ក្រុងបាងកក ៖ ខណៈខ្យល់កខ្វក់កំពុងតែវាយប្រហារលើក្រុងបាងកក ប្រទេសថៃ និងខេត្តមួយចំនួនជុំវិញ ស្រាប់តែនៅថ្ងៃទី៣ កុម្ភៈ គេមានការភ្ញាក់ផ្អើលពីកម្ទេចខ្មៅ ដែលធ្លាក់រោយគ្របដណ្តប់ផ្លូវ និងរថយន្តចតនៅមុខផ្ទះ…
ក្រុងបាងកក ៖ ខណៈខ្យល់កខ្វក់កំពុងតែវាយប្រហារលើក្រុងបាងកក ប្រទេសថៃ និងខេត្តមួយចំនួនជុំវិញ ស្រាប់តែនៅថ្ងៃទី៣ កុម្ភៈ គេមានការភ្ញាក់ផ្អើលពីកម្ទេចខ្មៅ ដែលធ្លាក់រោយគ្របដណ្តប់ផ្លូវ និងរថយន្តចតនៅមុខផ្ទះ ។ កម្ទេចខ្មៅនេះ ប្រៀបដូចជាកម្ទេចម្រែងភ្លើង ។ ដោយសារតែស្ថានភាពខ្យល់កខ្វក់កំពុងយាយី ហើយតំបន់មួយចំនួនក្នុងខេត្តឈុនបូរីមានកម្ទេចខ្មៅបានធ្លាក់មក បង្កឱ្យកាន់តែមានការព្រួយបារម្ភលើសពីមុន ។
ការបារម្ភចំពោះកម្ទេចខ្មៅទាំងនោះ ព្រោះវាអាចនឹងបង្កឲ្យមានគ្រោះថ្នាក់ ឬជាតិពុលដល់ប្រជាជន ហើយថែមទាំងអាចប៉ះពាល់ដល់សុភាព និងស្បែកកុមារតូចៗ និងស្ត្រីមានផ្ទៃពោះថែមទៀតផង ។ មិនត្រឹមតែប៉ុណ្ណោះ កម្ទេចខ្មៅអាចបង្កផលប៉ះពាល់ដល់អ្នកដែលមានជំងឺអាលែកហ្សុីស្បែក ដោយសារតែសុខភាពពួកគេទន់ខ្សោយ ។
ទោះបីជាបែបណាក្តី អាជ្ញាធរថៃកំពុងតែស្រាវជ្រាវពីហេតុការណ៍ថ្មីនេះថា តើកម្ទេចខ្មៅទាំងនេះមកពីណា ? តើវាមានផលប៉ះពាល់បែបណាខ្លះនៅតំបន់ដែលកម្ទេចខ្មៅនោះបានធ្លាក់ ។ គេមិនទាន់ដឹង ភ្លាមៗទេជុំវិញបាតុភូតថ្មីនេះ ។
មុននេះរដ្ឋមន្ត្រីក្រសួងព័ត៌មានលោកខៀវ កាញារីទ្ធ បានបង្ហាញនូវការហួសចិត្តមួយចំពោះអ្នកវិភាគរបស់ថៃ ដែលលើកឡើងថា ខ្យល់កខ្វក់ដែលវាយប្រហារនៅក្នុងប្រទេសថៃនោះ គឺបណ្តាលមកពីកសិករខ្មែរដុតចំបើង ។ ការហួសចិត្តរបស់រដ្ឋមន្ត្រីក្រសួងព័ត៌មានកម្ពុជា បានធ្វើឡើងបន្ទាប់ពីអ្នកស្រាវជ្រាវថៃពីរនាក់ គឺលោកSiwat Phongpiachan និងលោកSerm Janchai បានអះអាងថា ករណីខ្យល់កខ្វក់ដែលគ្របដណ្តប់លើក្រុងបាងកក បណ្ដាលមកពីកសិករខ្មែរដុតចំបើងតាមវាលស្រែ ។
