រាជធានីភ្នំពេញ ៖ បើទោះបីជាប្រព័ន្ធអនុគ្រោះពន្ធរបស់អឺរ៉ុបទំនិញគ្រប់យ៉ាងលើកលែងអាវុធ(EBA)មកលើកម្ពុជា កំពុងស្ថិតនៅក្នុងដំណាក់កាលមិនច្បាស់លាស់ក្តី ក៏ការបញ្ជាទិញផលិតផលសម្លៀកបំពាក់ និងស្បែកជើង ពីកម្ពុជាក្នុងឆ្នាំ២០១៩នេះ នៅតែមានស្ថានភាពជាធម្មតា ដោយមិនទាន់មានបញ្ហាណាមួយចោទនៅឡើយ ។…
រាជធានីភ្នំពេញ ៖ បើទោះបីជាប្រព័ន្ធអនុគ្រោះពន្ធរបស់អឺរ៉ុបទំនិញគ្រប់យ៉ាងលើកលែងអាវុធ(EBA)មកលើកម្ពុជា កំពុងស្ថិតនៅក្នុងដំណាក់កាលមិនច្បាស់លាស់ក្តី ក៏ការបញ្ជាទិញផលិតផលសម្លៀកបំពាក់ និងស្បែកជើង ពីកម្ពុជាក្នុងឆ្នាំ២០១៩នេះ នៅតែមានស្ថានភាពជាធម្មតា ដោយមិនទាន់មានបញ្ហាណាមួយចោទនៅឡើយ ។ នេះបើតាមអគ្គលេខាធិការរងសមាគមរោងចក្រកាត់ដេរកម្ពុជា (GMAC) ។
លោក កាំង ម៉ូនីកា អគ្គលេខាធិការរងរូបនេះ បានប្រាប់កោះសន្ដិភាពថា ការបញ្ជាទិញផលិតផលសម្លៀកបំពាក់ និងស្បែកជើងពីកម្ពុជាពីសំណាក់អ្នកបញ្ជាទិញក្រៅប្រទេសនៅតែមានភាពស្ថានភាពធម្មតា ដោយមិនមានអ្វីប្រែប្រួលនោះទេ ហើយកម្ពុជា នៅតែមានឱកាសក្នុងការទទួលបានការបញ្ជាទិញបន្ថែមពីក្រៅ
ប្រទេស ។ លោកបន្តថា ៖« ឱកាសដែលកម្ពុជានឹងទទួលបានបន្ថែមនោះដោយសារតែការបញ្ជាទិញមួយចំនួនបានងាកចេញពីប្រទេសចិន ដែលជាប្រទេសផលិតទំនិញមួយដ៏ធំនៅលើពិភពលោក ដូច្នេះប្រទេសការបញ្ជាទិញទាំងនោះនឹងងាកទៅរកប្រទេសផ្សេងៗក្រៅប្រទេសចិន ក្នុងនោះ កម្ពុជាក៏ជាប្រទេសមួយក្នុងការទទួលបានឱកាសទទួលបានការបញ្ជាទិញផងដែរ ។ តែទោះជាយ៉ាងណា កម្ពុជាក៏ត្រូវពង្រឹងផ្ទៃក្នុងរបស់ខ្លួនឲ្យកាន់តែរឹងមាំថែមទៀត »។លោកបន្តទៀតថា កាលពីមុន ការបញ្ជាទិញច្រើនតែទៅរកប្រទេសចិន ហើយចិនជាអ្នកផលិតដ៏ធំ តែបច្ចុប្បន្ននេះដោយសារតែកម្លាំងពលកម្មនៅប្រទេសចិនបានឡើងថ្លៃ ទើបលំហូរនៃការបញ្ជាទិញនៅប្រទេសចិនក៏ចាប់ផ្ដើមងាកចេញ ។
ប្រធានសភាសម្ព័ន្ធសហជីពជាតិកម្ពុជា លោក សោម អូន បានមានប្រសាសន៍ដែរថា រហូតមកដល់ពេលនេះ នៅក្នុងវិស័យកាត់ដេរកម្ពុជា មិនមានអ្វីប្រែប្រួលគួរឲ្យកត់សម្គាល់នោះទេ ហើយពាក់ព័ន្ធនឹងបញ្ហាផ្ដាច់កុងត្រាជាមួយកម្មករនៅតាមរោងចក្រខ្លះ វាជារឿងធម្មតាប៉ុណ្ណោះ ព្រោះការបញ្ជាទិញនៅចុងឆ្នាំ មានការប្រែប្រួលបន្តិចបន្តួច ដែលធ្វើឲ្យថៅកែរោងចក្រត្រូវព្យួរការងារកម្មករមួយរយៈ ហើយនឹងចាប់ផ្ដើមធ្វើការវិញនៅពេលមានការបញ្ជាទិញពីខាងក្រៅច្រើន ។
