រាជធានីភ្នំពេញ ៖ ពិតជារឿងគួរឱ្យសោកស្តាយណាស់ លោកយាយ រស់ គង់ ដែលជាវិរៈសិល្បករផ្នែករបាំបុរាណ និងជាមរតកមនុស្សរស់អាយុ៨៦ឆ្នាំ បានទទួលមរណភាពហើយនៅវេលាម៉ោង៦និង៣០នាទីល្ងាច ថ្ងៃទី៤…
រាជធានីភ្នំពេញ ៖ ពិតជារឿងគួរឱ្យសោកស្តាយណាស់ លោកយាយ រស់ គង់ ដែលជាវិរៈសិល្បករផ្នែករបាំបុរាណ និងជាមរតកមនុស្សរស់អាយុ៨៦ឆ្នាំ បានទទួលមរណភាពហើយនៅវេលាម៉ោង៦និង៣០នាទីល្ងាច ថ្ងៃទី៤ ខែកុម្ភៈ ឆ្នាំ២០១៩ ដោយសារជំងឺ និងជរាពាធ។
ដំណឹងមរណភាពរបស់លោកយាយ រស់ គង់ បានធ្វើឲ្យកូនចៅក្រុមគ្រួសារ ព្រមទាំងនាដការី និងកូនសិស្សទាំងឡាយបានសម្តែងការសោកស្តាយជាខ្លាំង។ ហើយសពលោកយាយត្រូវបានសាច់ញាតិតម្កល់ធ្វើបុណ្យតាមប្រពៃណីនៅផ្ទះក្រុមគ្រួសាររបស់លោកយាយ ស្ថិតនៅសង្កាត់ច្បារអំពៅ រាជធានីភ្នំពេញ។
ព្រឹទ្ធាចារ្យរបាំព្រះរាជទ្រព្យលោកយា រស់ គង់ មានកូន៩នាក់ ប៉ុន្តែបានស្លាប់ក្នុងសង្គ្រាម៤នាក់ ។ កូនទាំងអស់របស់ព្រឹទ្ធាចារ្យ គឺសុទ្ធតែជាសិល្បករ ។ មរតកមនុស្សរស់អ្នកស្រី រស់ គង់ ឯកទេសរបាំព្រះរាជទ្រព្យតួនាយរោង ។ ព្រឹទ្ធាចារ្យជាគ្រូរបាំនៅសាលាមធ្យមសិក្សាវិចិត្រសិល្បៈតាំងពីទសវត្សរ៍ទី៨០ ដោយបង្ហាត់ពីថ្នាក់ថ្នាលដល់ថ្នាក់បញ្ចប់មធ្យមទុតិយភូមិ ។ អ្នកស្រីបានហាត់រៀនរបាំ និងសម្ដែងរបាំតាំងពីសម័យសង្គមរាស្ត្រនិយមម្ល៉េះ ។
ក្រៅពីឯកទេសរបាំព្រះរាជទ្រព្យអ្នកស្រី រស់ គង់ ក៏មានជំនាញរបាំប្រពៃណីផងដែរ ។ អ្នកស្រីបានទៅសម្ដែងរបាំនៅក្រៅប្រទេសជាច្រើនប្រទេស ។ មរតកមនុស្សរស់អ្នកស្រី រស់ គង់ ទទួលបានគោរមងារថ្នាក់ជាតិពីព្រះមហាក្សត្រ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ជាព្រឹទ្ធាចារ្យវិសេសនាដការីវិជ្ជានៅក្នុងឆ្នាំ២០១៣។
ព្រឹទ្ធាចារ្យសិល្បៈ រស់ គង់ ងារជាវិសេសនាដការីវិជ្ជានិងជាមរតកមនុស្សម្នាក់ក្នុងចំណោមមនុស្សរស់ទាំង១៧របស់កម្ពុជាដែលតែងតាំងដោយព្រះមហាក្សត្រ លោកយាយ រស់ គង់ ជាសិល្បការិនីរបាំក្នុងវាំង រួមជំនាន់ជាមួយលោកយាយ ឯម ធាយ ផងដែរ។
គួរបញ្ជាក់ថា បច្ចុប្បន្ននេះ សពព្រឹទ្ធាចារ្យ រស់ គង់ ត្រូវបានតម្កល់ធ្វើបុណ្យនៅគេហដ្ឋានក្នុងបុរីពិភពថ្មី២ ខណ្ឌចំការដូង៕
ចែករំលែកព័តមាននេះ