រាជធានីភ្នំពេញ ៖ មន្ត្រីជាន់គណបក្សកាន់អំណាចបានប្រកាសច្រានចោលចំពោះការលើកឡើងថា កម្ពុជានឹងធ្វើវិសោធនកម្មរដ្ឋធម្មនុញ្ញ ដើម្បីផ្លាស់ប្តូររបបពីរាជានិយម ទៅជារបបសាធារណៈរដ្ឋ និងទទួលយកកងទ័ពបរទេសដាក់ឈរជើងនៅកម្ពុជា ។
លោក សុខ ឥសាន អ្នកនាំពាក្យបានឲ្យដឹងនៅថ្ងៃទី១ កុម្ភៈថា ទោះបីមានការបញ្ជាក់ជា ច្រើនដងពីប្រមុខរាជរដ្ឋាភិបាលកម្ពុជា និងក្រសួងមានសមត្ថកិច្ចនានាយ៉ាងណាក៏ដោយក៏មានជនបរទេស និងអ្នកវិភាគរត់ចោលស្រុកនៅតែនិយាយចោទប្រកាន់ទាំងបំពានការពិតថារាជរដ្ឋាភិបាលកម្ពុជាចង់ធ្វើវិសោធនកម្មរដ្ឋធម្មនុញ្ញបង្ខិតបង្ខំព្រះមហាក្សត្រឲ្យព្រះអង្គដាក់រាជ្យ និងចង់បង្កើតរបបសាធារណរដ្ឋ ហើយចង់បើកផ្លូវអនុញ្ញាត្តឲ្យមានការតាំងមូលដ្ឋានយោធាបរទេសនៅក្នុងដែនដីនៃព្រះរាជាណាចក្រកម្ពុជាទៀតផង ។
លោកបន្តថា រដ្ឋធម្មនុញ្ញនៃព្រះរាជាណាចក្រកម្ពុជាមាត្រា១៥៥ពីរជំពូកទី១៦ថ្មីពីរហាមមិនឲ្យធ្វើវិសោធនកម្មដែលប៉ះពាល់ដល់របបរាជានិយមអាស្រ័យរដ្ឋធម្មនុញ្ញ និងរបបនយោបាយប្រជាធិបតេយ្យសេរីហុបក្សជាដាច់ខាត ។ លោកក៏បានលើកឡើងថា មាត្រា៥៣ជំពូកទី៤ ចែងថា ព្រះរាជាណាចក្រកម្ពុជាប្រកាន់ខ្ជាប់ជានិច្ចនូវនយោបាយអព្យាក្រឹត្យអចិន្ត្រៃយ និងមិនចូលបក្សសម្ព័ន្ធ ។
ព្រះរាជាណាចក្រកម្ពុជាមិនចងសម្ព័ន្ធយោធា ប្ញចូលក្នុងកិច្ចព្រមព្រៀងយោធាណាមួយដែលមិនស្របនឹងអព្យាក្រឹត្យភាពរបស់ខ្លួនឡើយ ។ លោកនិយាយថា ព្រះរាជាណាចក្រកម្ពុជាមិនអនុញ្ញាតឲ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញ្ញាតឲ្យមានមូលដ្ឋានយោធារបស់ខ្លួននៅបរទេសដែរលើកលែងតែក្នុងក្របខណ្ឌនៃសំណូមពររបស់អង្គការសហប្រជាជាតិ ។
ដោយហេតុនេះគ្មានទេ ការចង់ធ្វើវិសោធនកម្មរដ្ឋធម្មនុញ្ញដូចការនិយាយចោទប្រកាន់ដោយអគតិរបស់ពួកជនបរទេសខ្លះ និងអ្នកវិភាគរត់ចោលស្រុកនោះឡើយ ។ លោកបន្ថែមថា ការនិយាយលាបពណ៌ និងចោទមកលើរាជរដ្ឋាភិបាលកម្ពុជាគ្រាន់តែជាការមួលបង្កាច់មកលើគណបក្សប្រជាជនកម្ពុជា និងរាជរដ្ឋាភិបាលកម្ពុជាថា រំលោភរដ្ឋធម្មនុញ្ញនៃព្រះរាជាណាចក្រកម្ពុជាដែលបាន និងកំពុងត្រូវបានអនុវត្តយ៉ាងខ្ជាប់ខ្ជួននោះ ។
សូមជម្រាបថា អ្នកនាំពាក្យក្រសួងការពារជាតិបានច្រានចោលនូវសេចក្តីថ្លែងការណ៍មួយ របស់ស្ថាប័នចារកម្មសហរដ្ឋអាមេរិកដែលថា កម្ពុជាកំពុងត្រួសត្រាយផ្លូវឆ្ពោះទៅរកការធ្វើវិសោធនកម្មរដ្ឋធម្មនុញ្ញ ដើម្បីឱ្យមានមូលដ្ឋានទ័ពបរទេសនៅលើទឹកដី ៕
ចែករំលែកព័តមាននេះ