ខេត្តស្វាយរៀង ៖ ជនជាតិអ៊ីស្រាអែលម្នាក់ត្រូវបានកម្លាំងសមត្ថកិច្ចចម្រុះឃាត់ខ្លួនបាន ក្នុងផ្ទះសំណាក់មួយ ស្ថិតក្នុងភូមិមេភ្លើង សង្កាត់ស្វាយរៀង ក្រុងស្វាយរៀង រួមជាមួយគ្រឿងញៀននិងវត្ថុតាងមួយចំនួន ហើយត្រូវបានបញ្ជូនទៅសាកសួរនៅស្នងការដ្ឋាននគរបាលខេត្តស្វាយរៀង ដើម្បីរៀបចំសំណុំរឿងបញ្ជូនទៅតុលាការ…
ខេត្តស្វាយរៀង ៖ ជនជាតិអ៊ីស្រាអែលម្នាក់ត្រូវបានកម្លាំងសមត្ថកិច្ចចម្រុះឃាត់ខ្លួនបាន ក្នុងផ្ទះសំណាក់មួយ ស្ថិតក្នុងភូមិមេភ្លើង សង្កាត់ស្វាយរៀង ក្រុងស្វាយរៀង រួមជាមួយគ្រឿងញៀននិងវត្ថុតាងមួយចំនួន ហើយត្រូវបានបញ្ជូនទៅសាកសួរនៅស្នងការដ្ឋាននគរបាលខេត្តស្វាយរៀង ដើម្បីរៀបចំសំណុំរឿងបញ្ជូនទៅតុលាការ ។
បើតាមលោកវរសេនីយ៍ឯកកែវ សុថា ស្នងការរងទទួលផែនការងារប្រឆាំងគ្រឿងញៀន ប្រតិបត្តិការបង្ក្រាបបទល្មើសគ្រឿងញៀនខាងលើត្រូវបានធ្វើឡើង នាថ្ងៃទី០៣ ខែកុម្ភៈ ឆ្នាំ២០១៩ ក្នុងផ្ទះសំណាក់ជីងឡុង ក្រោយពីសមត្ថកិច្ចជំនាញបានទទួលព័ត៌មានពីម្ចាស់ផ្ទះសំណាក់ថា មានការសង្ស័យលើជនបរទេសមកស្នាក់នៅបន្ទប់ជួលខាងលើ ។
លោកវរសេនីយ៍ឯកកែវសុថា បានបន្តថា ដោយមានការសុំសម្របសម្រួលពីលោកគង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តកម្លាំងការិយាល័យប្រឆាំងគ្រឿងញៀនសហការជាមួយការិយាល័យអន្តោប្រវេសន៍មន្ទីរសុខាភិបាលខេត្តអធិការដ្ឋាននគរបាលក្រុងស្វាយរៀងនិងអាជ្ញធរមូលដ្ឋានពាក់ព័ន្ធចុះបង្ក្រាបមុខសញ្ញាសង្ស័យរក្សាទុកសារធាតុគីមីផ្សំ និងប្រើប្រាស់គ្រឿងញៀនបានម្នាក់ និងបញ្ជូនទៅសាកសួរ និងធ្វើតេស្តទឹកនោមលទ្ធផលមានជាតិកញ្ឆា ។
ជនជាតិអ៊ីស្រាអែលនោះមានឈ្មោះ Trillessky Ran ភេទប្រុស អាយុ៤១ឆ្នាំ កាន់លិខិតឆ្លងដែនលេខ ២៣២៩៣៤១២ ចុះថ្ងៃទី១០ ខែសីហា ឆ្នាំ២០១៧ ។ ចំណែកវត្ថុតាងដែលសមត្ថកិច្ចដកហូតបានរួមមាន ម៉ូតូ១គ្រឿង ទូរស័ព្ទដៃ៣គ្រឿង កុំព្យូទ័រយួរដៃ២គ្រឿង ម្សៅ Depakine chrono មានសារធាតុជាមេតំហ្វេតាមីន ចំនួន១កញ្ចប់ធំ រុក្ខជាតិ និងសារធាតុគីមីផ្សំចំនួន២១មុខផ្សេងទៀត ថ្នាំពេទ្យគ្រប់ប្រភេទជាង ២.៣គីឡូក្រាម (បានប្រគល់ឱ្យមន្ទីរសុខាភិបាលរក្សាទុក)ថវិកា និងសម្ភារៈមួយចំនួនផងដែរ ។
បច្ចុប្បន្នករណីនេះសមត្ថកិច្ចជំនាញកំពុងធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តស្វាយរៀងចាត់ការតាមនីតិវិធី ។ ចំពោះរុក្ខជាតិ និងសារធាតុគីមីផ្សំខាងលើសមត្ថកិច្ចបានរៀបចំបញ្ជូនមួយផ្នែកទៅអាជ្ញាធរជាតិ ដើម្បីធ្វើកោសល្យវិច្ច័យ ៕
ចែករំលែកព័តមាននេះ