ខេត្តកំពង់ឆ្នាំង ៖ បុរសម្នាក់ត្រូវប្រជាពលរដ្ឋប្រទះឃើញដេកស្លាប់ជាមួយនឹងម៉ូតូមួយគ្រឿងយ៉ាងអាណោចអាធ័មនៅក្រោមផ្លូវអភិវឌ្ឍន៍ថ្មី ស្ថិតក្នុងភូមិទី១ សង្កាត់ខ្សាម ក្រុងកំពុងឆ្នាំងបង្កឱ្យមានភ្ញាក់ផ្អើលកាលពីម៉ោង៧និង៣០នាទីព្រឹក ថ្ងៃទី២ ខែកុម្ភៈ ឆ្នាំ ២០១៩។
បុរសរងគ្រោះខាងលើមិនត្រូវបានគេស្គាល់អត្តសញ្ញាណភ្លាមៗទេ ដោយសមត្ថកិច្ចដែលបានចុះធ្វើការវាស់វែង និងពិនិត្យកន្លែងកើតហេតុបានសន្និដ្ឋានថា បុរសរងគ្រោះរូបនេះជិះម៉ូតូម៉ាកហុងដាឌ្រីម ពណ៌ខ្មៅ ធ្វើដំណើរពីកើតទៅលិចក្នុងល្បឿនយ៉ាងលឿន លុះមកដល់កន្លែងកើតហេតុជាផ្លូវកោងបត់ស្តាំ តែដោយសារបត់មិនទាន់ក៏ជ្រុលទៅបុកបង្គោលចំណាំងផ្លាត រួចធ្លាក់ចូលស្នាមភ្លោះ បណ្ដាលឲ្យស្លាប់បាត់បង់ជីវិតតែម្តង ។ ហើយពេលកើតហេតុនោះអាចចន្លោះពីម៉ោង៧ទៅ៨យប់ ថ្ងៃទី១ កុម្ភៈ ព្រោះនៅពេលប្រទះឃើញសពនៅម៉ោងជាង៧ព្រឹក ថ្ងៃទី២ ខែកុម្ភៈ សពជនរងគ្រោះបានរឹងទៅហើយ ។
ក្រោយពេលធ្វើការវាស់វែង សមត្ថកិច្ចបានយកសពជនរងគ្រោះទៅតម្កល់ទុកនៅវត្តខ្សាមដើម្បីរង់ចាំគ្រួសារដឹកយកទៅធ្វើបុណ្យតាមប្រពៃណី។ សមត្ថកិច្ចសន្និដ្ឋានថា ជនរងគ្រោះអាចនឹងស្រវឹងបើកម៉ូតូលឿន លុះមកដល់ផ្លូវកោង និងមានចំណោតខ្ពស់បត់ម៉ូតូមិនទាន់ ក៏ជ្រុលបុកបង្គោលចំណាំងផ្លាត ធ្លាក់ចូលប្រឡាយស្លាប់បែបនេះ។
លុះព័ត៌មានចុងក្រោយបានឱ្យដឹងថា បុរសរងគ្រោះខាងលើ ត្រូវបានស្គាល់អត្តសញ្ញាណហើយ គឺមានឈ្មោះ ឡាយ ឡេង អាយុ៣៥ឆ្នាំ មានទីលំនៅភូមិកោះតាម៉ូវ ឃុំកំពង់ព្រះ គគីរស្រុកបរិបូរណ៍ ៕
ចែករំលែកព័តមាននេះ