រាជធានីភ្នំពេញ ៖ បន្ទាប់ពីងើបឡើងវិញពីវិបត្តិហិរញ្ញវត្ថុកាលពីជាង១ទសវត្សរ៍មុនមក វិស័យអចលនទ្រព្យបានបន្ដរើបឡើងបន្ដិចម្ដងៗរហូតដល់រយៈពេលពីរបីឆ្នាំចុងក្រោយនេះ គឺមានសន្ទុះរីកចម្រើនខ្លាំងមែនទែន ទាំងវិស័យសំណង់ និងសកម្មភាពទិញលក់ដីធ្លី ។ ទន្ទឹមនឹងការរីកចម្រើននេះ ក៏មានការលើកឡើងពីហានិភ័យដែលអាចកើតមានផងដែរ…
រាជធានីភ្នំពេញ ៖ បន្ទាប់ពីងើបឡើងវិញពីវិបត្តិហិរញ្ញវត្ថុកាលពីជាង១ទសវត្សរ៍មុនមក វិស័យអចលនទ្រព្យបានបន្ដរើបឡើងបន្ដិចម្ដងៗរហូតដល់រយៈពេលពីរបីឆ្នាំចុងក្រោយនេះ គឺមានសន្ទុះរីកចម្រើនខ្លាំងមែនទែន ទាំងវិស័យសំណង់ និងសកម្មភាពទិញលក់ដីធ្លី ។ ទន្ទឹមនឹងការរីកចម្រើននេះ ក៏មានការលើកឡើងពីហានិភ័យដែលអាចកើតមានផងដែរ បើទោះជាអ្នកនៅក្នុងវិស័យនេះមានសុទិដ្ឋិនិយមពីការបន្ដរីកលូតលាស់រយៈពេលមធ្យមទៅមុខទៀតក៏ដោយ ។ តើក្នុងរយៈមធ្យមទៅមុខ វិស័យនេះនៅតែបន្ដមានសុខភាពល្អ ឬយ៉ាងណា ?
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លើកឡើងថា វិស័យអចលនទ្រព្យកម្ពុជារឹងមាំ ឬរីកចម្រើនទៅបានផ្អែកទៅលើកត្តាសំខាន់ពីរ គឺការទាក់ទាញអ្នកវិនិយោគមកពីបរទេស និងការគាំទ្រផ្នែកហិរញ្ញវត្ថុពីប្រព័ន្ធធនាគារ ។ បើធនាគារនៅតែគាំទ្រដូចសព្វថ្ងៃ វិស័យអចលនទ្រព្យគឺនៅតែរឹងមាំ ។
លោក ច្រឹក សុខនីម ប្រធានសមាគមរូបនេះ បានមានប្រសាសន៍ក្នុងសន្និសីទសារព័ត៌មានស្តីពី ស្ថានភាពអចលនទ្រព្យកម្ពុជានៅពេលបច្ចុប្បន្ននិងអនាគតកាលពីអំឡុងពាក់កណ្ដាលខែមករា ថា ៖« ខ្ញុំធ្លាប់ព្យាករណ៍ហើយ នៅក្នុងរយៈពេល១០ឆ្នាំទៀត វិស័យអចលនទ្រព្យកម្ពុជាគ្មានបញ្ហានោះទេ ។ នៅពេល៥ឆ្នាំដំបូងរឹតតែរឹងមាំល្អ តែនៅពេលដល់២០ទៅ៣០ឆ្នាំ យើងត្រូវធ្វើការដោយការប្រុងប្រយ័ត្ន ។ កំណើននៅក្នុងវិស័យអចលនទ្រព្យសព្វថ្ងៃនេះ សម្រាប់ខ្ញុំវាគ្រាន់តែសារពញ្ញាក់ស្មារតីឱ្យដឹងឬប្រុងប្រយ័ត្នប៉ុណ្ណោះ វាមិនទាន់ដល់ពេលបារម្ភនោះទេ »។ លោកមានប្រសាសន៍ថា ៖« ខ្ញុំនៅតែមានសុទិដ្ឋិនិយមក្នុងវិស័យនេះ ដោយសារតម្លៃនៃសុខសន្តិភាព និងស្ថិរភាពនយោបាយដែលជាមូលដ្ឋានដ៏សំខាន់នៃការរីកចម្រើនក្នុងវិស័យនេះ»។ លោកថា ៖« កំណើនក្នុងវិស័យនេះ មានសុខភាពល្អជាងមុន ទោះជាអត្រាតម្លៃស្ថិតក្នុងកំណើនមធ្យមក្តី »។
លោក វ៉ា វីរៈ អ្នកជំនាញផ្នែកអចលនទ្រព្យអន្តរជាតិ និងជានាយកប្រតិបត្តិនៃក្រុមហ៊ុនCentury21 Fortuna Investmentបានសម្តែងសុទិដ្ឋិនិយមផងដែរថា ដោយសារកំណើនសេដ្ឋកិច្ច និងប្រាក់ចំណូលរបស់ប្រជាពលរដ្ឋកើនឡើងខ្ពស់ លោកនៅតែមានជំនឿក្នុងវិស័យនេះ ដែលនឹងបន្តមានភាពរីកចម្រើនខ្លាំងថែមទៀត ពិសេសតម្លៃដីធ្លីនឹងបន្តហក់ឡើងមួយកម្រិតទៀត នៅក្នុងទីក្រុង ជាយក្រុង និងបណ្តាខេត្តដែលមានសក្តានុពលសេដ្ឋកិច្ចដូចជា ខេត្តព្រះសីហនុ កំពត កែប និងខេត្តកោះកុងជាដើម ។
