រាជធានីភ្នំពេញ ៖ មនុស្ស១ក្រុមចំនួន៧នាក់ត្រូវបានកម្លាំងសមត្ថកិច្ចនាយកដ្ឋានប្រឆាំងបទល្មើសបច្ចេក វិទ្យាក្រសួងមហាផ្ទៃឃាត់ខ្លួនកសាងសំណុំរឿងត្រៀមបញ្ជូនទៅកាន់សាលាដំបូងរាជធានីភ្នំពេញក្នុងពេលឆាប់នេះពាក់ព័ន្ធករណីឆបោកប្រាក់ តាមរយៈសារអេឡិចត្រូនិច (អ៊ីមែល) ទាក់ទងទៅជនរងគ្រោះ ។
មនុស្ស៧នាក់នោះមានស្ត្រីខ្មែរ២នាក់ បុរសជនជាតិនីហ្សេរីយ៉ា៣នាក់ និងប៉ាគីស្ថាន២នាក់ ដែលពួកគេត្រូវបានសមត្ថកិច្ចស្រាវជ្រាវ និងចាប់ខ្លួនជាបន្តបន្ទាប់ តាំងពីថ្ងៃទី០២ ខែកុម្ភៈ ២០១៩ មកនោះ ។
តាមខ្លឹមសារដែលត្រូវបានសមត្ថកិច្ចបង្ហោះជាសាធារណៈលើសង្គមហ្វេសប៊ុកបានបញ្ជាក់ពីសកម្មភាពរបស់ជនសង្ស័យមួយក្រុមនេះឲ្យដឹងថា ជនសង្ស័យបានលេងល្បិចប្រើប្រាស់អ៊ីមែលផ្ញើសារទៅរកជនរងគ្រោះនៅក្នុងស្រុកខ្មែរដោយប្រាប់ថា ពួកគេកំពុងមានជំងឺជាទម្ងន់ ហើយមានមរតកយ៉ាងច្រើន និងត្រូវការប្រគល់ឲ្យជនរងគ្រោះ ប៉ុន្តែតម្រូវឲ្យជនរងគ្រោះផ្ញើប្រាក់មួយចំនួនឲ្យគេជាមុនសិន ដើម្បីរៀបចំឯកសារផ្ទេរមរតកនោះ ។
ក្រោមការស្រាវជ្រាវយ៉ាងយកចិត្តដាក់លើបទល្មើសប្រឆាំងបច្ចេកវិទ្យាជាល្បិចដ៏ចាស់គំរឹលនេះ ជនសង្ស័យបានធ្លាក់ចូលអន្ទាក់របស់សមត្ថកិច្ច និងត្រូវឃាត់ខ្លួនជាក្រុមយោងតាមពាក្យបណ្តឹងជនរងគ្រោះ ។ ជាមួយនោះផងដែរនាយកដ្ឋានប្រឆាំងបទល្មើសបច្ចេកវិទ្យាក៏ធ្លាប់បានធ្វើការផ្សព្វផ្សាយជាច្រើនដងហើយពាក់ពន្ធទៅនឹងល្បិចកលដ៏គម្រក់ពីសំណាក់ជនទុច្ចរិតនេះ ដែលសូមឲ្យបងប្អូនប្រជាពលរដ្ឋមានការប្រុងប្រយ័ត្ននូវករណីឆបោកដែលជនល្មើសប្រើប្រាស់វិធីផ្សេងៗដូចជា ឈ្នះរង្វាន់ពីក្រុមហ៊ុន សាច់ញាតិជួបគ្រោះថ្នាក់ចរាចរណ៍ ដើម្បីឲ្យជនរងគ្រោះផ្ញើប្រាក់ឲ្យពួកគេ ។ មកដល់ពេលនេះជនសង្ស័យទាំង៧នាក់នោះសមត្ថកិច្ចមិនទាន់បានបញ្ជូនទៅសាលាដំបូងទេទំនងនៅបន្តនីតិវិធី ៕
ចែករំលែកព័តមាននេះ