រាជធានីភ្នំពេញ ៖ ជាមួយនឹងកំណើននៃភ្ញៀវទេសចរអន្តរជាតិ និងអ្នកវិនិយោគចម្រុះជាតិសាសន៍ ធ្វើឲ្យមានតម្រូវការភោជនីយដ្ឋាន និងសណ្ឋាគារប្រណីតកើនឡើងជាបន្ដបន្ទាប់នៅកម្ពុជា ពិសេសនៅតាមខេត្តសក្ដានុពលសេដ្ឋកិច្ច និងទេសចរណ៍ ។ ដើម្បីឆ្លើយតបនឹងតម្រូវការនេះ…
រាជធានីភ្នំពេញ ៖ ជាមួយនឹងកំណើននៃភ្ញៀវទេសចរអន្តរជាតិ និងអ្នកវិនិយោគចម្រុះជាតិសាសន៍ ធ្វើឲ្យមានតម្រូវការភោជនីយដ្ឋាន និងសណ្ឋាគារប្រណីតកើនឡើងជាបន្ដបន្ទាប់នៅកម្ពុជា ពិសេសនៅតាមខេត្តសក្ដានុពលសេដ្ឋកិច្ច និងទេសចរណ៍ ។ ដើម្បីឆ្លើយតបនឹងតម្រូវការនេះ ក្រុមហ៊ុនមួយបាននិងកំពុងអភិវឌ្ឍរមណីយដ្ឋានលំដាប់ផ្កាយ៥មួយ មានទីតាំងនៅកោះស្រមោច ដែលនឹងដាក់ឲ្យដំណើរការដំណាក់កាលទី១នៅឆ្នាំនេះ ។
ម្រោងវិនិយោគរមណីយដ្ឋាននេះ ស្ថិតនៅលើកោះស្រមោចដែលវិនិយោគដោយក្រុមហ៊ុន SEA SENSE Resort ជាក្រុមហ៊ុនបុត្រសម្ព័ន្ធរបស់ក្រុមហ៊ុន MARITIME Group ។ លេខាធិការប្រតិបត្តិរបស់ក្រុមហ៊ុន MARITIME GROUP លោកស្រី ដុម សុភាព បានឲ្យដឹងកាលពីពេលថ្មីៗនេះថា រមណីយដ្ឋានទេសចរណ៍ថ្មី «SEA SENSE Resort» ត្រូវបានរចនាឡើងមានលក្ខណៈទំនើបលំដាប់ផ្កាយ៥ នឹងលេចត្រដែតឡើងលើកោះស្រមោច នៃខេត្តព្រះសីហនុ។ រមណីយដ្ឋាននេះ គ្រោងនឹងបិទបញ្ចប់ការអភិវឌ្ឍដំណាក់កាលទី១នេះ នៅចុងឆ្នាំ២០១៩ ដើម្បីត្រៀមស្វាគមន៍វត្តមានភ្ញៀវទេសចរពីគ្រប់ទិសទី ។
លោកស្រីបន្តថា គម្រោងវិនិយោគនេះមានប្រភេទផលិតផលជាច្រើនដូចជា ផ្ទះស្នាក់ទេសចរណ៍ ឬបឹងហ្គាឡូ វីឡាបែបគ្រួសារ ស្ពានកំពង់ទឹក ឬស្ពានបណ្ដែតទឹក កន្លែងទទួលភ្ញៀវ ភោជនីយដ្ឋាន អាងហែលទឹក ក្លិបហាត់ប្រាណ និងតារាងវាយតឺនីស ហាងលក់ទំនិញ កាស៊ីណូ ម៉ាស្សា ស្ប៉ា បន្ទប់ទឹកសាធារណៈ កន្លែងជួលទូកកៃយ្យៈ អូរប័រ ពោងលែងទឹក សម្រាប់ភ្ញៀវទេសចរដែលចង់ជិះលែងកម្សាន្តជាដើម ។
លោកស្រី ដុម សុភាព បានបន្តទៀតថា ក្រុមហ៊ុនក៏មិនភ្លេចពីការយកចិត្តទុកដាក់លើបញ្ហាបរិស្ថាន អនាម័យ និងសំរាមផងដែរ ដោយក្រុមហ៊ុនបាននាំចូលនូវឡដុតសំរាមគ្មានផ្សែងដ៏ទំនើបមួយសម្រាប់ដុតសំរាមនៅតំបន់ចុងកោះ ធានាថាមិនប៉ះពាល់ដល់បរិស្ថាននៅលើកោះស្រមោចនោះឡើយ ។
