រាជធានីភ្នំពេញ ៖ តារាកំប្លែងនាយពាក់មី ត្រូវបានបុរសម្នាក់ធ្វើការប្រមាថយ៉ាងធ្ងន់ធ្ងរ រហូតដៀលដល់ពូជ ហៅជាសត្វក្រពើភ្លេចកំណើតដើម ។ តាមរយៈសារអេឡិចត្រូនិក ត្រូវបានតារារូបនេះ ធ្វើការលាតត្រដាងជាសាធារណៈ តាមបណ្តាញសង្គមហ្វេសប៊ុក នៅថ្ងៃទី១ កុម្ភៈ នេះផងដែរ ។
គេនៅមិនទាន់ដឹងថា បុរសដែលបានជេរប្រមាថមិនសំចៃមាត់ មកលើតារាកំប្លែងខាងលើនេះ តើមានទំនាក់ទំនងឬគំនុំគុំគួនច្រណែនមកលើរូបលោកយ៉ាងណានោះទេ ។ ក្នុងពេលដែលសម្តីឆ្លើយឆ្លើយ ហាក់ប្រើភាសាយ៉ាងអសុរោះជាទីបំផុត ។ យ៉ាងណាក៏ដោយ តារាកំប្លែងប្រចាំស្ថានីយទូរទស្សន៍CTN រូបនេះបានសម្តែងការងឿងឆ្ងល់ ពីការតិះតៀលបែបនេះ និងបានប្រកាសរកមុខអ្នកណា ដែលស្គាល់បុរសខាងលើនេះដែរ ។
យោងតាមសារអេឡិកត្រូនិចដែលបានឆ្លើយឆ្លងគ្នា រវាងនាយពាក់ មី និងបុរសខាងលើនោះ ដែលត្រូវបានបញ្ចេញដោយតារាកំប្លែងរូបនេះបញ្ជាក់ទៀតថា បុរសខាងលើនេះ បានប្រើប្រាស់ភាសាជេរដៀលតារាកំប្លែងនាយ ពាក់មី ជាពូជថោកទាប និងសត្វក្រពើភ្លេចកំណើត ។ ជាមួយការឆ្លើយតប ដោយលោក ពាក់មីថា ហេតុអ្វីចោទលោកជាសត្វក្រពើនោះ បុរសរូបនោះ បានលើហេតុផលជារួមមកវិញថា «តារាកំប្លែងរូបនេះ បានឆក់យកអាជីពសិល្បៈសម្តែង និងពិធីករស្ទើរតែទាំងអស់ ក្នុងនោះក៏មានកូនប្រុស-ស្រីរបស់លោក ក៏អាចមានវត្តមានសម្តែងផងដែរ ។
ជាការឆ្លើយតប នាយពាក់មីបានបញ្ជាក់ទៀតថា «សម្តែងឱ្យបងប្អូនបានស្តាប់ទេ និងជាមុខរបរស្របច្បាប់ ទៀត តើពូជរបស់ខ្ញុំខុសអី?»
ពាក់ព័ន្ធទៅនឹងបញ្ហាខាងលើនេះ កោះសន្តិភាពមិនអាចសុំការបកស្រាយណាមួយពីតារាកំប្លែងនាយពាក់
មីបានទេ គិតត្រឹមថ្ងៃទី០១ កុម្ភ ឆ្នាំ២០១៩ នេះ ក្នុងពេលដែលការសាកសួរ តាមសារអេឡិចត្រូនិក ក៏មិនមានការឆ្លើយតបពីតារាកំប្លែងរូបនេះឡើយ ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