ក្រពះយើងហ្នឹងហើយជាអណ្តូងដ៏សែនជ្រៅ ព្រោះទម្លាក់អាហារទៅច្រើនសន្ធឹកយ៉ាងណាក៏នៅតែមិនចេះពេញ គឺនៅតែខ្វះ នៅតែស្រែកថាឃ្លានជានិច្ច។ ព្រោះហេតុនោះទើបព្រះបរមសាស្តាត្រាស់សម្តែងថា ការស្វែងរកអាហារមកចិញ្ចឹមជីវិតជាទុក្ខធំ ។
កុំឲ្យទុក្ខត្រួតលើទុក្ខនោះ បុគ្គលគួរស្វែងរកអាហារតាមផ្លូវសុចរិតទៀងត្រង់ទៅបានហើយ ចូរជាអ្នកកុំស្វែងរកតាមផ្លូវទុច្ចរិត ព្រោះអំពើអាក្រក់នឹងនាំឱ្យកើតទុក្ខទាំងការស្វែងរកផង និងទុក្ខព្រោះបានទ្រព្យដោយសារតែទុច្ចរិតកម្មនោះផង ពោលគឹទុក្ខទាំងក្នុងពេលបច្ចុប្បន្ន និងបន្តរហូតដល់បរលោកទៀត ។
ត្រូវដឹងថា ជីវិតយើងនេះ មិនមែនកើតមកគ្រាន់តែដើម្បីស្លាប់ទេ គឺកើតមកដើម្បីរស់ផងដែរ និងរស់ដើម្បីប្រព្រឹត្តនូវសេចក្ដីល្អ មិនមែនដើម្បីមើលងាយមើលថោកអ្នកដទៃ ច្រណែនឈ្នានីសគេ ចងអាឃាត ព្យាបាទ ចងគំនុំគំកួនអ្នកដទៃទេ គឺរស់ដើម្បីស្វែងរកទីពឹងសម្រាប់ខ្លួនឯង កុំបោះបង់ខ្លួនឯងចោលឲ្យសោះ កុំធ្វើខ្លួនឯងឱ្យដូចជាឈើស្អុយ ព្រោះអំពើទាំងនេះគ្មានន័យខ្លឹមសារអ្វីសម្រាប់ជីវិតឡើយ ។
ចែករំលែកព័តមាននេះ