លោកបន្តថា នៅតាមបណ្ដារោងចក្រមួយចំនួននៅតែពិបាកស្វែងរកបុគ្គលិកកម្មករបម្រើការងារ ដូច្នេះវាអាចបញ្ជាក់យ៉ាងច្បាស់ស្ថានភាពវិស័យកាត់ដេររបស់កម្ពុជា ។ ម្យ៉ាងទៀត បញ្ហាEBAដែលធ្លាប់លើកឡើងកន្លងមកនោះ ក៏កម្មករហាក់គ្មានការភ័យព្រួយអ្វីឡើយ ព្រោះថារាជរដ្ឋាភិបាល មន្ត្រីជំនាញនានា ក៏កំពុងដោះស្រាយ និងឈានទៅរកការចរចាមួយដ៏សមស្របនៅពេលខាងមុខដ៏ខ្លីនេះ ។
ប្រធានសភាសម្ព័ន្ធសហជីពជាតិរូបនេះ បានបន្តទៀតថា បច្ចុប្បន្ននេះ រាជរដ្ឋាភិបាលបានខិតខំធ្វើកិច្ចការមួយចំនួន ដើម្បីទាក់ទាញ និងសម្រួលដល់វិនិយោគិន កំពុងវិនិយោគនៅក្នុងប្រទេសកម្ពុជា ដូចជាការលុបចោលស្ថាប័នកាំកុងត្រូលនៅតាមព្រំដែន និងលុបបំបាត់ស្ថាប័នកាំសាបជាដើម ដែលកិច្ចការនេះ គឺជាការកាត់បន្ថយការចំណាយមួយផ្នែករបស់អ្នករកស៊ីនៅក្នុងប្រទេសកម្ពុជា ហើយក៏ជាកត្តាទាក់ទាញបន្ថែមសម្រាប់វិនិយោគិនបរទេស ក៏ដូចជាវិនិយោគក្នុងស្រុក ។ លោកបន្ថែមថា ក្នុងវិស័យកាត់ដេរនាពេលបច្ចុប្បន្ននេះ មានកម្មករកម្មការិនី កំពុងបម្រើការប្រមាណ៩០ម៉ឺននាក់ដែលគិតជាទឹកប្រាក់វិញ ក្នុងមួយខែៗ ត្រូវចំណាយប្រមាណជាង២០០លានដុល្លារអាមេរិក និងអាចផ្ដល់ប្រយោជន៍ដល់ប្រជាពលរដ្ឋកម្ពុជាជាច្រើនលាននាក់ទៀតផងដែរ ។
លោកបញ្ជាក់ថា ចំណែកសង្គ្រាមពាណិជ្ជកម្ម អាមេរិក និងចិន ក៏អាចផ្ដល់ប្រយោជន៍ដល់កម្ពុជាមួយចំនួនផងដែរ ដូចជាវិនិយោគិនចាកចេញពីចិន និងងាកទៅរកប្រទេសណាដែលមានកម្លាំងពលកម្មទាបជាង និងងាកទៅរកប្រទេសណាដែលមិនជាប់ពាក់ព័ន្ធនឹងពន្ធពីសហរដ្ឋអាមេរិកជាដើម ។ យោងតាមរបាយការណ៍ធនាគារជាតិនៃកម្ពុជាកម្ពុជា បានបង្ហាញថា ក្នុងឆ្នាំ២០១៨កន្លងទៅនេះ ការនាំចេញសម្លៀកបំពាក់ និងស្បែកជើងពីកម្ពុជា មានទំហំទឹកប្រាក់សរុបប្រមាណ១០ប៊ីលានដុល្លារអាមេរិក ដែលធ្វើឲ្យផលិតផលនេះក្លាយជាផលិតផលនាំចេញធំជាងគេរបស់កម្ពុជា ។ ក៏ប៉ុន្តែ ទោះជាយ៉ាងណាក៏ដោយ សេដ្ឋវិទូមួយចំនួនបានផ្ដល់ជាទស្សនៈឲ្យកម្ពុជា មិនគួរនៅតែពឹងលើវានោះទេ ដោយត្រូវធ្វើពិពិធកម្មសេដ្ឋកិច្ចដើម្បីកំណើនចីរភាពនៃសេដ្ឋកិច្ច ៕
ចែករំលែកព័តមាននេះ