លោកបន្តថា ៖« ចរន្តទិញលក់ដីធ្លីនឹងមានការកើនឡើង ហេតុនេះតម្លៃដីធ្លីនឹងសម្រេចបានកំណើនខ្ពស់បន្ថែមទៀត »។
ធនាគារជាតិនៃកម្ពុជា កាលពីដើមខែមករា បានចេញរបាយការណ៍មួយ ស្ដីពីទស្សនវិស័យសេដ្ឋកិច្ចកម្ពុជា ដោយក្នុងនោះមានចំណុចមួយបានបញ្ជាក់ថា កំណើនឥណទានទៅកាន់វិស័យសំណង់និងអចលនទ្រព្យនៅតែបន្តមានកម្រិតខ្ពស់ ក្នុងអត្រាប្រមាណ៣១% ហើយការកើនឡើងល្បឿននៃវិស័យសំណង់និងអចលនទ្រព្យ អាចធ្វើឲ្យតម្លៃអចលនទ្រព្យកើនឡើងហួសពីតម្រូវការជាក់ស្ដែង និងអាចជាហានិភ័យសម្រាប់វិស័យធនាគារ និងជំនឿទុកចិត្តវិនិយោគិនផងដែរ ។
យោងតាមធនាគារជាតិ ក្នុងឆ្នាំ២០១៨ ប្រព័ន្ធធនាគារនិងហិរញ្ញវត្ថុ បានចាក់បញ្ចូលឬផ្តល់ឥណទានទៅក្នុងវិស័យសំណង់ មានប្រមាណ១៣% ក្នុងនោះការផ្តល់ឥណទានរបស់គ្រឹះស្ថានធនាគារមាន៩,១% និងគ្រឹះស្ថានមីក្រូហិរញ្ញវត្ថុមានប្រមាណ៤%។ របាយការណ៍ដដែលបញ្ជាក់ថា ៖« វិស័យអចលនទ្រព្យមានទំនាក់ទំនងយ៉ាងជិតស្និទ ជាមួយវិស័យធនាគារ ដោយសារឥណទានភាគច្រើនពឹងផ្អែកលើទ្រព្យបញ្ចាំជាអចលនវត្ថុ។ ឥណទានទៅកាន់វិស័យអចលនទ្រព្យបន្តមានកំណើនខ្ពស់ក្នុងអត្រាប្រមាណ៣១% ដែលអាចបង្កប់នូវហានិភ័យខ្ពស់ ដោយសារការប្រែប្រួលថ្លៃនៃវិស័យអចលនទ្រព្យ ពិសេស ការឆ្លៀតឱកាសកេងចំណេញ និងហេតុការណ៍ផ្សេងៗ ។ ក្នុងស្ថានភាពនេះ កំណើនទំហំឥណទានទៅកាន់វិស័យអចលនទ្រព្យអាចបង្កជាហានិភ័យចំពោះស្ថិរភាពហិរញ្ញវត្ថុ ប្រសិនបើមិនទាន់មានការគ្រប់គ្រងបានល្អប្រសើរ ។
របាយការណ៍នេះ ក៏ស្របជាមួយនឹងសេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជា លោក លី សូដេត ដែលបានលើកឡើងកាលពីខែធ្នូដែរថា វិស័យសំណង់និងអចលនទ្រព្យនៅក្នុងប្រទេសកម្ពុជា វាបានកើនឡើងជាបន្តបន្ទាប់អស់រយៈពេលជាង១០ឆ្នាំមកហើយ ដូច្នេះ វានឹងមានវដ្ដពេលណានោះ គ្មានអ្នកណាអាចដឹងបានឡើយ តែយ៉ាងណា វិនិយោគិន និងរាជរដ្ឋាភិបាល ត្រូវបង្កើនការប្រុងប្រយ័ត្នឲ្យបានខ្ពស់ពីការវិនិយោគលើវិស័យអចលនទ្រព្យ បើមិនចង់ឲ្យមានបញ្ហាធ្ងន់ដល់សេដ្ឋកិច្ចកម្ពុជា ។
លោកបានថ្លែងថា ៖« ចាប់តាំងពីវិបត្តិសេដ្ឋកិច្ចពិភពលោក វិស័យសំណង់និងអចលនទ្រព្យ បានកើនឡើងរហូត ដូច្នេះកំណើននេះមិនប្រាកដថា វានឹងកើនឡើងបន្តទៀតរហូតនោះទេ ព្រោះវិស័យសំណង់ និងអចលនទ្រព្យ តែងតែឆ្លងកាត់នូវខួបរបស់វា មានន័យថា នៅពេលវាឡើងដល់ចំណុចកំពូល វានឹងធ្លាក់ចុះមកវិញ តែគ្មាននរណាម្នាក់អាចដឹងថា វាដល់កំពូលនៅពេលណានោះទេ ហើយសម្រាប់បច្ចុប្បន្ននេះ តម្លៃអចលនទ្រព្យ និងសំណង់ក៏កំពុងតែមានកំណើនខ្លាំង ដែលធ្វើឲ្យការទទួលកម្ចីពីធនាគារ កាន់តែច្រើន និងអាចមានហានិភ័យកាន់តែខ្ពស់ ដូច្នេះត្រូវការពារឲ្យបាននូវសុខភាពវិស័យហិរញ្ញវត្ថុ ដើម្បីការពារបញ្ហាសេដ្ឋកិច្ច » ៕
ចែករំលែកព័តមាននេះ