ខេត្តកំពង់ស្ពឺ ៖ យ៉ាងហោចណាស់បុរសចំនួន២នាក់បានកៀបជាប់ក្នុងរថយន្តបណ្តាលឱ្យស្លាប់ភ្លាមៗនៅកន្លែងកើតហេតុ និងមនុស្សចំនួន៣នាក់ផ្សេងទៀតបានរងរបួសធ្ងន់ធ្ងរ ក្នុងហេតុការណ៍គ្រោះថ្នាក់ចរា
ចរណ៍រថយន្តមួយគ្រឿងបើកបរក្នុងល្បឿនហើយក្រឡាប់ធ្លាក់ពីលើផ្លូវជាតិជាច្រើនត្រឡប់កាលពីវេលាម៉ោង៨និង៣០នាទីយប់ថ្ងៃទី៤ ខែកុម្ភៈ ឆ្នាំ២០១៩ នៅលើកំណាត់ផ្លូវជាតិលេខ៤៤ ត្រង់ចន្លោះបង្គោលគីឡូម៉ែត្រលេខ១៣១ និងលេខ១៣២ ស្ថិតនៅក្នុងភូមិត្រពាំងក្អែក ឃុំវាលពង់ ស្រុកឧដុង្គ ខេត្តកំពង់ស្ពឺ។
រថយន្តមួយគ្រឿងខាងលើជិះគ្នា៥នាក់ម៉ាកកាម៉ារីឆ្លាម ស៊េរីឆ្នាំ១៩៩៣ ពណ៌ខ្មៅ ពាក់ស្លាកលេខ ភ្នំពេញ ២B-៦៣២១ បើកបរដោយឈ្មោះ លាង ភាព ភេទប្រុស អាយុ៣៣ឆ្នាំ រស់នៅភូមិតាំងស្តុក ឃុំសំរោង ស្រុកថ្ពង ខេត្តកំពង់ស្ពឺ បានរងរបួសធ្ងន់ ។ ចំណែកអ្នករួមដំណើរចំនួន៤នាក់ ក្នុងនោះ១-ឈ្មោះ ហៀង រើន ភេទប្រុស អាយុ៣៨ឆ្នាំ រស់នៅភូមិតាំងស្តុក ឃុំសំរោង ស្រុកថ្ពង ខេត្តកំពង់ស្ពឺ បានរងរបួសធ្ងន់ ២-ឈ្មោះ គុណ គា ភេទប្រុស អាយុ៣២ឆ្នាំ រស់នៅភូមិតាំងស្តុក ឃុំសំរោង ស្រុកថ្ពង ខេត្តកំពង់ស្ពឺ បានរងរបួសធ្ងន់ ៤-ឈ្មោះ ញ៉ាញ់ ប៉ែក ភេទប្រុស អាយុ១៨ឆ្នាំ ជាសិស្ស រស់នៅ ភូមិសំរោង ឃុំមនោរម្យ ស្រុកថ្ពង ខេត្តកំពង់ស្ពឺ បានស្លាប់នៅនឹងកន្លែងកើតហេតុ និង៥-ឈ្មោះ ឃី អូច ភេទប្រុស អាយុ៣២ឆ្នាំ រស់នៅ ភូមិសំរោង ឃុំមនោរម្យ ស្រុកថ្ពង ខេត្តកំពង់ស្ពឺ បានស្លាប់នៅនឹងកន្លែងកើតហេតុ ។
តាមប្រភពព័ត៌មានពីមន្ត្រីនគរបាលបាននិយាយអោយដឹងថា នៅមុនពេលកើតហេតុ គេឃើញរថយន្តមួយគ្រឿងខាងលើជិះគ្នា៥នាក់ ធ្វើដំណើរតាមបណ្តោយផ្លូវជាតិលេខ៤៤ ក្នុងទិសដៅពីកើតទៅទិសខាងលិច លុះមកដល់ចំណុចកើតហេតុខាងលើ ដោយសាររថយន្ត បើកបរក្នុងល្បឿនលឿន ក៏ធ្លាក់ទៅខាងជើងផ្លូវក្រឡាប់ជាច្រើនត្រឡប់ បណ្តាលឱ្យមនុស្ស២នាក់កៀបជាប់ក្នុងរថយន្តស្លាប់ ចំណែកមនុស្ស៣នាក់ទៀតបានរងរបួសធ្ងន់ រីឯរថយន្តរងការខូចខាតយ៉ាងធ្ងន់ធ្ងរ។
ក្រោយពេលកើតហេតុ នគរបាលស្រុកបានចុះទៅធ្វើការវាស់វែង និងហៅរថយន្តសាមុយមកដឹកយកជនរងគ្រោះទាំង៣នាក់ទៅសង្គ្រោះនៅមន្ទីរពេទ្យ រីឯសពជនរងគ្រោះចំនួន២នាក់ទៀតត្រូវបានសមត្ថកិច្ចប្រគល់អោយសាច់ញាតិដើម្បីយកទៅធ្វើបុណ្យតាមប្រពៃណី។
ចំពោះរថយន្តម៉ាកកាមរីខាងលើត្រូវបាននគរបាលហៅរថយន្តស្ទូចមកស្ទូចដើម្បីយកទៅរក្សាទុកនៅអធិការដ្ឋាននគរបាលស្រុកឧដុង្គរង់ចាំសាច់ញាតិមកទទួលយក៕
ចែករំលែកព័តមាននេះ