អាមេរិកដាក់១ម៉ាត់ ការចរចាសង្គ្រាមពាណិជ្ជកម្មជាមួយចិន កុំសង្ឃឹមថាបានផ្លែផ្កា
រដ្ឋធានីវ៉ាស៊ីនតោន ៖ ភ្នាក់ងារសារព័ត៌មាន Reuters បានរាយការណ៍ថា ការិយាល័យពាណិជ្ជកម្មក្រោមរដ្ឋាភិបាល លោកប្រធានាធិបតី ដូណាល់ ត្រាំ (Donald…
រដ្ឋធានីវ៉ាស៊ីនតោន ៖ ភ្នាក់ងារសារព័ត៌មាន Reuters បានរាយការណ៍ថា ការិយាល័យពាណិជ្ជកម្មក្រោមរដ្ឋាភិបាល លោកប្រធានាធិបតី ដូណាល់ ត្រាំ (Donald Trump) បាននិយាយថា ការចរចាលើវិធានថ្មីក្រោមអង្គការពាណិជ្ជកម្មពិភពលោក (WTO) ដើម្បីបញ្ឈប់សកម្មភាពពាណិជ្ជកម្មអយុត្តិធម៌របស់ប្រទេសចិននឹងមិនមានផ្លែផ្កាទេ ។
ការិយាល័យអ្នកតំណាងពាណិជ្ជកម្មអាមេរិកបានប្រើរបាយការណ៍ប្រចាំឆ្នាំដែលផ្ញើជូនសភាទាក់ទិននឹងការគោរពរបស់ប្រទេសចិននូវវិធាន WTO ដើម្បីគាំទ្រដល់សកម្មភាពរបស់ខ្លួនក្នុងសង្គ្រាមពាណិជ្ជកម្មរយៈពេល៦ខែមកនេះ ។
របាយការណ៍ខាងលើបានបង្ហាញថា សហរដ្ឋអាមេរិកនៅតែបន្តមិនពេញចិត្តនឹង WTO ដែលអសមត្ថភាពក្នុងការទប់ស្កាត់គោលនយោបាយសេដ្ឋកិច្ចរបស់ប្រទេសចិនដែលអាមេរិកគិតថា ប៉ះពាល់ដល់ការធ្វើពាណិជ្ជកម្ម ។
សម្ព័ន្ធមិត្តមួយចំនួនដូចជា កាណាដា សហភាពអ៊ឺរ៉ុប និងជប៉ុន បានចាប់ផ្តើមការចរចាលើកំណែទម្រង់ និងការធ្វើទំនើបកម្មដំបូងនៃវិធាន WTO តាំងពីអង្គការនេះត្រូវបានបង្កើតឡើងក្នុងឆ្នាំ ១៩៩៥ ។
ប៉ុន្តែរាល់កំណែទម្រង់វិធាន WTO ត្រូវទទួលបានការព្រមព្រៀងពីសមាជិកទាំង ១៦៤ប្រទេស ។ ការិយាល័យខាងលើបាននិយាយថា មានភាគរយតិចណាស់ដែលប្រទេសចិននឹងយល់ព្រមនឹងវិធានថ្មីដែលបង្កើតឡើងដើម្បីផ្លាស់ប្តូរសកម្មភាពពាណិជ្ជកម្មនិងប្រព័ន្ធសេដ្ឋកិច្ចរបស់ពួកគេណាស់ ។
ជាមួយគ្នានេះផងដែរ ការិយាល័យខាងលើបានបន្តថា សហរដ្ឋអាមេរិកចង់ឲ្យប្រទេសចិនទទួលខុសត្រូវចំពោះការមិនគោរពវិធាន WTO និងសកម្មភាពពាណិជ្ជកម្មមិនយុត្តិធម៌ទាំងឡាយដែលប៉ះពាល់ដល់ពលករ អាជីវកម្ម និងកសិករអាមេរិក ។
ការិយាល័យនេះបានបន្ថែមថា «សហរដ្ឋអាមេរិកនឹងចេញសកម្មភាពដែលចាំបាច់ដើម្បីធានាថា ការខាតបង់ដែលបង្កពីប្រព័ន្ធសេដ្ឋកិច្ចមិនសេរីរបស់ប្រទេសចិនត្រូវបានរ៉ាប់រងដោយតែប្រទេសចិនប៉ុណ្ណោះ មិនមែនសហរដ្ឋអាមេរិកឡើយ រហូតដល់ប្រទេសចិនផ្លាស់ប្តូរគោលជំហរខ្លួនលើសេដ្ឋកិច្ច និងការធ្វើពាណិជ្ជកម្ម» ៕
ចែករំលែកព័តមាននេះ