រាជធានីភ្នំពេញ ៖ បុរស២នាក់ជិះម៉ូតូមួយគ្រឿងឌុបគ្នាត្រូវរថយន្ដមិនស្គាល់ម៉ាកបើកកៀរបណ្ដាលអោយដួលធ្លាក់អ្នកអង្គុយពីក្រោយចូលក្រោមកង់រថយន្ដកិនស្លាប់ភ្លាមៗ និងម្នាក់ទៀតរងរបួសស្រាល ចំណែករថយន្ដបង្កក្រោយពីបង្កហេតុបន្ថែមល្បឿនបើកគេចខ្លួនបាត់ ។
ហេតុការណ៍នេះបង្កការភ្ញាក់ផ្អើល កាលពីវេលាម៉ោង១១និង២០នាទីយប់ ថ្ងៃទី០២ ខែកុម្ភៈ ឆ្នាំ២០១៩ ស្ថិតតាមបណ្ដោយផ្លូវវ៉េងស្រេង ត្រង់ចំនុចស្ដុបលូប្រាំ ក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ ។
សពជនរងគ្រោះមានឈ្មោះ ឡាង ភេទប្រុស អាយុ២៣ឆ្នាំ មុខរបរជាងដែក ស្នាក់នៅម្ដុំទួលពង្រ ខណ្ឌពោធិ៍សែនជ័យ និងមានស្រុកកំណើតភូមិគ្រាំងដៃ ឃុំធ្លក ស្រុកទ្រាំង ខេត្តតាកែវ ។
បើតាមប្រភពពីជនរងគ្រោះម្នាក់ជាអ្នកឌុបបានប្រាប់អោយដឹងថា មុនពេលកើតហេតុពួកគាត់ទាំង២នាក់បានម៉ូតូម៉ាកហុងដាឌ្រីមសង់ ស៊េរី២០១៥ ពណ៌ខ្មៅ ពាក់ស្លាកភ្នំពេញ 1M-0483 ចេញពីផឹកស៊ី នៅម្ដុំទួលពង្រហើយគិតថា ទៅដើរលេងនៅកោះពេជ្យ តែពេលជិះម៉ូតូឌុបគ្នាមកដល់ស្តុបលូប្រាំ ក៏នាំគ្នាបត់ត្រឡប់ក្រោយវិញ ព្រោះគិតថា ខ្លាចយប់ជ្រៅពេកធ្វើការមិនកើត ។
ប្រភពដដែលបានបន្តថា ពេលដែលបត់ត្រឡប់ក្រោយបានប្រហែល២០ទៅ៣០ម៉ែត ក៏ត្រូវរថយន្ដធន់ធំមិនចាំម៉ាកមួយគ្រឿង បើកមកកៀរបណ្ដាលឲ្យដួល និងធ្វើអោយអ្នកអង្គុយខាងក្រោយធ្លាក់ចូលក្រោមកង់រថយន្ដកិនស្លាប់ភ្លាមៗតែម្ដង ។
ក្រោយពីតហេតុជនរងគ្រោះដែលរងរបួសត្រូវបានបញ្ជូនទៅសង្គ្រោះនៅមន្ទីរពេទ្យ រីឯសពជនរងគ្រោះម្នាក់ទៀតសមត្ថកិច្ចធ្វើការទំនាក់ទំនងទៅក្រុមគ្រួសារអោយមកទទួលយកទៅធ្វើបុណ្យតាមប្រពៃណីនៅស្រុកកំណើត ។ ចំណែកម៉ូតូសមត្ថកិច្ចយកទៅរក្សាទុកនៅប៉ុស្តិ៍នគរបាលស្ទឹងមានជ័យ៣ រង់ចាំយកឯកសារគ្រប់គ្រាន់មកផ្ទៀងផ្ទាល់ទើបប្រគល់អោយវិញ ៕
ចែករំលែកព័តមាននេះ