រាជធានីភ្នំពេញ ៖ ស្ត្រីម្នាក់បានចិត្តចងកសម្លាប់ខ្លួន បង្កអោយមានការភ្ញាក់ផ្អើលកើតឡើងឡើងកាលពីវេលាម៉ោង៥ល្ងាចថ្ងៃទី៣ ខែកុម្ភៈ ឆ្នាំ២០១៩ នៅចំណុចផ្ទះរបស់ជនរងគ្រោះជាន់ឡៅតឿ ផ្លូវបេតុង ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ ។
ជនរងគ្រោះដែលស្លាប់ឈ្មោះ ខៀវ ដារ៉ា ភេទស្រី អាយុ២២ឆ្នាំ មុខរបរលក់ដូរ ស្នាក់នៅផ្ទះអត់លេខ ក្រុម៣ ភូមិ អូរអណ្តូង១ សង្កាត់ ព្រែកប្រា ខណ្ឌច្បារអំពៅ ហើយស្ត្រីរងគ្រោះទើបតែរៀបការបានជាង៣ខែប៉ុណ្ណោះ ចំណែកបុរសជាប្តីមិនបានអោយដឹងឈ្មោះ ។
តាមសម្តីបុរសជាប្តីបានអោយដឹងថា នៅថ្ងៃសំរាកពីការងារ គាត់នៅផ្ទះជាមួយប្រពន្ធ និងម្តាយក្មេកបានអង្គុយលក់ដូរនៅមុខផ្ទះដូចសព្វដង ពេលនោះដែរប្រពន្ធរបស់គាត់ក៏បានឡើងទៅដេកនៅក្នុងបន្ទប់របស់ខ្លួនជាន់ឡៅតឿ ដោយមិនមានរឿងហេតុអ្វីកើតឡើងនោះទេ ។
ប្រភពដដែលបានបន្តថា លុះមកដល់វេលាកើតហេតុ គាត់ឆ្ងល់ថា ប្រពន្ធដេកយូៗម្ល៉េះ ក៏ឡើងទៅគោះទ្វារហៅ តែពេលឡើងទៅដល់ ស្រាប់តែទ្វារចាក់គន្លឹះពីក្នុង ទោះគាត់ខំស្រែកហៅក៏គ្មានអ្នកឆ្លើយ ។
ពេលនោះដែរ គាត់ក៏បានដើរឆ្លងតាមវេរ៉ង់ដាបើកបង្អួចមើល ក៏ស្រាប់តែឃើញប្រពន្ធរបស់គាត់បានយកក្រមាចងកជាប់នឹងដែកបង្អួច មិនថាស្លាប់ ឬរស់នោះទេ ហើយគាត់ក៏ស្រែកផ្អើលឆោឡោ និងស្រាយក្រមាចេញ រួចយកប្រពន្ធទៅសង្គ្រោះនៅមន្ទីពេទ្យ តែអកុសលពេលទៅមន្ទីពេទ្យ គ្រូពេទ្យប្រាប់ថា ប្រពន្ធរបស់គាត់បានស្លាប់បាត់ទៅហើយ ។
ប្រភពដដែលបានបន្តទៀតថា គាត់មិនដឹងថា ប្រពន្ធរបស់គាត់មានជំងឺប្រចាំកាយអ្វីនោះទេ មានតែម្តាយបង្កើតរបស់ស្ត្រីរងគ្រោះទើបដឹង ហើយប៉ុន្មានថ្ងៃមុន ប្រពន្ធរបស់គាត់បាននិយាយប្រាប់ថា «ជំងឺអូនធ្ងន់ហើយ» លុះមកដល់ពេលនេះ ប្រពន្ធរបស់គាត់បានសំរេចចិត្តចងកសម្លាប់ខ្លួនចោលគាត់តែម្តងទៅ ។
ពាក់ព័ន្ធនឹងហេតុការណ៍ខាងលើនេះដែរ រហូតដល់វេលាម៉ោង៨និង៣០នាទីយប់ថ្ងៃដដែលទើបដំណឹងនេះបានលឺដល់សមត្ថកិច្ចប៉ុស្តិ៍នគរបាលព្រែកប្រាចុះទៅពិនិត្យ និងធ្វើកំណត់ហេតុ រួចបានទំនាក់ទំនងហៅខាងជំនាញកោសល្យវិច្ច័យរាជធានីភ្នំពេញដើម្បីចុះទៅពិនិត្យសពអោយបានជាក់លាក់ ។
ក្រោយពេលកើតហេតុ ក្រុមគ្រួសារជនរងគ្រោះមិនបានប្តឹងផ្តល់រឿងអ្វីនោះទេ ហើយសមត្ថកិច្ចជំនាញក៏បានបញ្ជាក់ផងដែរថា ករណីនេះមិនមានជាប់ពាក់ព័ន្ធអំពើឃាតកម្មអ្វីនោះទេ គឺជនរងគ្រោះពិតជាបានចងកសម្លាប់ខ្លួនប្រាកដមែន ។ បន្ទាប់មកសមត្ថកិច្ចក៏បានប្រគល់សពជនរងគ្រោះអោយក្រុមគ្រួសារដើម្បីចាត់ចែងធ្វើបុណ្យតាមប្រពៃណីនៅផ្ទះជនរងគ្រោះផ្ទាល់តែម្តង ៕
ចែករំលែកព័តមាននេះ