រាជធានីភ្នំពេញ ៖ អតីតសកម្មជនបក្សប្រឆាំងម្នាក់ឈ្មោះ គង់ ម៉ាស់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ លោក ម៉ុង មុនីសោភា នៅព្រឹកថ្ងៃទី១ ខែកុម្ភៈ ឆ្នាំ២០១៩នេះ បានចេញដីកាឲ្យមន្ត្រីពន្ធនាគារព្រៃស (ម១) នាំមកសាលាដំបូងរាជធានីភ្នំពេញមកសាកសួរបន្ថែម ។
សូមជម្រាបថា កាលពីថ្ងៃទី២០ ខែមករា ឆ្នាំ២០១៩ លោកចៅក្រមស៊ើបសួរ ម៉ុង មុនីសោភា បានសម្រេចចេញដីកាឃុំខ្លួនជនជាប់ចោទ គង់ ម៉ាស់ សកម្មជនបក្សប្រឆាំង ក្រោមការចោទប្រកាន់របស់លោក អ៊ុ សុភក្តី ព្រះរាជអាជ្ញារងអមសាលាដំបូងរាជធានីភ្នំពេញ២បទល្មើស គឺបទញុះញង់ឲ្យប្រព្រឹត្តបទល្មើសជាអាទិ៍ និងបទប្រមាថ ។
យោងតាមលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញបញ្ជាក់ថា ជនជាប់ចោទត្រូវបានចោទប្រកាន់ពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទប្រមាថ«តាមមាត្រា៤៩៥ និងមាត្រា៥០២នៃក្រមព្រហ្មទណ្ឌ ។
គួរបញ្ជាក់ថា កាលពីថ្ងៃទី១៤ ខែមករា ឆ្នាំ២០១៩ កន្លងទៅលោក កែវ សុធា ព្រះរាជអាជ្ញាអមសាលាដំបូងរាជធានីភ្នំពេញបានចេញដីកាបញ្ជាឲ្យបុគ្គលគង់ ម៉ាស់ បង្ហាញខ្លួននៅនាយកដ្ឋានសន្ដិសុខផ្ទៃក្នុង នៃក្រសួងមហាផ្ទៃឲ្យបានមុន ថ្ងៃទី១៤ ខែកុម្ភៈ ឆ្នាំ២០១៩ ដើម្បីសាកសួរលើបណ្ដឹងព្រហ្មទណ្ឌពីបទ ធ្វើសកម្មភាពប្រមាថប្រមុខរាជរដ្ឋាភិបាល និងញុះញង់ដោយប្រើខ្សែអាត់វីដេអូផ្សព្វផ្សាយ នាពេលកន្លងមកតាមប្រព័ន្ធហ្វេសប៊ុកក្នុងគោលបំណងឲ្យសាធារណជន និងប្រជាពលរដ្ឋទូទៅមានការស្អប់ខ្ពើមបង្កជាភាពចលាចលអសន្ដិសុខក្នុងប្រទេស ចំពោះរាជរដ្ឋាភិបាលដែលដឹកនាំដោយ សម្ដេចតេជោ ហ៊ុន សែន ៕
ចែករំលែកព័តមាននេះ