ខេត្ដបន្ទាយមានជ័យ ៖ យុវជនម្នាក់បានរងរបួសយ៉ាងធ្ងន់ ខណៈពេលជិះម៉ូតូឆ្លងផ្លូវមិនប្រយ័ត្នត្រូវរថយន្តបុកបណ្តាលឲ្យរងរបួសធ្ងន់ ។ ហេតុការណ៍នេះបានកើតឡើងនៅថ្ងៃទី០២ ខែកុម្ភៈ ឆ្នាំ២០១៩ វេលាម៉ោង៩និង៥៦នាទីយប់ លើផ្លូវជាតិលេខ៥ ចន្លោះបង្គោលគីឡូម៉ែត្រលេខ៣៧២-៣៧៣ ស្ថិតក្នុងភូមិថ្មីឃុំសំរោង ស្រុកអូរជ្រៅ ខេត្ដបន្ទាយមានជ័យ ។
លោកវរសេនីយ៍ទោ សែស វិបុល អធិការនគរបាលស្រុកអូរជ្រៅបានឲ្យដឹងថា ជនរងគ្រោះ ឈ្មោះ វឿន ចាន់រិត ភេទប្រុស អាយុ២៤ឆ្នាំ នៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ បើកបរម៉ូតូម៉ាកហុងដាទ្រីម ពណ៌ខ្មៅ ផ្លាកលេខ ផ.៨៥៥៧ ។ ចំណែករថយន្តម៉ាសាំយ៉ុងផលិតឆ្នាំ១៩៩៩ ពណ៌ស ពាក់ស្លាកលេខភ្នំពេញ 2T- 0218 បើកបរដោយឈ្មោះ ខ្នា វ៉ាន់នី ភេទប្រុស អាយុ២៧ឆ្នាំ នៅភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ ។
លោកអធិការបានបន្តថា មុនពេលកើតហេតុអ្នកបើកបរម៉ូតូបានបើកឆ្លងកាត់ទ្រូងផ្លូវក្នុងទិសដៅពីជើងទៅត្បូងស្របពេលនោះក៏មានរថយន្តម៉ាកសាំងយ៉ុង១គ្រឿងបានបើកមកពីទិសដៅពីលិចទៅកើតបុកពេញទំហឹង បណ្តាលឲ្យអ្នកបើកបរម៉ូតូមិនពាក់មួកសុវត្ថិភាព បែកក្បាលទៅនឹងថ្នល់រងរបួសធ្ងន់ត្រូវបានដឹកទៅសង្គ្រោះភ្លាមនៅមន្ទីរពេទ្យ ។
ចំពោះហេតុបង្កឲ្យមានគ្រោះថ្នាក់នេះ គឺបណ្តាលមកពីអ្នកបើកបរម៉ូតូមិនឆ្លងទ្រូងថ្នល់មិនប្រយ័ត្នក្នុងស្ថានភាពគ្រោះថ្នាក់ ។ វត្ថុតាងម៉ូតូ និងរថយន្តត្រូវបានកម្លាំងនគរបាលជំនាញ អធិការដ្ឋានស្រុកអូរជ្រៅយកមករក្សាទុក ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