រាជធានីភ្នំពេញ ៖ បុរស៣នាក់ជិះម៉ូតូមួយក្នុងល្បឿនលឿនមិនប្រយ័ត្នជ្រុលទៅបុកគូទរថយន្តដែលខូចចតតាមផ្លូវ បណ្តាលអោយបុរសម្នាក់ស្លាប់នៅកន្លែងកើតហេតុ ចំណែកបុរស២នាក់ទៀតបានរងរបួសធ្ងន់ ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី៣ ខែកុម្ភៈ ឆ្នាំ២០១៩ នៅតាមបណ្ដោយផ្លូវវេងស្រេង ទល់មុខផែស្ងួតសូងួន ស្ថិតនៅភូមិចោមចៅ២ សង្កាត់ចោមចៅទី២ ខណ្ឌពោធិ៍សែនជ័យ ។
រថយន្តដែលខូចចតតាមផ្លូវជាប្រភេទរថយន្តសណ្តោងកុងតឺន័រ ពណ៌ត្រួយចេក ពាក់ស្លាកលេខ ភ្នំពេញ ៣D-២៤៨២ ។ ចំណែកភាគីខាងម៉ូតូមួយគ្រឿងជិះគ្នា៣នាក់ ម៉ាកឃ្លិក ពណ៌ស ពាក់ស្លាកលេខ បាត់ដំបង ១AB-៣៨៩៨ បើកបរដោយឈ្មោះ សុង គីមឡង ភេទប្រុស អាយុ២៦ឆ្នាំ មុខរបរកម្មកររោងចក្រ រស់នៅបុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ បានស្លាប់នៅនឹងកន្លែងកើតហេតុ។ រីឯអ្នករួមដំណើរ២នាក់ទៀតដែលរងរបួសធ្ងន់មិនត្រូវបានស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេដឹងថារថយន្តកុងតឺន័រខាងលើខូចនៅតាមផ្លូវជាច្រើនម៉ោងមកហើយ បន្ទាប់មកក៏បានយកតង់កៅស៊ូដាក់ខាងក្រោយរថយន្តផងដែរ តែពុំមានភ្លើងបំភ្លឺផ្លូវឡើយ លុះមកដល់ម៉ោងកើតហេតុ ស្រាប់តែឃើញបុរស៣នាក់ខាងលើជិះម៉ូតូមួយគ្រឿងម៉ាកឃ្លីក ធ្វើដំណើរក្នុងទិសដៅពីលិចទៅកើតស្របជាមួយរថយន្តដែលកំពុងឈប់ចត ហើយមិនបានជាន់ហ្វ្រាំងក៏បានបុកពីក្រោយរថយន្តពេញទំហឹង បណ្តាលឲ្យអ្នកបើកបរម៉ូតូស្លាប់នៅកន្លែងកើតហេតុភ្លាមៗផងដែរ ចំណែកអ្នករួមដំណើរ២នាក់ទៀតរងរបួសធ្ងន់ ត្រូវបានរថយន្តសង្គ្រោះឯកជនដឹកយកទៅសង្គ្រោះភ្លាមៗនៅមន្ទីរផងដែរ។
បន្ទាប់មកជំនាញចរាចរណ៍រាជធានីភ្នំពេញបានចុះធ្វើការវាស់វែង និងយករថយន្ត រួមទាំងម៉ូតូទៅរក្សាទុកនៅផ្នែកចរាចរណ៍ផ្លូវគោករាជធានីភ្នំពេញដើម្បីរង់ចាំការដោះស្រាយថ្ងៃក្រោយ ។
ចំណែកសពជនរងគ្រោះត្រូវបានសមត្ថកិច្ចនគរបាលចរាចរណ៍ផ្លូវគោករាជធានីភ្នំពេញ ប្រគល់អោយក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ។
ក្រោយពេលកើតហេតុ ជំនាញចរាចរណ៍ផ្លូវគោករាជធានីភ្នំពេញបានចុះទៅសាកសួរ និងធ្វើកំណត់ហេតុដោយជនរងគ្រោះរងរបួសធ្ងន់ដែលសំរាកនៅមន្ទីរពេទ្យឯកជនបាននិយាយថា ពួកគាត់ទើបចេញពីខារ៉ាអូខេនៅម្តុំជ្រែកោង ហើយត្រឡប់ទៅផ្ទះវិញ ក៏ជួបគ្រោះថ្នាក់បែបនេះតែម្តង ៕
ចែករំលែកព័តមាននេះ