ប្រទេសអេហ្ស៊ីប ៖ ការធ្វើវិសោធនកម្មជាច្រើនលើរដ្ឋធម្មនុញ្ញ ដែលដាក់ដោយបណ្ដាសមាជិកសភាអេហ្ស៊ីប នឹងអាចឲ្យប្រធានាធិបតី លោកABDEL FATTAH AL SISSI រក្សាអំណាចក្នុងរយៈពេល១២ឆ្នាំទៀត…
ប្រទេសអេហ្ស៊ីប ៖ ការធ្វើវិសោធនកម្មជាច្រើនលើរដ្ឋធម្មនុញ្ញ ដែលដាក់ដោយបណ្ដាសមាជិកសភាអេហ្ស៊ីប នឹងអាចឲ្យប្រធានាធិបតី លោកABDEL FATTAH AL SISSI រក្សាអំណាចក្នុងរយៈពេល១២ឆ្នាំទៀត ក្រោយអាណត្តិបច្ចុប្បន្នដែលចប់ក្នុងឆ្នាំ២០២២ ដោយពង្រឹងការត្រួតត្រារបស់លោកលើក្បានម៉ាស៊ីនតុលាការ។
ការធ្វើវិសោធនកម្មនានា ដែលដាក់កាលពីយប់ថ្ងៃទី៣កុម្ភៈ ដោយប្រធានសភាត្រូវអនុម័តក្នុងសភាក្នុងសំឡេង២ភាគ៣ មុនពេលដាក់ឲ្យប្រជាជនបោះប្រជាមតិ ដើម្បីដាក់ឲ្យប្រើ។
ជាអតីតប្រមុខយោធា លោកAL SISSI បានឡើងជំនួសប្រធានាធិបតីជាប់ឆ្នោតតាមរយៈការបោះឆ្នោតប្រជាធិបតេយ្យ លោកMOHAMMED MORSI មានប្រភពពីក្រុមបងប្អូនអ៊ិស្លាមកាលពីឆ្នាំ២០១៣។ លោកAL SISSI ត្រូវជាប់ឆ្នោតកាន់អំណាចអាណត្តិដំបូងមានរយៈពេល៤ឆ្នាំនាឆ្នាំបន្ទាប់ ហើយជាប់ឆ្នោតអាណត្តិទី២ទៀត ដែលនឹងបញ្ចប់ក្នុងឆ្នាំ២០២២។ ការស្នើធ្វើវិសោធនកម្មដាក់កាលពីថ្ងៃទី៣កុម្ភៈ កែប្រែមាត្រាទី១៤០នៃរដ្ឋធម្មនុញ្ញអេហ្ស៊ីប គឺការពន្យារអាណត្តិប្រធានាធិបតីពី៤ឆ្នាំដល់៦ឆ្នាំ។
ម្យ៉ាងទៀតការកែប្រែមាត្រានោះ ក៏នឹងលុបចោលផងដែរ ចំនួនអាណត្តិប្រធានាធិបតីដែលកំណត់ត្រឹម២អាណត្តិ។ បែបនេះអាចឲ្យលោកAL SISSI ដែលអនុញ្ញាតឲ្យកាន់តំណែង២អាណត្តិថែមទៀត ជាទ្រឹស្ដីអាចស្ថិតក្នុងអំណាចរហូតដល់ឆ្នាំ២០៣៤។
ក្រោយការផុតអាណត្តិបច្ចុប្បន្ន ប្រធានាធិបតីអេហ្ស៊ីប នឹងអាចឈរឈ្មោះដណ្ដើមអាណត្តិថ្មី យោងទៅតាមមាត្រាទី១៤០ដែលធ្វើវិសោធនកម្ម។ ពួកអ្នកគាំទ្រលោកAL SISSI លើកហេតុផល ពីការកាន់អំណាចឲ្យបានយូររបស់លោកថា មកពីភាពចាំបាច់ទុកពេលគ្រប់គ្រាន់ឲ្យលោក ដឹកនាំការកែទម្រង់សេដ្ឋកិច្ច និងដឹកនាំបណ្ដាផែនការអភិវឌ្ឍន៍ សំដៅធ្វើឲ្យប្រទេសមានស្ថេរភាព។ ប្រធានាធិបតីរូបនោះទទួលការគាំទ្រដ៏ទូលំទូលាយក្នុងសភា។
ចំណែកពួកប្រឆាំងមួយចំនួន និយាយកាលពីថ្ងៃទី៤កុម្ភៈទៅកាន់សារព័ត៌មានថា ការកែប្រែរដ្ឋធម្មនុញ្ញនោះ នឹងធ្វើឲ្យប៉ះពាល់ដល់បុព្វហេតុធំៗ នៃការក្រោកបះបោរប្រជាជន ដែលនាំទៅដល់ការផ្ដួលរំលំ អតីតជនផ្ដាច់ការលោកហូស្នីមូបារ៉ាក់ កាលពីខែមករាឆ្នាំ២០១១។ សមាជិកសភាធ្វេងនិយមម្នាក់ លោកHAITHAM AL HARIRIថ្លៃងប្រាប់រ៉យទ័រថា បណ្ដាគម្រោងធ្វើវិសោធនកម្មរដ្ឋធម្មនុញ្ញ គឺជារដ្ឋប្រហារមួយ ប្រឆាំងរដ្ឋធម្មនុញ្ញអេហ្ស៊ីប។
ពួកប្រឆាំងយល់ថាអតីតឧត្ដមសេនីយអាយុ៦៣ឆ្នាំរូបនោះ ដឹកនាំអេហ្សុីបឆ្ពោះទៅរករបបផ្ដាច់ការមួយ ដូចលោកហូស្នីមូបារ៉ាក់ដែរ៕
ចែករំលែកព័តមាននេះ