រាជធានីភ្នំពេញ ៖ កាន់តែមានឱកាសក្នុងការពង្រឹងសមត្ថភាពបន្ថែមទៀត ចំពោះពលករកម្ពុជាដែលធ្វើការខាងវិស័យសំណង់ និងទទួលបានការបណ្តុះបណ្តាលពង្រីកសមត្ថភាពបន្ថែមទៀត ពីអ្នកជំនាញជប៉ុន ។ នេះបើតាមប្រធានអង្កការសមាគមសហប្រតិបត្តិការកម្ពុជាជប៉ុន ។
ការអះអាងនេះ ខណៈដែលលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានអនុញ្ញាតឱ្យលោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុនចូលជួបសម្តែងការគួរសម និងពិភាក្សាការងារ កាលពីពេលថ្មីៗ ខែកន្លងមកនេះនៅទីស្តីការក្រសួង ។
នៅក្នុងជំនួបនោះលោក Yamada បានលើកឡើងថា លោកបាននាំវិនិយោគទុនខាងក្រុមហ៊ុនសំណង់ផ្នែកត្រួតពិនិត្យដី ដែលមានក្រុមហ៊ុនជាង៤០០ នៅជប៉ុនដែលក្រុមហ៊ុននេះបានសិក្សាលើប្រភេទដីបង្កើតបាតគ្រឹះមុន និងសាងសង់ និងយកសំណាកដីធ្វើការពិសោធន៍នៅ ប្រទេសជប៉ុន ។
ក្រុមហ៊ុនសំណង់នេះបានទទួលពលករខ្មែរដែលអាចទៅធ្វើការផ្នែកសំណង់នេះជាង៣០០នាក់ ហើយនៅឯប្រទេសជប៉ុន ។ លោកបញ្ជាក់ថា «ពលករខ្មែរនឹងមានជំនាញពិតប្រាកដខាងផ្នែកសំណង់នេះ បន្ទាប់ពីគាត់ទៅធ្វើកម្មសិក្សានៅជប៉ុន ហើយនាំជំនាញនេះមកអភិវឌ្ឍវិស័យសំណង់នេះនៅកម្ពុជាវិញ» ។ ជាមួយគ្នានេះដែរលោក Yamada បានសន្យាថា នឹងធ្វើយ៉ាងណាទាក់ទាញអ្នកវិនិយោគទុនជប៉ុនថ្មីៗ ឲ្យមកវិនិយោគនៅលើទឹកដីកម្ពុជាអោយកាន់តែច្រើនបន្ថែមទៀត ។
ជាការឆ្លើយតបលោករដ្ឋមន្ត្រីពេញចិត្តនូវអ្វីដែលជាការលើកឡើងរបស់លោកប្រធានអង្គការសមាគមសហប្រតិបត្តិការកម្ពុជា -ជប៉ុន ដែលណែនាំអ្នកវិនិយោគផ្នែកសំណង់មកកម្ពុជា ។ លោកបានមានប្រសាសន៍ថា បច្ចុប្បន្ននេះវិស័យសំណង់របស់កម្ពុជាកំពុងមានការរីកចម្រើនជាខ្លាំងក្នុងនោះមានក្រុមហ៊ុនសំណង់របស់ជប៉ុនបានរួមចំណែកក្នុងការអភិវឌ្ឍលើវិស័យសំណង់នេះផងដែរ ។
លោកបញ្ជាក់ថា «សំណង់មិនអាចប្រហែសបានទេប៉ះពាល់ដល់អាយុជីវិតរបស់មនុស្ស បើបច្ចេកទេសមិនល្អ គឺមានហានិភ័យដល់ជីវិតរបស់មនុស្ស ដូច្នេះត្រូវយកចិត្តទុកដាក់ខ្ពស់ក្នុងរៀបចំដំណើរការសាងសង់អោយទៅតាមបទដ្ឋានស្តង់ដាសំណង់» ។ នៅក្នុងជំនួបនោះដែរលោកYamadaក៏បានឲ្យដឹងថា អង្គការសមាគមសហប្រតិបត្តិការកម្ពុជា-ជប៉ុន មានបំណងចង់បង្កើតភូមិវិប្បធម៌ខ្មែរមួយនៅប្រទេសជប៉ុន ហើយសង្ឃឹមថា ភាគីកម្ពុជានឹងឯកភាពតាមសំណើនេះ ។ ភូមិវប្បធម៌នេះជាការជួបប្រជុំគ្នារវាងប្រជាជនខ្មែរនៅជប៉ុនក្នុងការធ្វើពិធីបុណ្យផ្សេងៗតាមប្រពៃណី ម្យ៉ាងវិញទៀតសាច់ញាតិពលករ ឬពលរដ្ឋខ្មែរអាចទៅជួបប្រជុំនៅទីនោះបាន ដើម្បីបង្ហាញពីវប្បធម៌របស់ខ្មែរ ។ ឆ្លើយតបទៅនឹងសំណើនេះលោករដ្ឋមន្ត្រីបានឯកភាពនូវការបង្កើតភូមិវប្បធម៌នេះ ដើម្បីបង្កលក្ខណៈងាយស្រួលដល់ការជួបជុំសាច់ញាតិរបស់បងប្អូនពលករ និងប្រជាជនខ្មែរទូទៅនៅទីនោះ ។
លោករដ្ឋមន្ត្រីបានលើកឡើងថា ក្នុងខែមិនា ក្នុង២០១៩នេះកម្ពុជានឹងត្រូវចុះហត្ថលេខាជាមួយនឹងភាគីជប៉ុននៅឯប្រទេសជប៉ុន លើកិច្ចព្រមព្រៀងសហប្រតិបត្តិការស្តីពីពលករជំនាញ ។ លោករដ្ឋមន្ត្រីថា«ពលករដែលធ្វើការនៅជប៉ុន គឺមានចំនួន៩ពាន់នាក់ជាង សង្ឈឹមមថា នៅឆ្នាំក្រោយនឹងមានការកើនចំនួនឡើងទ្វេមួយជាពីរ ដូច្នេះពលករក៏ត្រូវការពេលវេលាក្នុង ការបណ្តុះបណ្តាលអោយមានជំនាញច្បាស់លាស់ក្នុងការបំពេញកិច្ចការងាររបស់ពួកគេ រឹតតែល្អប្រសើរថែមទៀត» ។
គួរបញ្ជាក់ថា បច្ចុប្បន្ន ក្រសួងការងារ និងបណ្តុះបណ្តាលវិជ្ជាជីវៈបាននឹងកំពុងសហការ ជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឱ្យមានកិច្ចព្រមព្រៀងសហ ប្រតិបត្តិការជាមួយគ្នា ក្នុងគោលបំណងដើម្បីបង្កើនទីផ្សារការងារ និងឱកាសការងារដល់ប្រ ជាជនកម្ពុជា ។ ដោយជប៉ុនបានចាប់ផ្តើមរៀបចំបង្កើតឱ្យមានគម្រោងថ្មីសម្រាប់បង្កើនលំហូរនៃកម្លាំងពលកម្មពីប្រទេសផ្សេងៗ និងសម្រាប់អនុវត្តនៅអំឡុង ខែមេសា ឆ្នាំ២០១៩ ខាងមុខនេះ ដើម្បីដោះស្រាយបញ្ហាកង្វះកម្លាំងពលកម្មជំនាញនៅជប៉ុន ៕
ចែករំលែកព័តមាននេះ