កោះស្រមោច មានផ្ទៃដីចំនួន២៥,៦៥ហិកតា ប៉ុន្តែបើគិតពីផ្ទៃដីធម្មជាតិទាំងអស់នៅលើកោះមានប្រមាណ៣៣ហិកតា ។ កោះស្រមោចមានចម្ងាយពីមូលដ្ឋានកងទ័ពជើងទឹកតែ៨០០ម៉ែត្រប៉ុណ្ណោះ បើយើងធ្វើដំណើរតាមទូកទេសចរណ៍ ចំណាយពេល១០នាទី តែបើធ្វើដំណើរតាមអូប័រចំណាយពេលប្រមាណ៥នាទី ។
រយៈកាល២ឆ្នាំចុងក្រោយនេះ ខេត្តព្រះសីហនុ បានក្លាយទៅជាគោលដៅយ៉ាងសំខាន់របស់អ្នកវិនិយោគមកពីតំបន់ផ្សេងៗ ហើយសព្វថ្ងៃនេះបាននឹងកំពុងធ្វើឲ្យខេត្តព្រះសីហនុ មានការអភិវឌ្ឍយ៉ាងលឿនទៅមុខ។ ខេត្ដព្រះសីហនុ ពិតជាកន្លែងស័ក្តិសមក្នុងការដាក់ទុនវិនិយោគលើវិស័យបដិសណ្ឋារកិច្ច ។
ម្យ៉ាងវិញទៀអ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេញ ក្នុងនោះខេត្ដព្រះសីហនុ ក៏ធានាបាននូវសន្ដិសុខ សុវត្ថិភាពខ្ពស់ដែរ ជាមួយនិងធនធានធម្មជាតិសម្បូរបែប ផ្ទៃដីនៅទំនេរធំទូលាយរួមទាំងកោះល្អៗ៣២ ជាពិសេសនោះ គឹប្រព័ន្ធគមនាគមន៍សម្បូរបែប ផ្លូវដែក ទឹក គោគ ផ្លូវអាកាសជាដើម ។
ក្រសួងទេសចរណ៍បានបង្ហាញការព្យាករថា នៅឆ្នាំ២០២០ កម្ពុជានឹងទទួលស្វាគមន៍ភ្ញៀវទេសចរអន្តរជាតិប្រមាណជាង៧លាននាក់ ហើយនៅឆ្នាំ២០៣០ នឹងទទួលបានប្រមាណ១៥លាននាក់ ។ ចំណែកទេសចរជាតិ នឹងកើនឡើងប្រមាណ១៣លាននាក់។ ដើម្បីឆ្លើយតបនឹងកំណើនភ្ញៀវទេសចរនេះ កម្ពុជាត្រូវការសណ្ឋាគារប្រមាណជាង១០ម៉ឺនបន្ទប់ សម្រាប់ផ្គត់ផ្គង់ការស្នាក់នៅ ក្នុងនោះសណ្ឋាគារប្រណីតលំដាប់ផ្កាយ៤ និងផ្កាយ៥ប្រមាណ៦០% ស្មើប្រមាណ៦មុឺនបន្ទប់នៅទូទាំងប្រទេស ។ ដោយឡែកសម្រាប់ខេត្តព្រះសីហនុ នឹងត្រូវការបន្ទប់សណ្ឋាគារជាង៣ម៉ឺនបន្ទប់បន្ថែមទៀត ក្នុងនោះសណ្ឋាគារប្រណីតជាង២ម៉ឺនបន្ទប់ ដើម្បីឆ្លើយតបនឹងតម្រូវការកំណើនភ្ញៀវទេសចរអន្តរជាតិប្រមាណ២លាននាក់ និងទេសចរជាតិប្រមាណ៣លាននាក់នៅឆ្នាំ២០៣០ ។
ក្នុងនោះដែរ រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានបង្ហាញការគាំទ្រចំពោះគម្រោងវិនិយោគលើវិស័យទេសចរណ៍ និងអំពាវនាវឲ្យមានការវិនិយោគបន្ថែមទៀតប្រកបដោយគំនិតច្នៃប្រឌិត និងទទួលខុសត្រូវខ្ពស់ គោរពតាមបទដ្ឋានបរិស្ថាន និងគោលការណ៍ការណែនាំរបស់រាជរដ្ឋាភិបាលក្នុងការគ្រប់គ្រងតំបន់ឆ្នេរសមុទ្រ ដើម្បីឆ្លើយតបនឹងកំណើនទេសចរណ៍ និងនិរន្តរភាពទេសចរណ៍នាពេលបច្ចុប្បន្ន និងពេលអនាគត ៕
ចែករំលែកព័តមាននេះ