ខេត្តកំពត ៖ រថយន្តស៊េរីទំនើបមួយគ្រឿងបានបើកបរលើផ្លូវវាងក្រុង ហើយបានរេចង្កូតធ្លាក់ពីផ្លូវទៅបុកផ្ទះប្រជាពលរដ្ឋទាំងកំរោល ធ្វើឲ្យមានការភ្ញាក់ផ្អើលទាំងកណ្តាលអធ្រាត្រវេលាម៉ោង១២ និង៣០នាទីឈានចូលថ្ងៃទី០២ កុម្ភៈ ស្ថិតនៅចំណុចផ្លូវបំបែកអក្សT ដែលរថយន្តបង្កបើកបរក្នុងទិសដៅពីជើងទៅត្បូងដល់ផ្លូវបំបែកបត់ឆ្វេងចេញទៅផ្លូវកែប ក្នុងភូមិជុំគ្រៀល ឃុំជុំគ្រៀល ស្រុកទឹកឈូ ។
ប្រភពពីកន្លែងកើតហេតុថា រថយន្តបង្កម៉ាកឡិចស៊ីស ពណ៌.ស គ្មានស្លាកលេខ ហើយអ្នកបើកបរក្រោយពីកើតហេតុ បានចុះដោះផ្លាកលេខទៅលាក់ទុកនៅគូទរថយន្ត រួចរត់គេចខ្លួនបាត់ ។ ប្រភពដដែលបន្ត ពេលសមត្ថកិច្ចចរាចរណ៍ ចុះមកពិនិត្យទើបរាវរកឃើញផ្លាកលេខក្នុងគូទរថយន្ត ប៉ុន្តែសមត្ថកិច្ចពេលឃើញផ្លាកហើយក៏មិនបានបង្ហាញផ្លាកលេខរថយន្តខាងលើជាសាធារណៈឱ្យអ្នកកាសែតបានដឹងនោះទេ សង្ស័យទំនងជាម្ចាស់រថយន្តបង្ក ជាអ្នកមានទួនាទីម្នាក់នៅក្នុងខេត្ត ឬក៏អ្នកធ្លាប់ស្គាល់គ្នាជិតស្និទ្ធិជាមួយសមត្ថកិច្ចដែលចុះទៅត្រួតពិនិត្យនោះទើបជួយលាក់កំបាំងដូច្នេះ ។
ទោះបីម្ចាស់គេចខ្លួន ព្រមទាំងលាក់លេខរថយន្តយ៉ាងណាក្តី ក៏លាក់មិនជិតពីភ្នែកប្រជាពលរដ្ឋល្អសហការជាមួយអ្នកសារព័ត៌មានដែរ គឺរថយន្តនោះមានផ្លាកលេខភ្នំពេញ AH-9134 ដែលផ្លាកលេខនេះមុនពេលម្ចាស់ចុះរត់គេចខ្លួនបានដោះទៅលាក់នៅក្នុងគូទរថយន្តខាងក្រោយ ហើយត្រូវសមត្ថកិច្ចឆែកឃើញ ។
ប្រភពដែលបន្តថា ម្ចាស់ផ្ទះដែលរថយន្តបុកផ្ទះនេះមានឈ្មោះសៅ ជាគ្រូបង្រៀន រស់នៅភូមិ-ឃុំកន្លែងកើតហេតុខាងលើ។ នៅក្នុងហេតុការណ៍បុកផ្ទះប្រជាពលរដ្ឋខាងលើ មិនបណ្តាលឲ្យមនុស្សណាម្នាក់ នៅក្នុងផ្ទះរងរបួសនោះទេ គ្រាន់តែរងការខូចផ្ទះប៉ុណ្ណោះ ។
ចែករំលែកព័តមាននេះ