រាជធានីភ្នំពេញ ៖ មន្ត្រីក្រសួងការពារជាតិបានឱ្យដឹងថា នៅថ្ងៃទី៦ កុម្ភៈ សិក្ខាកាមយោធាប្រមាណ៨៤នាក់ ដែលមកពីបណ្ដាកងឯកភាពទូទាំងខ.ភ.ម នឹងត្រូវចេញទៅបំពេញការសិក្សានៅគ្រឹះស្ថានយោធា នៃប្រទេសសហព័ន្ធរុស្សី សម្រាប់ឆ្នាំសិក្សា២០១៩ ។
លោកឧត្តមសេនីយ៍ឯក ខៀវ សាផាត នាយករងនាយកដ្ឋានបុគ្គលិកក្រសួងការពារជាតិថ្លែងឱ្យដឹងថា៖ ស្ថិតក្រោមកិច្ចសហប្រតិបត្តិការយោធារវាងប្រទេសទាំងពីរ (កម្ពុជា-រុស្ស៊ី) ចាប់ពីឆ្នាំ២០០៧ ដល់ឆ្នាំ២០១៨ ក្រសួងការពារប្រទេសនៃសហព័ន្ធរុស្ស៊ីបានជួយបណ្ដុះបណ្ដាលរយៈពេលវែង និងមធ្យមដល់នាយទាហាននៃកងយោធពលខេមរភូមិន្ទសរុបរួមមានចំនួន៤៤១នាក់ ។ ក្នុងនោះរួមមានសិក្ខាកាមកំពុងសិក្សាសរុបរួម៖ ចំនួន៣០៧នាក់, សិក្ខាកាមបញ្ចប់វគ្គសិក្សាចំនួន៥០នាក់ និងសិក្ខាកាមចំនួន៨៤នាក់នេះត្រៀមចេញទៅបំពេញកម្មសិក្សាឆ្នាំ២០១៨-២០១៩។
ជាមួយគ្នានេះដែរ ក្រសួងការពារជាតិនៃព្រះរាជាណាចក្រកម្ពុជា ទទួលយកនាយទាហានរុស្ស៊ីចំនួន៥នាក់ មកសិក្សាភាសាខ្មែរ នៅសាកលវិទ្យាល័យការពារជាតិ សម្រាប់ឆ្នាំ២០១៨-២០១៩ ។
ចែករំលែកព័តមាននេះ