ប្រទេសថៃ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃចន្ទ កន្លងមកថា ការវិនិយោគក្នុងប្រទេសថៃអាចនឹងកើនឡើង១០% ក្នុងឆ្នាំ ២០២០ ដោយមានការជំរុញភាគច្រើនពីច្រករបៀងសេដ្ឋកិច្ចខាងកើត (EEC) ។
លោក Kanit Sangsubhan ដែលជាអគ្គលេខាធិការនៅការិយាល័យ EEC បាននិយាយថា ការវិនិយោគក្នុងច្រករបៀងនេះនឹងកាន់តែរីកចម្រើនក្នុងឆ្នាំ ២០២០ និងខ្ពស់ជាងការគិតទុករបស់ភ្នាក់ងាររដ្ឋផ្សេងៗផងដែរ ។
ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិបានព្យាករណ៍មកថា ការវិនិយោគក្នុងប្រទេសអាចនឹងកើនឡើងបាន៥.១% ក្នុងឆ្នាំនេះ ច្រើនជាងការព្យាករណ៍របស់ធនាគារជាតិរបស់ប្រទេសថៃដែលស្មើតែ ៤.៥%ប៉ុណ្ណោះ ។
លោក Kanit បានបន្ថែមថា ការលូតលាស់ការវិនិយោគក្នុងឆ្នាំ ២០២០ នឹងភាគច្រើនមកពីគម្រោងហេដ្ឋារចនាសម្ព័ន្ធធំៗចំនួន ៥ ដែលនឹងចាប់ផ្តើមដំណើរការក្នុងពាក់កណ្តាលឆ្នាំនេះ ។
គម្រោងទាំង៥រួមមានខ្សែរថភ្លើងដែលតភ្ជាប់អាកាសយានដ្ឋានបី ទីក្រុងអាកាស U-taopao មជ្ឈមណ្ឌលជួសជុល កំពង់ផែសមុទ្រ Laem Chabang ដំណាក់កាលទីបី និងកំពង់ផែសមុត្រ Map Ta Phut ដំណាក់កាលទីបីផងដែរ ។
លោកបានបន្តថា គម្រោងទាំង៥ក្នុង EEC នឹងដំណើរការទៅមុខដូចដែលបានគ្រោងទុក និងបានបន្ថែមថាគម្រោង EEC ពិតជាសំខាន់ណាស់សម្រាប់ជំរុញដល់ការលូតលាស់សេដ្ឋកិច្ចក្នុងឆ្នាំ ២០១៩ នេះ ហើយនឹងជួយកាត់បន្ថយឥទ្ធិពលអវិជ្ជមានដែលបង្កឡើងដោយសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិនផងដែរ ។
វិនិយោគិនជាច្រើនដែលមកពីជប៉ុន ចិននិងសហភាពអ៊ឺរ៉ុបមានចំណាប់អារម្មណ៍លើការបង្កើនការវិនិយោគក្នុង EEC ដោយមានក្រុមហ៊ុនបារាំងចំនួន ២៤ហើយដែលបានធ្វើដំណើរទៅកាន់តំបន់ដើម្បីមើលគម្រោងអភិវឌ្ឍន៍ EEC និងការវិនិយោគក្នុងទីក្រុងបៃតង វិស័យការពារ និងការអភិវឌ្ឍន៍ធនធានមនុស្សជាដើម ។
លោក Kanit បានធានាដល់វិនិយោគិនជប៉ុនថា EEC នឹងបន្តដំណើរការទៅមុខទៀតបន្ទាប់ពីការបោះឆ្នោតនៅថ្ងៃទី ២៤ខែមិនាខាងមុខនេះព្រោះការអភិវឌ្ឍន៍ច្រករបៀងសេដ្ឋកិច្ចនេះត្រូវបានចងជាប់ក្នុងច្បាប់ EEC ៕
ចែករំលែកព័តមាននេះ