ខេត្តព្រះសីហនុ ៖ សមិទ្ធផលថ្មីមួយទៀតជាប្រភេទស្ពានឆ្លងកាត់ផ្លូវជាតិលេខ០៤ ត្រង់ចំនុចមុខរោងចក្រញូស្តា ស្ថិតក្នុងភូមិ០១ សង្កាត់លេខ០១ ក្រុងព្រះសីហនុ គ្រោងនឹងបើកការដ្ឋានស្ថាបនា នាខែមិនាខាងមុខនេះ ។…
ខេត្តព្រះសីហនុ ៖ សមិទ្ធផលថ្មីមួយទៀតជាប្រភេទស្ពានឆ្លងកាត់ផ្លូវជាតិលេខ០៤ ត្រង់ចំនុចមុខរោងចក្រញូស្តា ស្ថិតក្នុងភូមិ០១ សង្កាត់លេខ០១ ក្រុងព្រះសីហនុ គ្រោងនឹងបើកការដ្ឋានស្ថាបនា នាខែមិនាខាងមុខនេះ ។ បើយោងតាមការបញ្ជាក់ពីឯកឧត្តម យន្ត មីន អភិបាលខេត្តថ្លែងបញ្ចាក់ប្រាប់បណ្តាញព័ត៌មាន ក្នុងឪកាសចុះពិនិត្យទីតាំងស្ថាបនាស្ពាន កាលពីចុងសប្តាហ៍កន្លងទៅនេះ ។
ថ្លែងក្នុងឪកាសចុះកំណត់ទីតាំងស្ពានឆ្លងកាត់ផ្លូវជាតិលេខ០៤ នេះផងដែរឯកឧត្តម យន្ត មីន អភិបាលខេត្តព្រះសីហនុគូសបញ្ជាក់ថា ដោយមើលឃើញការអំពីហានិភ័យ កើតឡើង ជាយថាហេតុ ជុំវិញករណីគ្រោះថ្នាក់ចរាចរណ៍ដល់កូនៗក្មួយៗបងប្អូនជាកម្មករកម្មារិនី ក៏ដូចជា ប្រជាពលរដ្ឋនៅតំបន់ ជាពិសេស ដើម្បីកាត់បន្ថយនូវការកកស្ទះចរាចរណ៍ ដល់កូនៗក្មួយៗបងប្អូនជាកម្មករកម្មារិនីចូល និងចេញពីធ្វើការទើបរដ្ឋបាលខេត្តបានសម្រេចលើកយកគម្រោងសាងសង់ស្ពានឆ្លងផ្លូវជាតិលេខ០៤ ត្រង់ចំនុចមុខរោងចក្រញ៉ូស្តា មកសិក្សានឹងសម្រេចការចាប់ផ្តើមបើកការដ្ឋាននៅខែមិនាខាងមុខនេះ ប្រសិនបើពុំមានករណីចាំបាច់ និងអនុវត្តន៍តាមការគ្រោងទុក ។
តាមរយៈការស្ថាបនាស្ពាននេះផងដែរនឹងអាចជួយសម្រួលដល់ក្មួយៗបងប្អូនជាកម្មករ កម្មារិនី និងបងប្អូនប្រជាពលរដ្ឋបានមួយកម្រិតផងដែរជុំវិញការកកស្ទះចរាចរណ៍ និង ករណីគ្រោះថ្នាក់ចរាចរណ៍ដែលតែងតែកើតបានជាញឹកញ៉ាប់ ។
ដោយឡែកលោក ណុប ហេង ប្រធានមន្ទីរសាធារណៈការណ៍ និងដឹកជញ្ជូនខេត្តព្រះសីហនុ បានអោយដឹងថា តាមគម្រោងនៃការស្ថាបនាស្ពានឆ្លងកាត់ផ្លូវនេះនឹងចាប់ផ្តើមនៅខែក្រោយ ។ ស្ពានមួយនេះមានកម្ពស់០៥ម៉ែត្រ ប្រវែង២៥ម៉ែត្រ ទទឹង០៣ម៉ែត្រគ្រោងចំណាយថវិកា ប្រមាណជាង១០ម៉ឺនដុល្លារអាមេរិក ដែលថវិកានៃការសាងសង់នេះមួយភាគធំ ជាបន្ទុករបស់រដ្ឋបាលខេត្ត និងមួយចំនួនទៀតបានមកពីសប្បុរសជននានាជុំវិញខេត្ត ។
ចែករំលែកព័តមាននេះ