រាជធានីភ្នំពេញ ៖ កោះសន្តិភាពបានចេញផ្សាយ១ឈុតរួចហើយកាលពីម្សិលមិញពាក់ព័ន្ធទៅនឹងជ្រូកខ្វៃ នៅតែជាតម្រូវការខ្ពស់ក្នុងថ្ងៃសែនប្រពៃណីចិន ទោះបីឆ្នាំថ្មីនេះជាឆ្នាំកុរ «ជ្រូក» ក្តីក៏អ្នករស់នៅក្នុងរាជធានីភ្នំពេញជាប់សែស្រឡាយចិនមិនរុញរាទិញជ្រូកខ្វៃសម្រាប់យកទៅសែនព្រេនជូនជីដូនជីតាកុងម៉ា ដែលចែកឋានទៅបរលោកខាងមុខនោះដែរ ។
កាន់តែវិសេសវិសាលទៀតនោះនៅព្រឹកថ្ងៃទី០៤ ខែកម្ភៈ ២០១៩នេះបានកត់សម្គាល់ឃើញថា ជ្រូកខ្វៃលក់នៅផ្សារអូឬស្សីដាច់រហូតដល់ជិត៣០០០ក្បាល ដែលអ្នកលក់សប្បាយកើបលុយ ចំណែកអ្នកទិញទឹកភ្នែកទឹកសំបោទំរាំទិញបានជ្រូកខ្វៃយកទៅសែនត្រូវជូបឧបសគ្គ២ ចំណុចចំពោះមុខ ។ ឧបសគ្គទី១- ត្រូវជម្រៀត និងដណ្តើមគ្នាចូលទិញធ្វើយ៉ាងណាឲ្យខាងតែបាន ឧបសគ្គទី២- ម្នាក់ៗមានការតវ៉ាបែកញើស…ជោគខ្លួនស្រែកស្អកបំពង់ក រឿងអ្នកលក់តម្លើងថ្លៃកប់ពពក គឺជ្រូកខ្វៃ១ក្បាលតម្លៃពី២០០ទៅ៣៥០ដុល្លារអាមេរិកទើបទិញបានដែលថ្ងៃធម្មតាត្រឹមតែ៣៥ម៉ឺនរៀលតែប៉ុណ្ណោះ ប៉ុន្តែនេះជាឱកាសសម្រាប់អាជីវករលក់ជ្រូកខ្វៃពេលដល់រដូវបុណ្យទានម្តងៗ ។
តាមសម្តីលោក ហ៊ត វ៉ាន់ធី ប្រធានគណកម្មការផ្សារអូឬស្សីបានថ្លែងឲ្យដឹងថា ការស្រង់ស្ថិតិនៅព្រឹកថ្ងៃសែនចិននេះជ្រូកខ្វៃត្រូវបានអាជីវករនាំចូលមកលក់មានចំនួនជិត៣០០០ក្បាល និងដាច់ស្ទើតែអស់ទាំងស្រុងគ្រាន់ថា ថ្លៃបន្តិច ប៉ុន្តែអ្នកទិញយកទៅសែនហាក់ដូចជា គ្មានរុញរាទេពោល គឺជ្រូកខ្វៃឡើងថ្លៃអ្នកទិញនៅតែទិញ ហើយមនុស្សសម្រុកទិញនៅវេលាម៉ោងជិត៩និង១០ព្រឹក ។
លោក ហ៊ត វ៉ាន់ធី បានបន្តថា បើទោះបីអ្នកលក់ជ្រូកខ្វៃដឹកជ្រូកខ្វៃទាំងរ៉ឺម៉ក និងម៉ូតូចូលទៅលក់ និងអ្នកនៅភ្នំពេញមានមនុស្សម្នារពពាក់ពពូនគ្នាសម្រុកទិញជ្រូកខ្វៃយ៉ាងនេះក្តីចំពោះសណ្តាប់ធ្នាប់សាធារណៈចរាចរទៅមកជាធម្មតា គឺមិនធ្វើឲ្យបះពាល់ដល់អ្នកដំណើរនោះទេ ។ យ៉ាងណាក្តីបានកត់សម្គាល់ឃើញទៀតថា អ្នកលក់ជ្រូកខ្វៃបានដាក់តូបលក់ជ្រូកខ្វៃពាសពេញលើផ្លូវខាងកើតផ្សារអូឬស្សី និងចេញទៅលក់ដល់ផ្លូវហ្សាដឺហ្គោល ហើយអ្នកខ្លះបានដាក់តាំងលក់ជ្រូកខ្វៃនៅជាប់អគារអតីតសាលារៀនឯកជនសិង្ហបូរីក្បែរស្តុបរង្វង់មូលនាងគង្ហីងផងដែរ ។
ការបំបែកគ្នាលក់ជ្រូកខ្វៃនោះហាក់ដូចជា មានភាពងាយស្រួលចំពោះអ្នកទិញ ប៉ុន្តែមិនមានរបៀបរៀបបន្តិចសម្រាប់២ទៅ៣ម៉ោងនាពេលព្រឹកថ្ងៃចិនសែន ។ បានកត់សម្គាល់ទៀតថា ផ្សារអូឬស្សីទាំងមូលពេលព្រឹកថ្ងៃសែននេះត្រូវបានបិទទ្វាតូបលក់ដូរ មានចំនួន១៣៧០តូបត្រូវបានបិទទ្វាស្ទើរទាំងស្រុង មានលក់ដែរតែលក់តិចតួចបំផុត ប៉ុន្តែនោះមិនមែនគណកម្មការផ្សារសម្រេចចិត្តបិទទេ ដោយមូលហេតុអាជីវករលក់ដូរមិនទៅលក់ព្រោះជាប់រវល់សែនទាំងអស់គ្នា ៕
ចែករំលែកព័តមាននេះ