រាជធានីភ្នំពេញ ៖ រថយន្តហាយឡែនឌ័រ ពាក់ផ្លាកលេខ ខេមរភូមិន្ទ ១គ្រឿងបើកបោះពួយក្នុងល្បឿនលឿនដូចហោះជ្រុលទៅបុករះយានយន្តនៅខាងមុខបណ្ដាលឲ្យយានយន្តខ្លះក្រឡាប់បះជើងចាក់ទំនិញចោលពេញផ្លូវ និងរងការខូចខាតជាច្រើនគ្រឿង ។ មិនតែប៉ុណ្ណោះបណ្ដាលឲ្យមនុស្ស៤នាក់រងរបួសធ្ងន់ និងស្រាលផងដែរ…
រាជធានីភ្នំពេញ ៖ រថយន្តហាយឡែនឌ័រ ពាក់ផ្លាកលេខ ខេមរភូមិន្ទ ១គ្រឿងបើកបោះពួយក្នុងល្បឿនលឿនដូចហោះជ្រុលទៅបុករះយានយន្តនៅខាងមុខបណ្ដាលឲ្យយានយន្តខ្លះក្រឡាប់បះជើងចាក់ទំនិញចោលពេញផ្លូវ និងរងការខូចខាតជាច្រើនគ្រឿង ។
មិនតែប៉ុណ្ណោះបណ្ដាលឲ្យមនុស្ស៤នាក់រងរបួសធ្ងន់ និងស្រាលផងដែរ ចំណែករថយន្តបង្កបន្ទាប់ពីបុករះជាហូរហែរួចមកក៏បានបែកកង់ទៅមុខលែងរួចហើយក៏បង្កឲ្យមានការកកស្ទះចរាចរលើកំណាត់ផ្លូវជាតិលេខ៤ផងដែរ ។
ឧប្បត្តិហេតុគ្រោះថ្នាក់ចរាចរនេះបានកើតឡើង កាលពីវេលាម៉ោង៩និង៤៥នាទីព្រឹក ថ្ងៃទី០២ ខែកុម្ភៈ ឆ្នាំ២០១៩ នៅលើកំណាត់ផ្លូវជាតិលេខ៤ ស្ថិតនៅក្នុងភូមិផ្សារកំបូល សង្កាត់កំបូល ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា រថយន្តបង្ក១គ្រឿងខាងលើ ម៉ាកហាយឡែនឌ័រ ពណ៌ស្ករ ពាក់ផ្លាកលេខ ខេមរភូមិន្ទ09 2-9664 បើកបរដោយបុរសម្នាក់ មិនទាន់ស្គាល់អត្តសញ្ញាណនៅឡើយ ។
នៅមុនពេលកើតហេតុរថយន្តនេះបានបើកបរក្នុងល្បឿនលឿនដូចហោះក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ បានជ្រុលទៅបុកពីក្រោយម៉ូតូសណ្ដោងកន្ទុយរ៉ឺម៉កដឹកទូផ្តៅ ចាន ឆ្នាំង ដើរលក់ បណ្ដាលឲ្យក្រឡាប់បះជើងចាក់សម្ភារខាងលើចោលរាយប៉ាយពេញផ្លូវ ។
ប្រភពដដែលបានបន្តទៀតថា ខណៈនោះអ្នកបើបរមិនព្រមឈប់សម្របសម្រួលគ្នាសិនទេ ផ្ទុយទៅវិញបានបន្ថែមល្បឿនកាន់តែលឿនដើម្បីរត់គេចខ្លួន ប៉ុន្តែបានចម្ងាយប្រមាណជាង១០០ម៉ែត្រប៉ុណ្ណោះ ក៏ជ្រុលទៅបុករះម៉ូតូរ៉ឺម៉កដឹកប្រេង១គ្រឿងទៀតពេញទំហឹង ។
ប៉ុណ្ណឹងហើយអ្នកបើកបរនៅតែមិនព្រមឈប់ដដែល នៅតែព្យាយាមបន្ថែមល្បឿន រត់គេចខ្លួនបន្តទៀតមរួចក៏បានជ្រុលទៅបុករថយន្តម៉ាកកាមរីបាឡែន ពណ៌ស ពាក់ផ្លាកលេខ ភ្នំពេញ 2AK-7107 ១គ្រឿងទៀតបណ្ដាលឲ្យរងការខូចខាត ។
ប្រភពខាងលើបានបន្តទៀតថា អ្នកបើកបររថយន្តពាក់ស្លាកលេខ ខេមរភូមិន្ទ នេះមានចិត្តសាហាវណាស់ ទោះបុករះជាបន្តបន្ទាប់បែបនេះក្ដីក៏នៅតែព្យាយាមបើករត់មិនព្រមឈប់ទៀត ។បន្ទាប់មកបានជ្រុលបន្តទៅបុករះម៉ូតូ២គ្រឿងជាបន្តបន្ទាប់ថែមទៀត ក្នុងនោះមានម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៦ ពាក់ផ្លាកលេខ ភ្នំពេញ 1DC- 2101 និងម៉ូតូ ១គ្រឿងទៀតម៉ាកហុងដា MSX មួយគ្រឿងទៀតទើបរថយន្តបែកកង់ទៅមុខលែងរួច ។
ខណៈនោះបានបណ្ដាលឲ្យមនុស្សចំនួននាក់៣នាក់រងរបួសធ្ងន់ និងម្នាក់ទៀតរង របួសស្រាលពេញផ្លូវ និងត្រូវបានរថយន្តពេទ្យដឹកយកទៅសង្គ្រោះបន្ទាន់ភ្លាមៗដែរ ។ ដោយឡែកអ្នកបើកបររថយន្តបង្កខាងលើបានចុះរត់គេចខ្លួនប៉ុន្តែត្រូវបាន អ្នកភូមិចាប់បានប្រគល់ជូនសមត្ថកិច្ច ។
ខណៈនោះបានធ្វើឲ្យមានការកកស្ទះយ៉ាងខ្លាំងលើកំណាត់ផ្លូវជាតិលេខ៤ ។ ចំណែកនគរបាលប៉ុស្តិ៍កំបូលរួមជាមួយនគរបាលចរាចរខណ្ឌពោធិ៍សែនជ័យ បានចុះទៅសម្រួលចរាចរ បន្ទាប់មកមកបានប្រគល់ករណីនេះទៅឲ្យខាងនគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានី ភ្នំពេញចាត់ការតាមច្បាប់ ៕
ចែករំលែកព័តមាននេះ