកមួយចំនួនទៀតនិយាយថា១០ Post នៅមិនទាន់គ្រប់គ្រាន់ផង ។ ប៉ុន្តែវាគឺខុសគ្នាទៅតាមអាជីវកម្មនិងអតិថិជនរបស់អ្នកទេ ។ ដូច្នេះអ្នកគួរតែសាកល្បងដោយខ្លួនឯងថាតើ Page របស់អ្នកនឹងទទួលបានការឆ្លើយតបបានច្រើនឬតិចពេលដែលអ្នក Post ច្រើនដងក្នុងមួយថ្ងៃ ។
៤. ប្រើការផ្សាយពាណិជ្ជកម្ម
គោលដៅនៃការដំណើរការ Page លើហ្វេសប៊ុកគឺដើម្បីផ្សព្វផ្សាយអាជីវកម្ម ឬទាក់ទាញអតិថិជនបន្ថែម ប៉ុន្តែមនុស្សជាច្រើនមិនចូលចិត្តចំណាយថវិកាលើការផ្សាយពាណិជ្ជកម្ម ។
អ្នកគួរដឹងថា Page របស់អ្នកមិនអាចដំណើរការទៅមុខបានឡើយប្រសិនបើអ្នកមិនចំណាយថវិកាលើការផ្សាយពាណិជ្ជកម្ម ។ អ្វីដែលល្អលើហ្វេសប៊ុកគឺអ្នកអាចជ្រើសរើសក្រុមមនុស្សយោងតាមចំណាប់អារម្មណ៍របស់ពួកគេបានយ៉ាងងាយស្រួល ។ អ្នកអាចចាប់ផ្តើមដោយចំណាយប្រមាណ ៥០ដុល្លារក្នុងមួយខែលើ Page របស់អ្នកជាដើម ៕
ចែករំលែកព័តមាននេះ