លោករដ្ឋមន្ត្រីបានសរសេរនៅលើ Facebook នៅថ្ងៃទី៣ កុម្ភៈថា «ស្រុកថៃពេលនេះ ក៏សំបូរអ្នកវិភាគឯករាជ្យដូចស្រុកខ្មែរដែរ ព្រោះទើបតែឃើញអ្នកវិភាគថៃមួយបាននិយាយថា អាកាសធាតុកខ្វក់នៅបាងកក គឺបណ្តាលមក…ពីអ្នកស្រែស្រុកខ្មែរដុតចំបើងតាមស្រែ ។ លោកបានសរសេរបែបចំអកថា «ស្វាគមន៍សម័យអ្នកវិភាគឯករាជ្យដ៏រុងរឿង» ។
ការចោទប្រកាន់របស់អ្នកវិភាគថៃនេះ មិនត្រូវបានអាជ្ញាធរថៃមានជំនឿបែបនេះទេ និងបានប្រកាសច្រានចោល ។ តាមការចេញផ្សាយរបសបាងកកប៉ុស្តិ៍ កាលពីថ្ងៃទី២៩ មករា លោក Pralong Damronthai មន្ត្រីគ្រប់គ្រងការបំពុលត្រូវបានគេដកស្រង់សម្តីថា តាមក្បួននៃការវិភាគអាកាសធាតុដែលបង្កើតដោយទីភ្នាក់ងារការពារបរិស្ថានអង្គការ សហប្រជាជាតិ ខ្យល់បក់ធូលីល្អិតៗពីកម្ពុជាគឺសម្តៅទៅខេត្តត្រាត និងឈូងសមុទ្រថៃ មិនមែនសម្តៅក្រុងបាងកកឡើយ ។ ចំពោះករណីខ្យល់កខ្វក់នៅបាងកក គឺបណ្ដាលមកពីបញ្ហាក្នុងស្រុកប៉ុណ្ណោះ ។
មន្ត្រីថៃរូបនេះបានបង្ហាញថា បញ្ហាខ្យល់កខ្វក់នៅក្នុងប្រទេសថៃបណ្តាលមកពីរថយន្តប្រើប្រេងម៉ាស៊ូត៥២ភាគរយ ការដុតភ្លើង៣៥ភាគរយ ក្រៅពីនោះគឺបណ្តាលមកពីឧស្សាហកម្មធុនធ្ងន់ និងរោងចក្រថាមពលនានា ។
មានការកត់សម្គាល់ថា ទីក្រុងបាងកក និងខេត្តចំនួន៤របស់ថៃ គឺខេត្តសាមុទ្របាកាន សមុទ្រសាខន នន្ទបុរី និងខេត្តណាខនប៉ាធុម បានជួបបញ្ហាខ្យល់កខ្វក់ បង្កផលប៉ះពាល់ដល់ការរស់នៅរបស់ប្រជាពលរដ្ឋជាខ្លាំង ជាពិសេសគឺផ្លូវដង្ហើម រហូតអាជ្ញាធរបានប្រកាសឲ្យសាលារៀន និងគ្រឹះស្ថានអប់រំមួយចំនួន បិទដំណើរការបណ្តោះអាសន្ន ដើម្បីការពារសុវត្ថិភាពសុខភាពកុមារ និងសិស្ស-និស្សិត ។
នៅក្នុងបណ្តាញសង្គមកាលពីថ្ងៃទី២ កុម្ភៈ មានការផ្ញើសារជាសំឡេងដោយជនអនាមិកជាការនិយាយដោយខ្វះភស្តុតាងថា ខ្វល់កខ្វក់ដែលវាយប្រហារទីក្រុងបាងកក បានរសាត់មកដល់រាជធានីភ្នំពេញហើយ តែអាជ្ញាធរមិនហ៊ានប្រកាសខ្លាចមានការចលាចល ។ ផ្ទុយទៅវិញ សារសំឡេងនោះមិនបានធ្វើឱ្យមានការភ្ញាក់ផ្អើលជាទូទៅនោះទេ ។ ជាមួយគ្នានេះក្រសួងបរិស្ថានបានជូនដំណឹងពីគុណភាពខ្យល់នៅរាជធានីភ្នំពេញដោយបង្ហាញថា មិនមានខ្យល់ពុលទេ ។
ចែករំលែកព័តមាននេះ